Daniel 2 - Nau Brah Ndu Ngơi 2023

Kô̆ nau rêh jêng ( 2:1 – 6:28 ) Y-Nêbukatnetsar mbơi tal nguay

¹ Năm tal bar rnôk Y-Nêbukatnetsar chiă uănh, hađăch geh nau mbơi ƀư ăn ma nau mĭn păng rung răng, mâu dơi hăk bê̆ch ôh.

² Hađăch tâm rgum phung ƀŭk rƀên, phung nchrâng mănh, phung kôranh n'hŭm jêh ri phung Kaldê gay rblang nau mbơi ma hađăch. Khân păng lăp gŭ tanăp hađăch.

³ Hađăch lah ma khân păng: “Gâp geh nau mbơi jêh ri nau mĭn gâp rung răng yorlah ŭch gĭt rbăng nau rblang mbơi nây.”

⁴ Phung Kaldê lah ma hađăch tâm nau ngơi Aramêk pô aơ: “Ơ hađăch gŭ rêh n'ho ro! Ăn may nkoch nau mbơi ma phung oh mon may, jêh ri hên mra rblang an.”

⁵ Hađăch plơ̆ lah ma phung Kaldê: “Aơ jêng nau gâp dăp jêh: Tơlah khân may mâu ăn gâp gĭt ôh nau mbơi jêh ri nau rblang nau mbơi nây pôri bu mra hêk lơi khân may ăn hăch, ngih khân may jêng mbŭch ndjah.

⁶ Ƀiălah tơlah khân may mbơh rah vah ăn ma gâp nau mbơi jêh ri nau rblang pôri gâp mra ăn ndơ ma khân may, nau nkhôm jêh ri nau yơk toyh. Pôri mbơh hom ma gâp nau gâp mbơi nây, jêh ri nau rblang hom.”

⁷ Khân păng plơ̆ lah tal bar: “Ăn hađăch nkoch tay nau mbơi saơ ăn ma phung oh mon may, jêh ri mra rblang an.”

⁸ Hađăch plơ̆ lah: “Gâp gĭt nanê̆ khân may ŭch ƀư jŏ mông yorlah khân may gĭt jêh nau gâp tâm nal:

⁹ Tơlah khân may mâu tâm mpơl ôh ma gâp nau gâp mbơi saơ pôri geh knŏng du nau phat dôih prăp jêh ma khân may. Khân may tâm nchră ndrăng khân may nơm djôt lĕ nau ngơi mƀruh nkhơng ngơi ma gâp kŏ tât nau kan geh nau rgâl. Pôri, mbơh hom ma gâp nau gâp mbơi saơ jêh ri gâp mra gĭt khân may mra dơi rblang.”

¹⁰ Phung Kaldê plơ̆ lah ma hađăch: “Mâu geh du huê bunuyh ôh ta klơ neh ntu aơ dơi ƀư ƀoi nau hađăch, yorlah mâu geh ôh du huê hađăch, nđâp lah geh nau dơi toyh kađôi đŏng, mâu mâp djôt nau tâm ban pônây ma phung rƀên, ma phung nchrâng mănh mâu lah ma phung Kaldê.

¹¹ Nau hađăch ŭch nây jêr ngăn, mâu geh du huê bunuyh dơi tâm mpơl nau nây ma hađăch ôh, knŏng êng phung brah mâu gŭ ôh ndrel ma kon bunuyh.”

¹² Tăng nau nây, hađăch ji nuih hâu ngăn jêh ri ntăm đă nkhĭt lĕ rngôch phung njêh tâm n'gor bri Babilôn.

¹³ Pôri nau ntrŭnh nây ăn nkhĭt lơi phung njêh; bu joi Y-Daniel jêh ri phung băl păng gay nkhĭt.

¹⁴ Rnôk nây, Y-Daniel plơ̆ lah ma nau blau mĭn ngơi ma Y-Ariôk, kôranh tahan gak hađăch, dôl hăn rŏ trong gay nkhĭt phung njêh n'gor bri Babilôn.

¹⁵ Y-Daniel ôp Y-Ariôk, kôranh tahan hađăch: “Mâm ƀư nau hađăch ntăm ndal tâm ban pônây?” Y-Ariôk nkoch bri rah vah nau nây ma Y-Daniel.

¹⁶ Y-Daniel lăp ro dăn ma hađăch njong tay mông gay ma rblang nau mbơi nây ăn ma hađăch.

¹⁷ Jêh nây Y-Daniel plơ̆ sĭt ta ngih jêh ri mbơh rah vah nau nây ma băl păng jêng Y-Hanania, Y-Misaêl jêh ri Y-Asaria,

¹⁸ jêh ri đă khân păng dăn nau yô̆ bơh Brah Ndu tâm trôk ma nau ndâp aơ, gay ma Y-Daniel jêh ri phung băl păng mâu geh khĭt ndrel ma phung njêh êng tâm n'gor bri Babilôn.

