Daniel 1 - Nau Brah Ndu Ngơi 2023

Nau ngơi gleh ( 1:1-21 ) Y-Daniel jêh ri pe bunuyh mĭt jiăng ta bri Babilôn

¹ Tâm năm tal pe rnôk rô̆ hađăch Jêhôjakim phung Yuđa, hađăch Babilôn jêng Y-Nêbukatnetsar văch nchueng jŭm ƀon Yêrusalem.

² Kôranh Brah jao Y-Jêhôjakim, hađăch bri Yuđa, jêh ri ƀaƀă ndơ dŏng tâm ngih Brah Ndu tâm ti hađăch Nêbukatnetsar. Hađăch aơ djôt lĕ ndơ nây nglăp ta ngih brah păng tâm bri Sinar, jêh ri ăn tâm jay drăp brah păng.

³ Hađăch ntăm ma Y-Aspênas, kôranh toyh kôranh bu char, njŭn tât phung ƀaƀă kon sau Israel jêng bơh ndŭl mpôl hađăch jêh ri phung ndrŏng.

⁴ Lĕ phung bu klâu ndăm aơ jêng phung mâu geh ntŭk kuet ôh, muh măt ueh, geh âk nau njêh, blau mĭn tâm lĕ rngôch, geh nau gĭt mĭn huy jêh ri gĭt rbăng, geh nau blau ngăn pah kan tâm ngih hađăch. Y-Aspênas sâm nti ma khân păng nau ngơi ueh jêh ri nau ngơi phung Kaldê.

⁵ Hađăch prăp du kô̆ ndơ sa ăp nar ma khân păng, tă bơh kô̆ ndơ sa kah hađăch sông sa jêh ri ndrănh hađăch nhêt. Lôch jêh pe năm siăm ntĭm nti nâm bu pônây, khân păng mra dâk pah kan tanăp hađăch.

⁶ Tâm phung bu klâu ndăm nây geh Y-Daniel, Y-Hanania, Y-Misaêl jêh ri Y-Asaria jêng phung bơh noi deh Yuđa.

⁷ Kôranh chiă uănh phung kôranh bu char ntơ amoh mhe ăn ma khân păng: Y-Daniel jêng Y-Beltisasar; Y-Hanania jêng Y-Sadrăk; Y-Misaêl jêng Y-Mêsăk jêh ri Y-Asaria jêng Y-Abetnêgô.

⁸ Ƀiălah Y-Daniel ton tâm nuih n'hâm mâu ăn ƀơ̆ ôh păng nơm yor ndơ sông sa kah hađăch sa jêh ri ndrănh hađăch nhêt, yor nây dăn ma kôranh chiă uănh phung kôranh bu char lơi ta ƀư ƀơ̆ khân păng ôh.

⁹ Brah Ndu ƀư ma kôranh chiă uănh phung kôranh bu char geh nau rŏng jêh ri nau yô̆ ma Y-Daniel.

¹⁰ Ƀiălah, kôranh aơ lah ma Y-Daniel: “Gâp klach hađăch jêng kôranh gâp, nơm ntăm jêh prăp ndơ nhêt sa ma khân may. Tơlah hađăch saơ muh măt khân may rgay rdjoh lơn ma phung bu klâu ndăm ndrel năm, pôri mâu di khân may njŭn jêh bôk gâp ma hađăch hĕ?”

¹¹ Y-Daniel lah ma nơm mât mray jêng nơm kôranh chiă uănh phung kôranh bu char ăn nau kan uănh phung Y-Daniel, Y-Hanania, Y-Misaêl jêh ri Y-Asaria pô aơ:

¹² “Gâp vơl dăn ma may rlong uănh hom phung oh mon may tâm jât nar; knŏng ăn hên sa biăp jêh ri nhêt dak.

¹³ Jêh ta nây, ăn may sek tâm rđĭl săk jăn hên jêh ri săk jăn phung bu klâu ndăm sa ndơ kah hađăch ăn; jêh nây may sek uănh phung oh mon may tĭng nâm nau may saơ.”

¹⁴ Bunuyh nây dơn nau dăn nây jêh ri rlong uănh khân păng tâm jât nar.

¹⁵ Lôch jât nar jêh, săk jăn khân păng ueh lơn, lay lơn ma lĕ rngôch phung bu klâu ndăm sa ndơ kah hađăch ăn.

¹⁶ Yor ri, nơm mât mray sŏk sĭt lơi ndơ sông sa kah jêh ri ndrănh khân păng, knŏng ăn khân păng sa knŏng trao dơm.

¹⁷ Brah Ndu ăn ma puăn nuyh bu klâu ndăm aơ geh nau gĭt rbăng jêh ri nau blau ngăn gĭt rbăng lĕ rngôch nau ngơi ueh ndrel nau blau mĭn. Êng ma Y-Daniel geh nau gĭt rbăng ma lĕ nau tâm saơ jêh ri nau mbơi.

¹⁸ Tât rnôk hađăch tâm nal jêh mra mpơl khân păng, nơm chiă uănh phung kôranh bu char njŭn leo khân păng tanăp Y-Nêbukatnetsar.

¹⁹ Hađăch ngơi ndrel đah khân păng jêh ri saơ tâm lĕ rngôch phung khân păng mâu saơ du huê ôh tâm ban ma Y-Daniel, Y-Hanania, Y-Misaêl, jêh ri Y-Asaria. Yor nây, khân păng gŭ pah kan tanăp hađăch.

²⁰ Dôl hađăch ôp khân păng ma lĕ rngôch nau ôp ma nau blau mĭn nau gĭt rbăng, pôri saơ khân păng blau lơn jât tơ̆ ma phung ƀŭk rƀên jêh ri phung kôranh n'hŭm tâm lĕ ƀon bri hađăch păng nơm.

²¹ Yor nau nây, Y-Daniel ăt gŭ ta nây kŏ tât năm tal nguay hađăch Sirus chiă uănh.