Amôt 6 - Nau Brah Ndu Ngơi 2023

Nau tih mhĭk tâm phung kôranh chiă uănh Israel

¹ Rêh ni ngăn ma phung gŭ mpay êng nơm tâm ƀon Siôn, Jêh ri phung gŭ đăp rmên ta yôk Samari! Rêh ni ngăn ma phung ndrŏng, phung kôranh ƀư bôk lĕ bri dak, Jêng phung ngih Israel văch kuăl rklaih!

² Pôri rgăn hom ta ƀon Kalnê jêh ri uănh; Ntơm bơh nây hăn hom tât ta ƀon toyh Hamat Jêh ri hăn trŭnh tât ta ƀon Gat phung philistin. Lĕ ƀon toyh nây jêng ueh lơn ma phung ƀon bri hađăch aơ lĕ bơh? Bri neh khân păng jêng toyh lơn ma bri khân may lĕ ƀơh?

³ Khân may ƀư nar mhĭk ăn ngai, Jêh ri nau khân may ƀư ăn tơm nau ƀai gơnh tât!

⁴ Khân may gŭ bê̆ch ta sưng ƀư ma la Jêh ri rok jâng ta klơ sưng bê̆ch khân may nơm; Sa puăch phung biăp kon săch tâm mpôl phung biăp Jêh ri phung kon ndrôk lay tă bơh ndrung.

⁵ Bâr khân may mprơ lă lêng gay tâm vơt đah nteh gong rêng, Jêh ri njêng lĕ gong rêng ma khân păng nơm nâm bu Đavit.

⁶ Khân may nhêt ndrănh tâm lĕ kachok toyh, Mhĭng khân may nơm ma dak ngi khlay Ƀiălah mâu rngot ôh yor nau ƀư rai tât ma ngih Y-Yôsep!

⁷ Yor nây, bu nhŭp khân păng jêng phung bu nă lor, Nau nhêt ndrănh nhŭl hơm jêh ri pâl rlưn nây mra lôch!

⁸ Kôranh Brah Yêhôva jêng Brah Ndu ma phung tahan; Kôranh Brah Yêhôva sơm ton Păng Nơm lah pô aơ, “Gâp tâm rmot ma phung Yakôb sưr jêh ri tâm rmot ma ngih nâp păng. Gâp mra jao ƀon toyh aơ jêh ri lĕ rngôch ndơ tâm păng ma phung rlăng.”

⁹ Tơlah tâm du rnăk vâl hôm e jât nuyh Khân păng mra khĭt lĕ rngôch.

¹⁰ Tơlah du huê ndŭl mpôl, jêng nơm djôt leo su săk nuyh khĭt jêh ri lah luh padih vâl, nơm nây mra ôp ma nơm hôm e tâm vâl: “Hôm geh lĕ bunuyh gŭ ndrel may?” Păng mra lah: “Mâu hôm geh bunuyh ôh!” Nôk nây, bunuyh ndŭl mpôl nây lah pô aơ: “Gŭ rklăk hom! He mâu dơi ngơi tât ma Amoh Brah Yêhôva ôh!”

¹¹ Yorlah Brah Yêhôva ntrŭnh nau ntăm pô aơ: Ngih toyh mra mbang nchah lĕ rlâm jêh, Ngih jê̆ mra nchah rhên.

¹² Geh lĕ bu ăn seh nchuăt ta klơ? Geh đŏng bu leo ndrôk kai lŭ nây? Ƀiălah khân may hŏ rgâl nau sŏng rlơ̆ jêng nkhơng dak si kăch, Jêh ri rgâl play sŏng srăng jêng nau rngot ngăn ngên.

¹³ Khân may hâk răm yor dơi lơh pit in ƀon Lô-Dêbar Jêh ri lah pô aơ: “Mâu di ma nau ktang he nơm sŏk jêh ƀon Karnaim ma he nơm?”

¹⁴ Yor nây, Yêhôva Brah Ndu ma phung tahan lah: “Hơi ngih Israel, Gâp mra ăn du bri dak văch tâm rdâng đah khân may; Păng mra tŭn jot khân may, ntơm bơh ntŭk lăp ƀon Hamat Tât ta Dak N'hor Arabah.”