Amôt 8 - Nau Brah Ndu Ngơi 2023

Nau tâm saơ ma bĭ play tơm si yan ta vai

¹ Aơ jêng nau Kôranh Brah Yêhôva tâm mpơl ma gâp saơ: Du bĭ play tơm si yan ta vai.

² Rnôk nây Păng lah: “Hơi Y-Amôt, moh may saơ?” Gâp lah: “Du bĭ play tơm si yan ta vai.” Brah Yêhôva lah tay ma gâp: “Nau nglĕ dŭt tât jêh ma phung ƀon lan Israel Gâp; Gâp mâu mra nhhuach ma khân păng ôh.

³ Tâm nar nây, lĕ nau mprơ tâm ngih brah Mra jêng nau nhĭm nhhiăng” Kôranh Brah Yêhôva lah kơt nây. “Săk jăn khĭt mra jêng âk, jêh ri lam ntŭk bu mra mƀăr khân păng ma nau klăk klêm.”

⁴ Iăt hom nau aơ! Khân may jêng phung bunuyh tŭn jot phung ndĭt trơi, Ƀư rai phung o ach tâm n'gor.

⁵ Khân may lah pô aơ: “Ndah nâm jŏ khay mhe mra lôch, Gay ma he dơi tăch lơi ba? Jêh ri ndah nâm jŏ lôch nar saƀat, gay ăn he dơi tăch rgâl ba ƀlê; Gay ăn he dơi hŭch êpha, jêh ri ntop jâk Sêkel Jêh ri sŏk njing veh mâu di gay ma ndơm bu,

⁶ Gay he sŏk prăk rvăt phung o ach, Rgâl bunuyh ndĭt trơi sŏk đah du kôp ntâu jot Jêh ri tăch tât ma ba nsiăp đŏng.”

⁷ Brah Yêhôva sŏk nau chrêk rmah bơh Y-Yakôb jêh ri sơm ton pô aơ: “N'hêl nanê̆ Gâp mâu mra chuêl ôh lĕ nau kan khân may ƀư!

⁸ Neh mra rung răng yor nau kan nây lĕ? Jêh ri lĕ rngôch ƀon lan gŭ ta nây mâu mra nhĭm nhhiăng lĕ? Lĕ bri neh mra hao ler lip nâm bu dak krong Nil, Păng mra mpât n'gơ jêh ri rhuh hŭch nâm bu dak krong n'gor bri Êjipt nây lĕ.”

⁹ Kôranh Brah Yêhôva lah: “Tâm nar nây, Gâp mra ƀư ăn nar nhâp tŭp nar nklang bôk Jêh ri ƀư ăn ngo neh ntu dôl nôk nar.

¹⁰ Gâp mra rgâl lĕ nar rƀŭn khân may jêng nar klâng rvê Jêh ri lĕ nau mprơ khân may jêng nau mprơ rngot. Gâp mra ƀư ăn khân may vân ƀau ta bŭt Jêh ri ƀư ăn lĕ rngôch bôk plưn da dê. Gâp mra ƀư ma khân may nhĭm nhhiăng nâm bu nuyh roh kon bu klâu kon dul Jêh ri nau nglĕ dŭt nâm bu du nar rngot ngăn ngên.”

¹¹ Kôranh Brah Yêhôva lah: “Aơ yơh lĕ nar mra tât Tơlah Gâp njuăl nau sa sât ji ngot tât tâm n'gor, Mâu di ôh nau ji ngot ma piăng let, mâu lĕ di ji hir ma dak nhêt, Ƀiălah ji ngot ji hir iăt nau Brah Yêhôva ngơi.

¹² Rnôk nây, khân păng mra hăn nsong blêng ntơm bơh dak mƀŭt aơ tât dak mƀŭt êng, Ntơm mpeh pa lơ tât mpeh luh nar; Khân păng nchuăt ta aơ ta ri gay ŭch joi nau Brah Yêhôva ngơi, Ƀiălah joi mâu dơi saơ ôh.

¹³ Tâm nar nây, phung druh ueh jêh ri phung bu klâu ndăm Mra huăr rgănh yor ji hir.

¹⁴ Lĕ rngôch phung sơm ton ma brah n'gor Samari lah pô aơ: ‘Hơi Dan, tĭng nâm brah may gŭ rêh! Tĭng nâm bu brah Bêr-Sêba gŭ rêh!’ Lĕ rngôch khân păng mra cha lôt jêh ri mâu hôm dâk đŏng ôh.”