Daniel 11 - Nau Brah Ndu Ngơi 2023

¹ Bi gâp be, ntơm bơh năm rơh nguay tâm rnôk hađăch Darius bunuyh Mêdơ, gâp hŏ dâk gay kơl jêh ri ntop n'hâm suan ăn ma păng.

Tâm lơh ndrăng phung hađăch mpeh pa lơ jêh ri mpeh pa dâng

² “Aƀaơ aơ gâp mra ăn may gĭt nau nanê̆ ngăn. Aơ, geh pe hađăch mra mpơl tâm n'gor Persi. Hađăch rơh puăn ndrŏng kuăng lơn ma lĕ rngôch phung hađăch êng. Tơlah drăp ndơ ƀư ma hađăch nây jêng ktang pôri păng mra nsônh phung ƀon lan tâm rdâng đah ƀon bri hađăch Grek.

³ Jêh nây mra geh du huê hađăch ktang luh tay. Păng mra chiă uănh ma lĕ rngôch nau dơi toyh, jêh ri tĭng nâm păng ŭch mĭn.

⁴ Ƀiălah tơlah hađăch nây hŏ nâp jêh pôri ƀon bri hađăch păng mra nchah rai jêh ri tâm pă mpeh puăn njônh sial tâm trôk, ƀiălah mâu dơi nkoch tay ma phung kon sau păng ôh, mâu lĕ di dŏng nau dơi ntơm saơm gay ma chiă uănh đŏng ôh. Ƀon bri hađăch păng mra rôk lĕ jêh ri ăn ma phung êng mâu di noi deh păng ôh.

⁵ Hađăch mpeh pa dâng mra jêng ktang, ƀiălah du huê tâm phung kôranh păng mra jêng ktang lơn ma păng jêh ri ƀon bri hađăch păng mra jêng toyh ngăn.

⁶ Âk năm pakơi, phung hađăch nây mra ƀư nau tâm rnglăp, kon bu ur hađăch mpeh pa dâng ƀư ndrôi đah hađăch mpeh pa lơ gay ƀư rnglăp nau đăp mpăn. Ƀiălah kon bu ur hađăch mâu prăp nau dơi ôh; hađăch mpeh pa lơ jêh ri noi deh păng mâu lĕ dơi dâk ôh. Rnôk nây, kon bu ur hađăch ndrel ma phung njŭn leo păng, mbơ̆ păng jêh ri sai păng bu mra jao da dê.

⁷ Du nkeh ndrel tơm đah kon bu ur hađăch mra hao ntrok jêng hađăch mpeh pa dâng. Hađăch nây mra leo phung tahan lăp tâm pôih hađăch mpeh n'gor pa lơ. Rduh lơh jêh ri dơi.

⁸ Păng mra njŭn sĭt ta n'gor Êjipt ma lĕ brah khân păng, tă bơh lĕ rup trah jêh ri nđâp ma lĕ ndơ dŏng ƀư ma mah ƀư ma prăk. Păng rlu nau tâm lơh, tâm bar pe năm păng mâu tâm lơh ôh đah hađăch mpeh pa lơ.

⁹ Pakơi nau nây, Hađăch mpeh pa lơ geh lăp tâm n'gor bri hađăch mpeh pa dâng, ƀiălah plơ̆ sĭt tay ta n'gor bri păng nơm.

¹⁰ Phung kon bu klâu hađăch mpeh pa lơ mra nkra ma nau tâm lơh. Khân păng tâm rƀŭn âk phung tahan jêh nây leo phung tahan văch lơh, pit in, nchueng ăp ntŭk; khân păng njŭn nau tâm lơh tât ta pôih hađăch pa dâng.

¹¹ Rnôk nây hađăch mpeh pa dâng ji nuih, ran tâm lơh đah hađăch mpeh pa lơ. Nđâp tơlah hađăch mpeh pa lơ hŏ tâm rƀŭn du phung tahan âk râk, ƀiălah phung tahan nây ăt mra tŭp tâm ti hađăch mpeh pa dâng.

¹² Tơlah tâm lơh dơi jêh đah phung tahan nây, hađăch mpeh pa dâng geh nuih n'hâm sưr. Păng mra nkhĭt âk rbăn, âk rmưn phung rlăng ƀiălah păng mâu dơi ôh.

¹³ Hađăch mpeh pa lơ mra tâm rƀŭn đŏng du phung tahan âk lơn ma lor, jêh ri tât kêng dŭt lĕ gưl, nây jêng lĕ năm, hađăch nây hăn tâm lơh ndrel phung tahan ktang, ndrăp ndơ tâm lơh tŏng ngăn.

¹⁴ Tâm nôk nây, âk bunuyh mra dâk tâm lơh đah hađăch mpeh pa dâng. Lĕ bunuyh ƀư rŭng răng tâm phung ƀon lan may mra hao âk gay ƀư tât di ngăn, ƀiălah khân păng mâu mra dơi ôh.

