Daniel 12 - Nau Brah Ndu Ngơi 2023

Kâp gân tâm nau rai yot

¹ “Tâm rnôk nây, tông mpăr toyh Mikel, nơm king n'gang ma phung ƀon lan may mra dâk. Jêh ri mra geh du rơh uh ah mâu mâp saơ ôh bơh ntơm ndâk njêng bri dak kŏ tât ta rnôk nây. Ƀiălah rnôk nây lĕ, mbu nơm tâm phung ƀon lan may geh amoh tâm ndrom samƀŭt ri mra dơi geh nau tâm rklaih.

² Âk bunuyh gŭ bê̆ch tâm neh muy mra dâk, geh bunuyh gay dơn nau rêh n'ho ro, geh nơm dơn nau bêk nau ƀơ̆ ƀơch n'ho ro.

³ Phung gĭt rbăng mra nchrat nâm bu nau ang ta klơ trôk; jêh ri phung njŭn leo âk bunuyh tât ma nau sŏng srăng mra nchrat ang nâm bu phung mănh ƀaƀơ n'ho ro.

⁴ Bi may, hơi Y-Daniel, nchăng hom nau aơ jêh ri tâp pŏng lơi ndrom samƀŭt aơ kŏ tât ta rnôk nglĕ dŭt. Âk bunuyh mra nsong ta aơ ta ri jêh ri nau gĭt rbăng mra hao lơn.”

Nau tâm saơ kêng nglĕ dŭt

⁵ Rnôk nây, gâp, Y-Daniel, dôl uănh jêh ri aơ, geh bar hê êng gŭ dâk, du huê đah aơ dak krong, du huê êng đah tê̆ kơh dak krong.

⁶ Du huê tâm bar hê khân păng ôp ma bunuyh nsoh bok mhay dôl gŭ dâk ta klơ dak krong: “Ndah jŏ mra lôch lĕ nau khlay aơ?”

⁷ Gâp tăng bunuyh nsoh bok mhay dâk ta klơ dak krong, yơr ti ma jêh ri ti chiau leo pa trôk, sŏk amoh Nơm gŭ rêh mro mrăng sơm ton pô aơ: “Mra dơi rgăn du gưl, bar gưl jêh ri n'gul gưl, jêh ri nau ktang phung kloh ueh mra dŭt pôri lĕ nau aơ mra lôch ngăn jêh.”

⁸ Gâp tăng ƀiălah gâp mâu gĭt rbăng ôh, yor ri gâp ôp: “Ơ kôranh gâp, mâm mra jêng nau nglĕ dŭt ma nau aơ?”

⁹ Bunuyh nây plơ̆ lah: “Ơ Y-Daniel, lơi mĭn rvê êng, yorlah lĕ nau ngơi aơ nchăng jêh, jêh ri tâp pŏng jêh kŏ tât rnôk nglĕ dŭt.

¹⁰ Âk bunuyh bu mra dơi ƀư kloh, jut nglang jêh ri ƀư rsang. Ƀiălah phung ƀai ăt mra thoi đŏng ƀư ƀai. Mâu geh phung ƀai mra gĭt rbăng ôh, ƀiălah phung njêh mra gĭt rbăng.

¹¹ Ntơm bơh mông bu ăn chalơi nhhơr ndơ ƀư brah gŭch ƀaƀơ jêh ri bu rdâk nau ƀơ̆ ƀơch ƀư ăn jêng rngot njăp, mra geh du rbăn bar rhiăng sĭn jât nar.

¹² Ueh maak ngăn ma mbu nơm nâp nuih n'hâm gŭ kâp lĕ du rbăn pe rhiăng pe jât ma prăm nar!

¹³ Bi may, ăn mât răp jăp kŏ tât rnôk nglĕ dŭt. May mra dơi rlu jêh ri tât lĕ nar nglĕ dŭt, may mra dâk tâm drăp ndơn ma may.”