¹⁹ Măng nây, nau ndâp dơi mpơl ăn ma Y-Daniel tâm du nau tâm saơ. Y-Daniel tâm rnê ma Brah Ndu klơ trôk.

²⁰ Y-Daniel lah: “Tâm rnê ma amoh Brah Ndu ƀaƀơ n'ho ro! Yorlah lĕ rngôch nau blau mĭn jêh ri nau brah jêng ndơ Păng da dê.

²¹ Păng nơm yơh tâm rgâl mông nar jêh ri yan, N'glưh jêh ri njêng phung hađăch; Păng ăn nau blau mĭn ma bunuyh blau mĭn Jêh ri nau gĭt rbăng ma bunuyh gĭt rbăng.

²² Păng nơm yơh tâm mpơl lĕ nau jru ndâp ngăn; Păng gĭt lĕ nau tât geh tâm nau ngo Jêh ri nau ang gŭ ndrel ma păng.

²³ Ơ Brah Ndu phung chô yau gâp, Gâp lah ueh jêh ri tâm rnê ma May, Yorlah May ăn jêh nau blau mĭn jêh ri nau dơi ma gâp, Aƀaơ aơ, May tâm mpơl ma gâp gĭt nau hên dăn ôp May, Yorlah May mpơl ăn ma hên nau hađăch tĭng joi.”

Y-Daniel rblang nau mbơi ma hađăch

²⁴ Pôri, Y-Daniel hăn tât ma ngih Y-Ariôk, jêng nơm hađăch đă nkhĭt phung njêh n'gor bri Babilôn, jêh ri lah: “Lơi ta nkhĭt ôh phung njêh n'gor bri Babilôn; ăn njŭn leo gâp tanăp măt hađăch pôri gâp mra rblang nau mbơi ma hađăch.”

²⁵ Y-Ariôk ndal njŭn leo Y-Daniel tanăp hađăch jêh ri mbơh ma hađăch: “Gâp joi saơ jêh du huê bunuyh tâm phung bu nă bơh bri Yuđa mra dơi rblang nau hađăch mbơi.”

²⁶ Hađăch ôp Y-Daniel, ăt amoh Y-Beltisasar, “May mra dơi tâm mpơl ma gâp gĭt nau gâp mbơi saơ jêh ndrel nau rblang dơi lĕ?”

²⁷ Y-Daniel plơ̆ lah: “Mâu geh du huê nơm njêh, nơm n'hŭm, nơm ƀŭk rƀên mâu lah nơm sek uănh mănh dơi tâm mpơl ôh ma hađăch nau khlay ndâp hađăch hŏ ôp.

²⁸ Ƀiălah Brah Ndu klơ trôk jêng Nơm tâm mpơl nau ndâp, mra ăn ma hađăch Nêbukatnetsar gĭt lĕ nau mra tât tâm rnôk nglĕ dŭt. Aơ jêng nau mbơi jêh ri lĕ nau tâm saơ tât nau mĭn may dôl may bê̆ch ta klơ sưng bê̆ch:

²⁹ Ơ hađăch, dôl may bê̆ch ta klơ sưng bê̆ch may geh nau mĭn ma nau mra tât pôri Nơm tâm mpơl nau ndâp ăn may gĭt nau mra geh tât.

³⁰ Bi ma gâp, mâu di gâp blau mĭn lơn ma phung êng, ƀiălah nau ndâp hŏ tâm mpơl jêh ăn ma gâp gay gâp rblang ăn ma hađăch gĭt rbăng, yor nây hađăch gĭt lĕ nau mĭn tâm nuih n'hâm may nơm.

³¹ Ơ hađăch, aơ, may hŏ saơ jêh du mlâm rup toyh. Rup nây toyh ngăn jêh ri nchrat ang ngăn, gŭ dâk tanăp may, păng klach ngăn.

³² Bôk rup nây bu ƀư ma mah kloh; ntang ntơh jêh ri bar tur ti ma prăk; ndŭl jêh ri tơm blu păng ma kông;

³³ jâng păng ƀư ma loih jêh ri mpang jâng du kô̆ ma loih du kô̆ ma neh uk.

³⁴ Dôl may pơh uănh rup brah geh du glo lŭ mâu tă bơh mpang ti bunuyh trah ôh, dong ta mpang jâng loih jêh ri ma neh uk rup brah, ƀư ma păng nchah hăch rhên.

³⁵ Rnôk nây loih, neh uk, kông, prăk jêh ri mah nchah hăch da dê, tâm ban ma lâk ta ntŭk mprah ba yan vai, jêh ri sial khôm rdu mâu hôm saơ têl ôh. Ƀiălah glo lŭ hŏ dong ta rup jêng du rplay yôk toyh, bêng lam neh ntu.

