Bu ur Rut 3 - Nau Brah Ndu Ngơi 2023

H'Rut ta ntŭk mprah ba

¹ H'Naômi, po H'Rut, lah ma păng: “Ơ kon bu ur gâp, ăn gâp joi ma ay du ntŭk ueh gay ma ay gŭ maak.

² Y-Bôas geh phung kơl kan bu ur ƀiălah ay hŏ hăn groi khân păng gay mban ba, mâu di hĕ Y-Bôas jêng ndŭl mpôl he? Măng aơ păng mra hăn mpruh ba ôrgơ ta ntŭk mprah ba.

³ Pônây ăn ay ŭm rao hom, mhĭng dak ƀâu kah jêh ri nsoh kho ao ueh lơn jêh nây hăn trŭnh ma ntŭk mprah ba, ƀiălah lơi ăn ôh păng gĭt năl ay tât lôch sông sa jêh ri nhêt.

⁴ Nôk păng lâng bê̆ch, kâp uănh ntŭk păng bê̆ch jêh nây hăn pơk phôi ta jâng păng jêh ri ăn ay bê̆ch. Păng nơm yơh mra lah ma ay nau ay mra ƀư.”

⁵ Păng plơ̆ lah: “Gâp mra ƀư lĕ nau ay ntĭnh.”

⁶ Pônây păng hăn ma ntŭk mprah ba jêh ri ƀư di tĭng nâm po păng hŏ ntĭnh jêh.

⁷ Tơlah jêh Y-Bôas nhêt sa, nuih n'hâm păng maak. Jêh ri păng hăn bê̆ch ta meng ntŭk bun ba ôrgơ. Rnôk nây H'Rut hăn djoch djoch păng pơk phôi ta jâng păng jêh ri bê̆ch.

⁸ Klong măng, Y-Bôas ndrŏt, plăch săk, păng saơ du huê bu ur bê̆ch ta jâng păng.

⁹ Y-Bôas ôp: “Mbu ay?” Păng plơ̆ lah: “Gâp jêng H'Rut, oh mon bu ur may. Dăn ma may ntâk phôi ta klơ oh mon bu ur may yorlah may geh nau dơi chuai drăp ndơn gâp.”

¹⁰ Păng plơ̆ lah: “Ơ kon bu ur gâp, dăn Brah Yêhôva ăn nau ueh uĭn ma ay! Nau ueh ay ƀư tơ̆ aơ toyh lơn tơ̆ lor nơh, yorlah ay mâu tĭng joi ôh phung bu klâu ndăm, nđâp lah o ach mâu lah ndrŏng.

¹¹ Pôri aƀaơ, hơi kon bu ur gâp, lơi klach ôh lĕ ntil nau ma ay, gâp mra ƀư an ay lĕ nau ay dăn, yorlah lĕ rngôch phung ƀon lan tâm ƀon toyh gâp gĭt da dê ma ay jêng du huê bu ur geh nau mĭn ueh.

¹² Nanê̆ ngăn gâp geh nau dơi chuai tay drăp ndơn ay, ƀiălah geh du huê ndŭl mpôl dăch lơn ma gâp.

¹³ Gŭ ta aơ măng aơ. Ôi taơ, tơlah păng ŭch chuai tay drăp ndơn hôm e jêng ueh yơh; ăn păng ƀư nau nây. Ƀiălah tơlah păng mâu ŭch ôh chuai tay drăp ndơn, gâp sŏk amoh Brah Yêhôva gŭ rêh mro mrăng gay ton pô aơ, nanê̆ gâp mra chuai tay drăp ndơn ay! Bê̆ch hom ta aơ kŏ tât ôi.”

¹⁴ Pônây păng bê̆ch ta jâng păng tât ang jêh ri dâk ơm ôi gay bah bu gĭt, yorlah Y-Bôas mĭn tâm nuih n'hâm pô aơ: “Lơi ăn bu gĭt ôh ma du huê bu ur văch jêh ma ntŭk mprah ba.”

¹⁵ Păng lah đŏng: “Sŏk ndơ̆ hom ao jâr ay nsoh nây jêh ri kuăn ăn nâp.” Păng ndơ̆ ao jâr nây, păng nhueh jêh ri păng troch prao ra-i ba ôrgơ. Jêh nau nây, Y-Bôas plơ̆ sĭt ma ƀon toyh.

¹⁶ Tơlah H'Rut hăn plơ̆ sĭt ta ngih po păng. Păng ôp: “Moh nau tât jêh ma ay, kon bu ur gâp?” H'Rut nkoch bri ma păng lĕ nau Y-Bôas ƀư ma păng.

¹⁷ Păng lah: “Păng ăn ma gâp bar jât ra-i ba ôrgơ jêh ri lah pô aơ: ‘Ay lơi hăn sĭt ti dơm ôh ma me sai ay’”

¹⁸ H'Naômi ngơi: “Aơ kon bu ur gâp, gŭ kâp hom gay uănh moh nau mra jêng, yorlah bu klâu nây mâu đăp gŭ ôh ƀiălah păng mra nkra lôch ro nau aơ tâm nar aơ.”