Amôt 9 - Nau Brah Ndu Ngơi 2023

Nau tâm saơ ma nau phat dôih Israel

¹ Gâp saơ Kôranh Brah dâk ta êp nơng ƀư brah jêh ri lah pô aơ: “Dong hom ta lĕ chiông meh n'gâng Gay n'gơ lĕ ntơng mpông; Mbang rlâm hom lĕ rup ta klơ bôk khân păng! Mbu nơm phung hôm klen Gâp mra nkhĭt ma đao Mâu geh ôh du huê tâm phung khân păng nchuăt du, Mâu geh ôh du huê tâm phung khân păng dơi klaih.

² Nđâp tơlah khân păng kuyh neh lăp jŭr tâm ƀon phung khĭt Ti Gâp mra nklĕ ngluh khân păng; Nđâp tơlah khân păng hao ta klơ trôk Gâp mra ntrŭnh khân păng.

³ Nđâp tơlah khân păng du krap tâm n'gơn yôk Karmel Gâp ăt mra hăn joi gay nhŭp khân păng; Nđâp tơlah khân păng pôn tâm dâng dak mƀŭt Gâp mra đă bêh dak mƀŭt chôk khân păng ta nây.

⁴ Nđâp tơlah khân păng hăn jêng bu nă Ta nây, Gâp mra ntĭnh ma đao, hăn nkhĭt lơi khân păng. Nanê̆ ngăn măt Gâp mra gŭ uănh khân păng Gay ƀư nau mhĭk mâu di nau ueh ôh.”

⁵ Yorlah Kôranh Brah jêng Brah Yêhôva ma phung tahan, Nơm pah bi neh ntu jêh ri păng lêk hoch, Lĕ rngôch phung ƀon lan gŭ tâm păng mra nhĭm vơl; Lĕ bri dak mra hao lip ler nâm bu dak krong Nil Jêh ri djoh hŭch nâm bu dak krong n'gor bri Êjipt

⁶ Kôranh Brah hŏ ndâk jrô Păng tâm lĕ ndâr trôk, Jêh ri ndâk rvang Păng ta klơ neh. Păng kuăl dak mƀŭt Jêh ri nkhŭt ta klơ neh. Amoh Păng jêng Brah Yêhôva.

⁷ Kôranh Brah Yêhôva lah: “Hơi phung kon sau Israel, mâu di hĕ Gâp uănh khân may nâm bu kon sau phung Êthiôpi lĕ? Mâu di Gâp ngluh khân may luh du tă bơh n'gor bri Êjipt, Phung Philistin luh bơh bri Kaptôr, Jêh ri phung Siri luh bơh bri Kir?

⁸ Aơ, trôm măt Kôranh Brah Yêhôva gŭ uănh ma ƀon bri hađăch geh nau tih aơ Jêh ri Gâp mra ƀư rai lơi khân păng bơh neh; Ƀiălah Gâp mâu mra ƀư rai ôh lĕ rngôch ngih Yakôb,” Brah Yêhôva lah kơt nây.

⁹ “Yorlah aơ, Gâp mra ntĭnh jêh ri mra ƀư nchah rai ngih Israel ta nklang lĕ rngôch mpôl băl bunuyh Nâm bu nsiăng ba ƀlê tâm dông Ƀiălah mâu geh du găr jê̆ mra tŭp ôh ta neh.

¹⁰ Lĕ rngôch phung tih tâm phung ƀon lan Gâp, Jêng phung lah pô aơ: ‘Nau mhĭk mâu mra ban tĭng he ôh’ Pôri khân păng mra khĭt ma đao.”

Nau ton njêng tay bri Israel

¹¹ “Tâm nar nây, Gâp mra ndâk tay Ngih njưh Y-Đavit lĕ rlâm jêh Jêh ri kơi nkra đŏng lĕ ntŭk rlâm rai nchah păng. Gâp mra ndâk tay lĕ ntŭk hŏ jêng rngot njăp Jêh ri ndâk tay păng nâm bu rnôk kăl e,

¹² Gay ma khân păng pit in lơi phung hôm klen tâm Êđôm Jêh ri lĕ rngôch bri dak dơi kuăl tâm amoh Gâp.” Brah Yêhôva lah; Păng yơh mra ƀư lôch lĕ ntil nau aơ.

¹³ Brah Yêhôva lah: “Aơ lĕ nar mra tât, tơlah nơm kai mra tĭng ban nơm rek, Nơm jot play krăk ƀâu tĭng ban nơm srih ntil. Phung yôk ăn truh ndrănh njŭng, Jêh ri ăp yôk mra hoch.

¹⁴ Gâp mra njŭn leo phung ƀon lan Israel Gâp plơ̆ sĭt bơh bu nă; Khân păng mra ndâk tay lĕ ƀon toyh lĕ rai jêh, jêh ri gŭ ta nây. Khân păng mra tăm đang krăk ƀâu jêh ri nhêt ndrănh păng, Khân păng mra jik mir khân păng jêh ri sa play păng.

¹⁵ Gâp mra tăm tay Israel tâm bri khân păng nơm Jêh ri bu mâu mra hôm rôk ôh khân păng bơh bri Gâp ăn jêh ma khân păng.” Brah Yêhôva jêng Brah Ndu may lah kơt nây.