³⁶ Nây jêng nau mbơi. Aƀaơ, hên mra rblang ma hađăch nau khlay păng.

³⁷ Ơ hađăch, may jêng hađăch ma phung hađăch; Brah Ndu klơ trôk ăn jêh ma may ƀon bri hađăch, nau dơi, nau ktang jêh ri nau chrêk rmah.

³⁸ Păng jao jêh tâm ti may phung kon bunuyh, mpô mpa tâm bri jêh ri sĭm tâm trôk; nđâp lah ta ntŭk khân păng ăt păng ăn may chiă uănh lĕ rngôch. Pônây, May jêng bôk nây ƀư ma mah.

³⁹ Ƀiălah pakơi hađăch, mra geh du rplay ƀon bri hađăch êng, jê̆ lơn ma bri hađăch; lôch nây geh đŏng ƀon bri hađăch tal pe, jêng bri hađăch ma kông, mra chiă uănh lam neh ntu.

⁴⁰ Geh đŏng ƀon bri hađăch rơh puăn, ktang nâm bu loih, yorlah loih dong nchah hăch rhên jêh ri ƀư rai lĕ rngôch ndơ; jêh ri nâm bu loih dong nchah hăch rhên jêh ri nâm bu ƀư nchah lêk lĕ rngôch ndơ, pôri ƀon bri hađăch nây ăt nchah lơi hăch rhên jêh ri ƀư rai lêk lĕ bri dak êng pônây lĕ.

⁴¹ Nâm bu may saơ jêh, mpang jâng jêh ri nglau jâng, du kô̆ ƀư ma neh uk du kô̆ ƀư ma loih, nây jêng du rplay ƀon bri hađăch tâm pă nkhah, ƀiălah tâm ƀon bri hađăch nây mra geh ƀă nau ktang loih, nâm bu may saơ jêh loih tâm rlŭk đah neh uk.

⁴² Lĕ nglau jâng du kô̆ ƀư ma loih du kô̆ ma neh uk, yor ri ƀon bri hađăch nây ƀă ma ktang ƀă ma rbăk.

⁴³ Nâm bu may saơ jêh loih tâm rlŭk đah neh uk, lĕ phung ndŭl mpôl tâm ƀon bri hađăch ăt tâm rlŭk ndrăng khân păng nơm ƀiălah mâu tâm gop ndrel ôh, nâm bu loih mâu geh tâm gop đah neh uk ôh.

⁴⁴ Tâm rnôk phung hađăch aơ, Brah Ndu tâm trôk mra rdâk du rplay ƀon bri hađăch mâu mra mâp rai lôch ôh, nau chiă uănh ƀon bri hađăch nây mâu mra tŭp ma phung ndŭl mpôl êng. Ƀon bri hađăch nây mra dong nchah jêh ri ƀư rai lĕ rngôch ƀon bri hađăch êng, păng nơm mra hôm n'ho ro.

⁴⁵ Nâm bu may saơ jêh, glo lŭ bu trah tă bơh yôk mâu di tă bơh ti kon bunuyh ôh, jêh ri dong nchah loih, kông, neh uk, prăk jêh ri mah. Brah Ndu nơm dŭt prêh tâm mpơl jêh ma hađăch gĭt nau mra tât. Nau mbơi aơ jêng ngăn jêh ri nau rblang nây jêng nanê̆ ngăn.”

⁴⁶ Rnôk nây, hađăch Y-Nêbukatnetsar păn muh măt mbah ma Y-Daniel jêh nây ntăm đă djôt ndơ nhhơr jêh ri ndơ ƀâu kah ma Y-Daniel.

⁴⁷ Hađăch lah ma Y-Daniel, “N'hêl nanê̆, Brah Ndu khân may jêng Brah Ndu ma phung brah, jêng Kôranh Brah ma phung hađăch, jêng Nơm tâm mpơl lĕ nau ndâp, yor bơh Păng may dơi tâm mpơl lĕ nau ndâp aơ.”

⁴⁸ Hađăch ăn Y-Daniel tâm kan toyh jêh ri ăn ma păng ndơ khlay. Hađăch ăn păng chiă uănh lĕ n'gor bri Babilôn jêh ri ƀư kôranh toyh ma phung kôranh ma lĕ rngôch phung njêh tâm n'gor bri Babilôn.

⁴⁹ Tĭng nau Y-Daniel dăn, hađăch ăn Y-Sadrak, Y-Mêsăk, jêh ri Y-Abetnêgô chiă uănh ndrel bri Babilôn; bi ma Y-Daniel gŭ tâm nkual ngih hađăch.