Amôt 7 - Nau Brah Ndu Ngơi 2023

Nau tâm saơ ma Y-Amôt ( 7:1 – 9:15 ) Nau tâm saơ ma krah, ŭnh sa, jêh ri rse yông ndơ jâk

¹ Aơ jêng nau Brah Yêhôva tâm mpơl jêh ma gâp: Aơ, Păng njêng krah nsăt tâm dôl gơ̆ ntơm hon nse tay, nây jêng gơ̆ chăt tay jêh hađăch ăn bu koh gơ̆.

² Tơlah krah sa lĕ jêh gơ̆ tâm bri nây, gâp lah pô aơ: “Hơi Kôranh Brah Yêhôva, gâp vơh vơl dăn May yô̆ an hom! Mâm Y-Yakôb hôm dâk dơi lĕ? Yor păng jê̆ lê̆ ir.”

³ Brah Yêhôva tâm rgâl nau mĭn ma nau kan aơ. Brah Yêhôva lah: “Nau aơ mâu mra tât ôh.”

⁴ Kôranh Brah Yêhôva tâm mpơl ma gâp pô aơ: Aơ, Kôranh Brah Yêhôva njuăl nau phat dôih ma ŭnh; păng ƀư suăt kro ntu jru jêh ri sa rvăn lĕ neh.

⁵ Rnôk nây gâp lah pô aơ: “Hơi Kôranh Brah Yêhôva, gâp vơh vơl ma May, rlu hom ti! Mâm Y-Yakôb hôm dâk dơi lĕ? Yor păng jêng jê̆ lê̆ ir!”

⁶ Brah Yêhôva tâm rgâl nau mĭn ma nau kan aơ. Brah Yêhôva lah: “Nau aơ mâu mra tât ôh.”

⁷ Păng tâm mpơl jêh ma gâp: Aơ, Kôranh Brah dâk ta meng mpir ndâk sŏng jêh ri ta ti Păng djôt du mlâm rse dak ndrak.

⁸ Brah Yêhôva lah ma gâp: “Hơi Y-Amôt, moh may saơ?” Gâp lah: “Du rse yông ndơ jâk”. Kôranh Brah lah tay: “Aơ, Gâp mra dơm rse yông ndơ jâk ƀư di gay veh phung ƀon lan Israel Gâp; Gâp mâu mra yô̆ ma khân păng ôh.

⁹ Lĕ ntŭk prêh Y-Isăk mra jêng rngol, Lĕ ntŭk kloh ueh Israel mra rai, Jêh ri Gâp mra sŏk đao ƀư rai ngih Y-Jêrôbôam.”

Y-Amôt jêh ri kôranh ƀư brah Y-Amasia

¹⁰ Rnôk nây, Y-Amasia kôranh ƀư brah Bêthel, njuăl bunuyh hăn mbơh ma Y-Jêrôbôam hađăch Israel pô aơ: “Y-Amôt tâm nchră nau tâm rdâng đah may ta trôm nuih n'hâm Israel; bri dak mâu ŭch dơn ôh lĕ nau păng ngơi.

¹¹ Nanê̆ ngăn, nau Y-Amôt lah: ‘Y-Jêrôbôam mra khĭt ma đao jêh ri Israel mra jêng bu nă ngai ma bri dak khân păng nơm!’ ”

¹² Y-Amasia lah ma Y-Amôt: “bunuyh geh nau tâm saơ, du hom tă bơh aơ. Du krap hom ma n'gor Yuđa; sĭt ta nây gay joi sa, sĭt ta nây ngơi nau mbơh lor.

¹³ Ƀiălah lơi ngơi nau mbơh lor ôh ta Bêthel yorlah păng jêng ntŭk kloh ueh ma hađăch jêh ri jêng ngih brah ma ƀon bri hađăch.”

¹⁴ Y-Amôt plơ̆ lah ma Y-Amasia pô aơ: “Gâp mâu jêng du huê nơm mbơh lor ôh, mâu lĕ jêng kon du huê nơm mbơh lor; ƀiălah gâp jêng du huê rmăk biăp jêh ri nơm mât mray tơm si sikamôr.

¹⁵ Brah Yêhôva nhŭp sŏk gâp tă bơh ntŭk chiăp biăp, jêh ri Brah Yêhôva lah ma gâp pô aơ: ‘Hăn mbơh lor hom ma phung ƀon lan Israel gâp.’

¹⁶ Aƀaơ, iăt hom nau Brah Yêhôva ngơi: May nơm lah: ‘Lơi ngơi nau mbơh lor tâm rdâng ôh ma Israel jêh ri lơi mbơh nkoch tâm rdâng ôh ma ngih Y-Isăk.’

¹⁷ Yor nây, Brah Yêhôva lah: ‘Ur may jêng du huê bu ur tăch săk tâm ƀon toyh; Phung kon bu klâu jêh ri phung kon bu ur may mra cha lôt khĭt ma đao; Bri may bu mra veh jêh ri tâm pă, Bi may nơm mra khĭt tâm du n'gor bri ƀơ̆ ƀơch, Jêh ri nanê̆ ngăn Israel mra hăn jêng bu nă ngai ma bri khân păng nơm.’”