Bu ur Rut 2 - Nau Brah Ndu Ngơi 2023

H'Rut hăn mban ba

¹ H'Naômi geh du huê mpôl băl mpeh sai păng amoh Y-Bôas, du huê bu klâu geh nau kan toyh jêh ri ndrŏng, tâm ndŭl mpôl Y-Êlimêlek.

² H'Rut, bu ur Môap, lah ma H'Naômi: “Ăn gâp hăn luh ta mir mban ba. Gâp mra hăn tĭng pakơi nơm geh nuih n'hâm ueh ăn ma gâp mban.” H'Naômi plơ̆ lah: “ơ kon, ay hăn hom!”

³ Pônây H'Rut hăn. Păng tât jêh ri mban ba tâm mir tĭng pakơi phung rek. Păng lap ngăn hăn di ta lôk mir Y-Bôas, nơm jêng ndŭl mpôl Y-Êlimêlek.

⁴ Nôk nây, Y-Bôas hăn tă bơh Ƀêtlêhem. Păng mbah ma phung rek: “Mbơh sơm Brah Yêhôva gŭ ndrel ma khân may!” Khân păng plơ̆ lah: “Dăn ma Brah Yêhôva ăn nau ueh uĭn ma may!”

⁵ Y-Bôas ôp ma oh mon mât uănh phung rek pô aơ: “Mbu moh kon bu druh nây?”

⁶ Oh mon mât uănh phung rek plơ̆ lah: “Păng jêng bu ur ndrô Môap, nơm sĭt ndrel ma H'Naômi bơh bri Môap.

⁷ Păng lah ma hên pô aơ: ‘Dăn ăn ma gâp hăn tĭng pakơi lĕ phung rek gay mban jêh ri dônh lĕ nkong ba.’ Păng tât ntơm bơh ơm ôi jêh ri gŭ mban tât aƀaơ ri, knŏng rlu ƀât lât tâm ndưp.”

⁸ Y-Bôas lah ma H'Rut: “Ơ kon bu ur gâp, iăt hom! Lơi hăn mban tâm lôk mir êng jêh ri lơi trơn bơh ntŭk aơ. Gŭ dăch hom ndrel phung oh mon bu ur gâp

⁹ jêh ri uănh moh lôk mir khân păng rek, hăn hom groi pakơi khân păng. Gâp lĕ buay jêh ma phung oh mon gâp lơi ta nkhêch lôr ay. Tơlah ay ji hir dak, văch hom nhêt dak tâm lĕ yăng phung oh mon gâp lĕ rơm jêh.”

¹⁰ H'Rut chon mon ta neh jêh ri ơh: “Mâm gâp dơi geh nau yô̆ tanăp măt may ƀư ăn may mĭn rvê ma gâp yorlah gâp jêng du huê bu năch?”

¹¹ Y-Bôas lah: “Bu nkoch jêh ma gâp tăng lĕ rngôch nau ay ƀư jêh ma po ay ntơm bơh sai ay khĭt, jêh ri nau ay chalơi mê̆ mbơ̆ ay, bri ay nơm gay hăn văch ma du phung ƀon lan ay mâu gĭt lor ôh.

¹² Dăn Brah Yêhôva nsĭt lah nau ay hŏ ƀư jêh. Dăn ma Păng ăn nau nkhôm ma ay rmeh ler yorlah ay hŏ văch jêh gay nde tâm dâng năr Yêhôva Brah Ndu phung Israel.”

¹³ H'Rut ơh pô aơ: “Ơ kôranh! Dăn ăn gâp geh nau yô̆ tra năp kôranh yorlah kôranh hŏ bonh leng jêh ri ngơi ma bâr rah rơch ma gâp jêng oh mon bu ur kôranh, nđâp lah gâp mâu tâm ban ma phung oh mon bu ur kôranh ôh!”

¹⁴ Tât ta nôk sông sa, Y-Bôas lah ma păng: “Văch dăch ta aơ, sŏk piăng let mbŭk tâm dak srat gay sa!” Pônây păng gŭ kêng meng phung rek jêh ri păng ăn ma păng mbo vâr. Păng sa kŏ tât hơm jêh ri om ndơ hôm e rmeh đŏng.

¹⁵ Lah păng hăn dâk gay hăn mban, Y-Bôas ntĭnh ma phung oh mon: “Ăn păng mban ba, nđâp lah păng mban tâm nklang nchăp ba lơi ƀư bêk prêng ma păng ôh.

¹⁶ Rhuăt nđuh hom bar pe nkong tâm nklang nchăp ba ăn ma păng mban jêh ri lơi ta lah păng ôh.”

¹⁷ Pônây H'Rut mban ba tâm lôk mir kŏ tât kêng măng. Păng mprah ba păng mban jêh, veh klăp tâm jât kilô ba ôrgơ.

¹⁸ Păng djôt leo ba sĭt ma ƀon toyh, jêh ri po păng saơ ba păng mban jêh. H'Rut sŏk đŏng ndơ sa hôm e rmeh têm ăn ma po păng.

¹⁹ Po păng ôp: “Ntŭk ay mban ba nar aơ? Ntŭk ay kan? Nau ueh uĭn ngăn ma nơm meng ma ay!” Păng nkoch tay ma po păng gĭt ntŭk păng pah kan. Păng lah: “Kôranh tâm lôk mir gâp pah kan ndrel nar aơ amoh Y-Bôas.”

²⁰ H'Naômi lah ma ƀăn păng pô aơ: “Dăn ma Brah Yêhôva ăn nau ueh uĭn ma Y-Bôas yorlah Păng mâu blau dŭt ăn nau yô̆ ma phung rêh jêh ri phung khĭt!” H'Naômi lah tay: “Bu klâu nây jêng ndŭl mpôl đah he, jêng du huê tâm phung geh nau dơi chuai drăp ndơn bơh he.”

²¹ H'Rut bu ur Môap lah tay: “Păng lah đŏng ma gâp pô aơ: ‘Gŭ dăch hom ma phung oh mon gâp kŏ tât lôch yan rek.’”

²² H'Naômi lah ma H'Rut, ƀăn păng pô aơ: “Hơi kon bu ur gâp, ueh ngăn ma ay hăn tĭng phung oh mon bu ur păng, yorlah klach lah ay mra tâm mâp đah nau uh ah tơlah ay mban tâm mir bunuyh êng.”

²³ Pônây H'Rut gŭ dăch đah phung oh mon bu ur Y-Bôas gay mban ba tât lôch yan rek ba ôrgơ jêh ri ba ƀlê. Păng gŭ ndrel ma po păng.