Daniel 10 - Nau Brah Ndu Ngơi 2023

Nau Y-Daniel tâm saơ nglĕ dŭt: Păng nsoh ao mhay

¹ Năm rơh pe rnôk rô̆ hađăch Sirus chiă uănh, bri dak Persi, geh du nau tâm mpơl ma Y-Daniel, ntơ amoh Y-Beltisasar. Nau nây nanê̆ ngăn, mbơh ma nau tâm lơh toyh. Y-Daniel gĭt rbăng nau nây jêh ri gĭt năl nau khlay ma nau tâm saơ nây.

² Rnôk nây gâp, jêng Y-Daniel, gŭ rngot klâng lĕ pe pơh.

³ Gâp mâu sa ndơ kah ôh, mâu lĕ chiăm puăch jêh ri ndrănh, mâu lĕ gâp mhĭng dak ƀâu kah dôl tâm lĕ pe pơh nây.

⁴ Ta nar bar jât ma puăn khay nguay, dôl gâp gŭ ta kơh dak krong toyh, nây jêng dak krong Tigris.

⁵ Gâp n'gơr măt uănh aơ geh du huê bunuyh nsoh ao mhay, vân rse bŭt ma mah kloh bơh n'gor Uphas.

⁶ Săk jăn păng tâm ban ma lŭ khlay bêril, muh măt păng chrat nâm bu lơp, bar măt păng tâm ban ma mpiăt ŭnh hit, kôp ti jêh ri kôp jâng păng tâm ban ma kông tho chrêk, jêh ri nteh bâr ngơi nâm bu nteh phung âk.

⁷ Gâp, Y-Daniel, knŏng du huê gâp saơ nau tâm saơ nây. Lĕ phung bunuyh gŭ ndrel ma gâp nđâp lah mâu saơ ôh nau tâm saơ, ƀiălah khân păng klach râm sâr, nchuăt du gay joi ntŭk krap săk khân păng nơm.

⁸ Pôri, hôm gâp du huê gŭ êng jêh ri saơ nau tâm saơ toyh nây. Gâp mâu hôm geh nau ktang ôh. Muh măt gâp êr tâm ban bunuyh dăch khĭt. Gâp hŏ huăr ngăn jêh.

⁹ Ƀiălah gâp ăt hôm tăng bâr păng lah. Mhe tăng bâr păng, gâp khĭt huăr, chŭn muh măt ta neh.

¹⁰ Rnôk nây, geh du mpang ti pah ta gâp, rdâk gâp dâk tơlah kômâk jêh ri ti gâp râm sâr.

¹¹ Păng lah ma gâp: “Ơ Y-Daniel, nơm geh nau rŏng ngăn, ăn may gĭt nanê̆ nau gâp ngơi ma may. Dâk ăn sŏng yorlah aƀaơ gâp njuăl tât ndrel may.” Tơlah may ngơi jêh ma gâp nau nây, gâp dâk râm sâr.

¹² Păng lah ma gâp: “Ơ Y-Daniel, lơi klach ôh. Ntơm bơh nar nôk lor lơn, may geh nuih n'hâm ŭch gĭt rbăng jêh ri ntrŭnh êng may nơm tanăp Brah Ndu may, pôri Păng tăng lĕ nau may ngơi, jêh ri gâp văch jêh yor nau may ngơi nây.

¹³ Kôranh phung hađăch Persi hŏ buay jêh gâp tâm bar jât ma nguay nar. Ƀiălah Mikel, du huê tâm phung kôranh tông mpăr, hŏ văch kơl gâp, jêh ri gâp gŭ ta nây ndrel ma phung hađăch Persi.

¹⁴ Aƀaơ, gâp văch gay ăn may gĭt rbăng nau mra tât ma phung ƀon lan may tâm nar nglĕ dŭt, yorlah aơ jêng nau tâm saơ di ma lĕ nar dăch tât.”

¹⁵ Tâm dôl păng ngơi ma gâp lĕ nau nây, gâp chŭn măt ta neh jêh ri jêng mlo.

¹⁶ Aơ, geh du huê nơm săk jăn tâm ban ma lĕ kon bunuyh văch pah mbung gâp. Gâp hă trôm mbung ro jêh ri dơi ngơi. Gâp lah ma nơm gŭ tanăp gâp: “Ơ kôranh, nau tâm saơ ƀư ma gâp ji ngăn jêh ri gâp hŏ huăr ngăn jêh.

¹⁷ Mâm ƀư oh mon kôranh gâp dơi ngơi ma kôranh? Yorlah aƀaơ aơ mâu hôm geh nau ktang ôh, mâu lĕ hôm geh n'hâm nsôr tâm gâp đŏng ôh!”

¹⁸ Rnôk nây, nơm geh săk jăn tâm ban bu klâu pah ta gâp jêh ri ntop nau ktang ăn ma gâp.

¹⁹ Păng lah ma gâp: “Ơ nơm bu rŏng ngăn, lơi klach ôh. Gŭ đăp mpăn hom jêh ri nâp nuih n'hâm! Nâp hom nuih n'hâm!” Tơlah păng dôl ngơi ma gâp, geh ntop n'hâm suan gâp jêh ri lah: “Ơ kôranh, ăn may ngơi hom, yorlah may jêng n'hâm suan ma gâp.”

²⁰ Păng lah: “May gĭt lĕ mâm gâp văch ma may? Aƀaơ aơ gâp mra plơ̆ đŏng gay tâm lơh đah kôranh n'gor bri Persi, jêh ri tơlah mbăt gâp hăn pôri kôranh n'gor Grek mra tât.

²¹ Ƀiălah gâp mra mbơh ma may nau bu nchih jêh tâm ndrom samƀŭt nau ngăn. Mâu geh nơm kơl gâp gay ma tâm rdâng đah khân păng, knŏng du huê Mikel, tông mpăr khân may.”