Bu ur Rut 4 - Nau Brah Ndu Ngơi 2023

Y-Bôas nđăp H'Rut

¹ Y-Bôas hăn tât ma mpông ƀon jêh ri gŭ ta nây. Aƀaơ, nơm geh nau dơi chuai drăp ndơn, nơm Y-Bôas hŏ lah jêh mhe hăn rgăn ta nây. Y-Bôas lah: “Hơi mĭt jiăng, veh gŭ hom ta aơ.”

² Jêh nây, Y-Bôas săch jât nuyh tâm phung kôranh bu ranh tâm ƀon jêh ri lah: “Gŭ hom ta aơ.” Phung kôranh bu ranh gŭ da dê.

³ Y-Bôas lah ma nơm geh nau dơi chuai drăp ndơn: “H'Naômi plơ̆ sĭt jêh bơh bri Môap, ŭch tăch du lôk neh Y-Êlimêlek jêng nâu he.

⁴ Gâp ŭch mbơh nau nây ma may gĭt. Pônây tanăp măt phung gŭ ta aơ jêh ri tanăp măt phung kôranh bu ranh phung ƀon lan gâp, dăn may rvăt hom drăp ndơn nây. Tơlah may ŭch tâm chuai drăp ndơn nây pôri chuai hom; tơlah mâu ŭch ôh, nkoch hom ăn gâp gĭt. Yorlah panăp may mâu hom geh ôh nơm êng dơi tâm chuai păng jêh ri pakơi may gâp jêng nơm chuai păng.” Păng lah: “Gâp mra chuai.”

⁵ Ƀiălah Y-Bôas lah tay: “Nar may rvăt mir bơh ti H'Naômi, may mra rvăt H'Rut tâm ban lĕ, bu ur Môap, ur bunuyh drô, gay ntrok noi bunuyh drô ta drăp ndơn păng.”

⁶ Nơm geh nau dơi chuai drăp ndơn plơ̆ lah: “Tơlah pônây gâp mâu dơi ôh tâm chuai păng ma gâp nơm, klach lah gâp ƀư nau mhĭk ma drăp ndơn gâp. Dăn ma may chuai drăp ndơn nây ntrok an ma gâp yorlah gâp mâu dơi ôh tâm chuai păng.”

⁷ Rnôk kăl e, tâm phung Israel geh nau vay ma nau tâm chuai tay mâu lah nau tâm rgâl kơt aơ: Gay gǐt n'hêl ngăn nau tâm plăch tâm rgâl aơ, du huê aơ doh ntâu jot păng jêh ri ăn ma nơm ri. Aơ jêng nau mbơh ăn nanê̆ tâm phung ƀon lan Israel.

⁸ Pônây nơm geh nau dơi chuai drăp ndơn lah ma Y-Bôas pô aơ: “Dăn may chuai drăp ndơn nây.” Jêh nây nơm nây doh ntâu jot păng.

⁹ Nôk nây, Y-Bôas lah ma phung kôranh bu ranh jêh ri ma lĕ rngôch ƀon lan: “Nar aơ, khân may jêng phung râng an ma gâp rvăt jêh bơh ti H'Naômi lĕ rngôch drăp ndơ Y-Êlimêlek, jêh ri lĕ rngôch ndơ ƀaƀă ma Y-Kiliôn jêh ri Y-Mahlôn

¹⁰ jêh ri sŏk đŏng H'Rut bu ur Môap, ur Y-Mahlôn, jêng ur gâp, gay ndray amoh nơm khĭt jêh tâm drăp ndơn păng, gay ma amoh nơm khĭt jêh mâu roh ôh ta nklang phung oh nâu khân păng jêh ri ƀon tơm păng. Nar aơ khân may jêng phung râng an ma nau nây.”

¹¹ Lĕ rngôch phung ƀon lan gŭ ta mpông ƀon jêh ri phung kôranh bu ranh lah: “Hên jêng phung râng an ma nau nây. Dăn ma Brah Yêhôva ăn bu ur hăn lăp tâm ngih may tâm ban ma H'Rachel jêh ri H'Lêa jêng bar hê khân păng ndâk njêng jêh ngih Israel! Dăn may ăn nau geh jêng tâm bri Êphrata jêh ri geh nau lư n'găr ta Ƀêtlêhem!

¹² Dăn Brah Yêhôva ăn ma noi deh may yor bơh bu ur mom aơ mra ƀư ăn ma ngih may tâm ban ma ngih Y-Pêres nơm H'Tamar hŏ deh ma Y-Yuđa!”

¹³ Pônây, Y-Bôas sŏk H'Rut jêng ur păng. Nôk khân păng gŭ nsum, Brah Yêhôva ăn ma păng ntreo jêh ri deh ma du huê kon bu klâu.

¹⁴ Phung bu ur tâm ƀon lah ma H'Naômi: “Tâm rnê ma Brah Yêhôva! Nar aơ Păng mâu dun ôh ăn ma ay du huê kon bu klâu, geh nau dơi chuai drăp ndơn. Ăn amoh păng geh nau lư n'găr tâm bri Israel!

¹⁵ Oh bê nây mra bonh leng nuih n'hâm ay, siăm rong ay dôl ay ranh, yorlah ƀăn ay hŏ deh an ma ay. Ƀăn ay jêng khlay lơn pơh nuyh kon bu klâu ay.”

¹⁶ H'Naômi ra-u oh bê nây tâm ntang ntơh păng jêh ri mât mray păng.

¹⁷ Phung bu ur chiau meng tâm amoh păng jêng Y-Ôbet jêh ri lah: “Du huê oh bê bu klâu hŏ deh ăn ma H'Naômi.” Y-Ôbet jêng mbơ̆ Yêsê, che Y-Đavit.

¹⁸ Aơ jêng noi deh Y-Pêres: Y-Pêres jêng mbơ̆ Y-Hêsron.

¹⁹ Hêsron jêng mbơ̆ Y-Ram; Y-Ram jêng mbơ̆ Y-Aminadap;

²⁰ Y-Aminadap jêng mbơ̆ Y-Nahsôn; Y-Nahsôn jêng mbơ̆ Y-Salmôn;

²¹ Y-Salmôn jêng mbơ̆ Y-Bôas; Y-Bôas jêng mbơ̆ Y-Ôbet;

²² Y-Ôbet jêng mbơ̆ Y-Yêsê jêh ri Y-Yêsê jêng mbơ̆ Y-Đavit.