¹⁵ Hađăch mpeh pa lơ mra văch ndâk pôih jêh ri dơi sŏk du play ƀon nâp. Phung tahan mpeh pa dâng mâu mra hôm dơi tâm rdâng ôh, nđâp ma phung tahan blau ăt mâu hôm geh nau ktang tâm rdâng.

¹⁶ Hađăch mpeh pa lơ mra hăn tâm lơh ƀư tĭng nâm păng nơm ŭch, jêh ri mâu geh nơm dơi tâm rdâng đah hađăch nây. Păng mra gŭ tâm bri chrêk rmah, djôt nau dơi ƀư nkhĭt tâm ti.

¹⁷ Păng mra mĭn ntrâng hăn tâm lơh ma nau ktang ƀon bri hađăch păng. Păng mra ăn nau tâm rnglăp đah hađăch mpeh pa dâng, ăn kon bu ur păng gŭ ma hađăch aơ gay ƀư rai ƀon bri hađăch păng, ƀiălah nau nây mâu jêng ôh, mâu lĕ jêng khlay ma păng.

¹⁸ Pakơi nau nây, hađăch plơ̆ hăn rlet ma n'gor kơh dak mƀŭt jêh ri dơi pit âk ntŭk. Ƀiălah du huê kôranh tahan mra ƀư ăn lôch nuih n'hâm nau hađăch sưr, ƀư ăn nau sưr păng nơm tâm rdâng đah păng.

¹⁹ Hađăch plơ̆ sĭt ma lĕ pôih ta n'gor bri păng nơm; ƀiălah păng mra chêh prah jêh ri prah sa mok, jêh ri mâu hôm geh bunuyh mâp đŏng ôh hađăch nây.

²⁰ Bunuyh ntrok hao hađăch nây mra njuăl bunuyh hăn tŭn jot riu pi gay thoi nau ndrŏng lơn tâm ƀon bri hađăch, ƀiălah mâu jŏ ôh tâm nar pakơi bu mra nkhĭt lơi hađăch mâu di ôh yor nau ji nuih mâu lah nau tâm lơh ôh.

²¹ Ntrok hađăch jêng bunuyh bu tâm rmot ngăn, bu mâu ăn nau dơi jêng hađăch ôh. Păng mra văch ndal, dŏng nau ndơm plĕch rlăm gay pit in ƀon bri hađăch.

²² Phung tahan bu năch lăp ler nâm bu dak lip mra geh dak bŭk jêh ri nchah rai tanăp hađăch nây, nđâp kôranh ma nau tâm rnglăp tâm ban lĕ.

²³ Jêh ƀư nau tâm rnglăp đah lĕ bri dak êng, hađăch nây ƀư ma lĕ nau ndơm mƀruh gay ƀư ktang phung tahan, nđâp lah bri dak jê̆ lê̆.

²⁴ Hađăch nây mra lăp lơh ndal lĕ ntŭk neh âk rmeh lơn tâm n'gor jêh ri mra ƀư nau mbơ̆ păng, phung che păng mâu mâp ƀư. Păng djôt pit in drăp ndơ, lĕ ndô ndơ hŏ dơi sŏk pit jêh ri pă drăp ndơ ma phung tĭng ndô̆ păng. Păng nchră ƀư nau hăn lơh lĕ pôih, ƀiălah tâm du mông ƀât lât dơm.

²⁵ Jêh ma nau nây, păng lĕ nuih n'hâm lĕ n'hâm suan djôt du phung tahan ktang hăn lơh hađăch mpeh pa dâng. Hađăch mpeh pa dâng mra tâm lơh ndrel ma du phung tahan âk ngăn jêh ri ktang, ƀiălah mâu dơi tâm rdâng ôh, yorlah bu tâm nchră nau tâm rdâng đah păng.

²⁶ Phung sa piăng let ta klơ sưng sông sa hađăch mra ƀư mhĭk ma hađăch; phung tahan păng bu mra pih kloh, âk bunuyh mra prah khĭt.

²⁷ Bi ma bar hê hađăch nây, tâm nuih n'hâm ŭch mĭn ƀư mhĭk ndrăng khân păng nơm; khân păng gŭ ndrel du mlâm sưng sông sa ƀiălah khân păng tâm ngơi ma nau ndơm. Ƀiălah nau ngơi nây mâu jêng yorlah nau nglĕ dŭt mra tât tâm rnôk tâm nal jêh.

²⁸ Hađăch mpeh bri pa lơ plơ̆ sĭt ta n'gor bri ndrel âk drăp ndơ; ƀiălah nuih n'hâm păng mĭn tâm rdâng đah nau tâm rnglăp kloh ueh. Păng mra ƀư nau mĭn aơ ta trong plơ̆ sĭt ma n'gor bri păng nơm.

²⁹ Ta mông tâm nal jêh hađăch nây mra plơ̆ tay jêh ri hăn lăp ta mpeh pa dâng, ƀiălah nôk aơ mâu tâm ban ma nôk lor ôh.

