Bu ur Rut 1 - Nau Brah Ndu Ngơi 2023

H'Naômi jêh ri H'Rut

¹ Tâm rnôk phung kôranh phat dôih, geh nau tât ji ngot hâu tâm bri nây. Geh du huê bu klâu bơh Ƀêtlêhem tâm bri Yuđa ndrel ma ur păng jêh ri bar hê kon bu klâu păng hăn tât gŭ ƀât lât tâm bri Môap.

² Bunuyh aơ amoh Y-Êlimêlek, ur păng amoh H'Naômi, bar hê kon bu klâu amoh Y-Mahlôn jêh ri Y-Kiliôn; lĕ rngôch khân păng jêng phung Êphrata bơh Ƀêtlêhem tâm bri Yuđa. Khân păng hăn tât ta bri Môap jêh ri gŭ rêh ta nây.

³ Nôk nây, sai H'Naômi jêng Y-Êlimêlek, khĭt jêh ri hôm păng ndrel ma bar hê kon bu klâu păng.

⁴ Bar hê kon bu klâu nây nđăp ur đah phung Môap. Du huê amoh H'Ôrpa, du huê êng amoh H'Rut. Khân păng gŭ ta nây klăp lah jât năm.

⁵ Jêh nau nây, Y-Mahlôn jêh ri Y-Kiliôn khĭt đŏng, hom e du huê H'Naômi, sai păng khǐt, bar hê kon bu klâu păng khǐt đŏng.

⁶ Nôk nây, dôl hôm gŭ ta bri Môap, H'Naômi tăng pô aơ Brah Yêhôva khâl jêh ma phung ƀon lan Păng jêh ri ăn ndơ sông sa ma khân păng rĭ dĭng păng ndrel ma bar hê ƀăn păng ntơm du luh bơh bri Môap sĭt ma bri păng nơm.

⁷ Pônây, păng du luh bơh ntŭk păng dôl gŭ, ndrel ma bar hê ƀăn păng hăn trong plơ̆ sĭt ma bri Yuđa.

⁸ Ƀiălah H'Naômi lah ma bar hê ƀăn păng pô aơ: “Hăn hom, ăp nơm khân ay sĭt ma ngih mê̆ khân ay. Dăn Brah Yêhôva mpơl nau ueh ma khân ay, tâm ban khân ay hŏ mpơl nau ueh jêh ma gâp jêh ri đah bar hê drô kon gâp.

⁹ Dăn ma Brah Yêhôva ăn khân ay dơi geh nau đăp mpăn tâm ngih sai mhe khân ay!” Jêh nây păng ut chŭm bar hê ƀăn păng jêh ri khân păng nhhiăng nhĭm.

¹⁰ Khân păng lah: “Hên mra hăn ndrel ma ay plơ̆ sĭt ma phung ƀon lan ay.”

¹¹ H'Naômi plơ̆ lah: “Hơi bar ƀăn gâp, plơ̆ sĭt hom lơi hăn ndrel ma gâp ôh? Ngă gâp hôm geh kon bu klâu dĭng ma khân păng jêng sai ma khân ay?

¹² Hơi bar ƀăn gâp, plơ̆ sĭt hom! Gâp ranh jêh, mâu hôm dơi geh sai ôh. Tơlah gâp geh nau kâp gân, nđâp lah gâp geh sai măng aơ jêh ri mra deh ma phung kon bu klâu,

¹³ mâm dĭng đă khân ay kâp tât khân păng văch ma toyh? Mâm dĭng khân ay mâu sŏk sai êng? Mâu ôh, hơi bar ƀăn gâp, nau rngot gâp âk lơn đah nau rngot khân ay, yorlah ti Brah Yêhôva hŏ ăn nau tât ma gâp.”

¹⁴ Jêh nây khân păng nhhiăng nhĭm đŏng. H'Ôrpa chŭm tâm nkhah đah po păng, ƀiălah H'Rut mâu ŭch nkhah ôh đah po păng.

¹⁵ H'Naômi lah ma H'Rut: “Aơ, yuh ay plơ̆ sĭt jêh ma ƀon lan păng jêh ri phung brah păng. Sĭt hom kơt yuh ay!”

¹⁶ Ƀiălah H'Rut ơh: “Lơi nchâp gâp chalơi ay Mâu lah ndôn plơ̆ sĭt! Ntŭk mê̆ hăn kon tǐng hăn ta nây; Moh ntŭk mê̆ gŭ kon mra gŭ ta ntŭk nây đŏng. Phung ƀon lan ay jêng phung ƀon lan gâp; Brah Ndu ay mra jêng Brah Ndu gâp.

¹⁷ Ta moh ntŭk mê̆ khĭt, gâp ŭch khĭt đŏng Jêh ri bu tâp gâp ta ntŭk nây. Knŏng nau khĭt dơm, Lah geh nau êng ƀư ăn gâp tâm nkhah mê̆, Dăn Brah Yêhôva ăn nau tât ta gâp!”

¹⁸ H'Naômi saơ păng ŭch hăn tĭng ngăn pôri păng mâu hôm ngơi ôh.

¹⁹ Pônây bar hê khân păng hăn tât ta Ƀêtlêhem. Tơlah khân păng tât ma Ƀêtlêhem, lĕ rngôch phung ƀon lan nây ndrŏt nuih n'hâm. Phung bu ur ôp: “Di lĕ ay jêng H'Naômi?”

²⁰ Păng plơ̆ lah ma khân păng: “Lơi kuăl gâp jêng H'Naômi ôh Kuăl hom gâp jêng H'Mara, Yorlah Nơm Geh Lĕ Nau Brah ƀư jêh ăn gâp geh âk nau rngot.

²¹ Gâp hăn luh ndrel ma drăp ndơ bêng ler, Ƀiălah Brah Yêhôva njŭn gâp sĭt ti dơm. Brah Yêhôva tâm rdâng jêh đah gâp Jêh ri Nơm Geh Lĕ Nau Brah ƀư ăn gâp geh âk nau rêh ni. Mâm ƀư khân ay hôm kuăl gâp H'Naômi?”

²² Tâm ban pônây H'Naômi ndrel ma ƀăn păng jêng H'Rut, bu ur Môap, plơ̆ sĭt tă bơh bri Môap. Bar hê khân păng hăn tât ma Ƀêtlêhem ta yan bu ntơm kăch rek ba ôrgơ.