³⁰ Kumpăn bơh n'gor Kitim mra tâm lơh đah păng yor ri păng klach ngăn rŭch plơ̆ jêh ri ji nuih ngăn ƀư nau tâm rdâng đah nau tâm rnglăp kloh ueh. Hađăch nây mra plơ̆ sĭt jêh ri yô̆ ma phung chalơi nau tâm rnglăp kloh ueh.

³¹ Phung tahan yor ma hađăch nây njuăl hăn gŭ jêh ri ƀư ƀơ̆ pôih kloh ueh. Khân păng chalơi nhhơr ndơ ƀư brah gŭch ƀaƀơ jêh ri ndâk njêng nau ƀơ̆ ăn jêng rngot njăp.

³² Păng sŏk nau ngơi njŭng dak sŭt ndơm phung rlau nau tâm rnglăp; ƀiălah phung gĭt năl Brah Ndu mra ƀư ngăn yơh tâm rdâng.

³³ Lĕ phung gĭt blau tâm phung ƀon lan mra ntĭm nti âk bunuyh, nđâp lah tâm du năng ƀât lât, khân păng mra chôt prah yor ma đao jêh ri yor ŭnh hit, yor nau jêng bu nă jêh ri ma nau mra pit in.

³⁴ Tâm dôl khân păng chôt prah, khân păng dơn nau kơl geh djê̆ ngăn, ƀiălah geh âk bunuyh nau mƀruh ndơm tĭng khân păng.

³⁵ Ƀaƀă tâm phung gĭt mĭn mra tŭp gay yor ma nây dơi jut lơi nau ƀơ̆, ƀư kloh jêh ri tho nglang ăn rnôk nglĕ dŭt, yorlah hôm gŭ kâp kŏ tât mông tâm nal jêh.

³⁶ Hađăch mpeh pa lơ mra ƀư tĭng nâm păng ŭch, păng mra n'hao êng păng nơm, yơk păng nơm ta klơ lơn ma lĕ rngôch brah. Păng mra ngơi nau sưr tâm rdâng đah Brah Ndu ma lĕ rngôch brah. Păng mra dơi kŏ tât lôch nau ji nuih, yorlah moh nau Brah Ndu lĕ nal pôri mra dơi ƀư ngăn.

³⁷ Hađăch nây mâu mra chrê ôh ma phung brah phung chô yau păng mâu lah brah phung bu ur rŏng. Păng mâu mra uănh lĕ brah jêng khlay ôh; yorlah n'hao êng păng nơm klơ lơn ma lĕ rngôch.

³⁸ Ntrok ta nây, păng yơk mbah ma brah lĕ pôih. Păng sŏk mah, prăk, lŭ khlay jêh ri lĕ ndơ khlay nhhơr ma brah chô yau păng mâu gĭt năl ôh.

³⁹ Păng mra đă brah phung bu năch gay ma pit in lĕ pôih nâp. Mbu nơm dơn păng jêng hađăch mra dơi ăn nau ndrŏng kuăng, ăn nau dơi chiă uănh âk huy lơn jêh ri dơi tâm pă neh jêng nau nkhôm kan.

⁴⁰ Ta rnôk nglĕ dŭt, hađăch mpeh pa dâng mra hăn tâm lơh đah hađăch mpeh pa lơ. Ƀiălah hađăch mpeh pa lơ djôt ndeh seh, phung tahan ncho seh jêh ri âk kumpăn hăn tâm lơh nâm bu phŭt chuănh. Hađăch nây hôm e hăn lơh lĕ bri dak, ler nâm bu dak lip.

⁴¹ Păng mra lăp tâm ban lĕ tâm n'gor bri chrêk rmah. Geh âk rbăn bunuyh mra cha lôt khĭt, ƀiălah phung ƀon lan Êđôm, phung Môap jêh ri du phung gĭt blau tâm ƀon lan n'gor Ammôn mra klaih bơh ti hađăch nây.

⁴² Hađăch nây mra yơr ti ta klơ lĕ bri dak, nđâp ma Êjipt ăt mâu klaih ôh.

⁴³ Păng mra dơi chiă uănh lĕ ngih drăp mah prăk jêh ri lĕ rngôch ndơ khlay n'gor Êjipt. Phung Libi jêh ri phung Êthiôpi nchuăt tĭng hađăch nây da dê.

⁴⁴ Ƀiălah nau mhe mham tă mpeh luh nar jêh ri mpeh pa lơ mra ƀư ăn ma hađăch rŭng răng. Păng mra ji nuih ngăn leo tahan hăn ƀư rai jêh ri ƀư rai roh âk bunuyh.

⁴⁵ Păng mra rdâk ngih bok ngih hađăch păng ta vah vang ta nklang dak mƀŭt jêh ri ta yôk kloh ueh chrêk rmah. Ƀiălah mrô nar nglĕ dŭt păng mra tât mâu geh du huê nơm sâm kơl ôh.”