Amôt 5 - Nau Brah Ndu Ngơi 2023

Bri dak Israel rlâm rai jêh

¹ Hơi ngih Israel, iăt hom nau aơ. Aơ jêng nau mprơ rngot gâp nhĭm vơl ma khân may:

² “Bu ur druh tang tat Israel lĕ cha lôt jêh, Mâu mra hôm dâk đŏng ôh. Bu lĕ mƀăr lơi jêh păng ta neh Mâu geh bunuyh kơl rdâk.”

³ Yorlah Brah Yêhôva lah: “Moh ƀon toyh hăn du rbăn nuyh tahan knŏng hôm e du rhiăng nuyh, Moh ƀon hăn du rhiăng nuyh tahan knŏng hôm e jât nuyh Ma ngih Israel dơm.”

⁴ Aơ jêng nau Brah Yêhôva lah ma ngih Israel: “Joi hom Gâp ri mơ khân may mra rêh!

⁵ Lơi joi ôh Bêthel, Lơi lăp ôh Gilgal, Mâu lĕ hăn tât ôh ma Bêr-Sêba. Yorlah Gilgal mra hăn jêng bu nă, Bêthel mra roh rai.”

⁶ Joi hom Brah Yêhôva ri mơ khân may mra rêh; Tơlah mâu, Păng mra jêng nâm bu ŭnh hit su ngih Yôsep, Jêh ri Bêthel, mâu geh ôh nơm buh nhhât.

⁷ Khân may rgâl nau sŏng luh jêng nau tăng Jêh ri mƀăr nau sŏng srăng ta neh!

⁸ Joi hom Nơm hŏ rhăk njêng rchuăl mănh Plêat jêh ri mănh Ôrlon; Rgâl nau ngo klĕng jêng ơm ôi, Rgâl nôk nar jêng măng krăk, Kuăl dak mƀŭt Jêh ri nkhŭt păng ta klơ neh; Amoh Păng jêng Brah Yêhôva.

⁹ Păng yơh ƀư ma phung ktang khĭt ndal, Ƀư rai lĕ pôih nâp.

¹⁰ Khân păng tâm rmot ma nơm nduyh khân păng ta mpông ƀon, Jêh ri khân păng ntêh rmot ma nơm nănh ngơi nau nanê̆ ngăn.

¹¹ Yorlah khân may tŭn jot bunuyh o ach, Jêh ri đă khân păng chê̆ pi ba ƀlê; Yor ri, lĕ ngih khân may ndâk ma lŭ trah Ƀiălah khân may mâu mra gŭ ôh, Khân may hŏ tăm jêh lĕ đang krăk ƀâu kah njŭng, Ƀiălah mâu mra nhêt ndrănh păng ôh.

¹² Yorlah Gâp gĭt nau ƀư tih khân may âk ir, Nau tih khân may mâu hôm dơi kơp; Khân may tŭn jot phung sŏng srăng, Dơn sŏk drăp bu blŏl, Jêh ri mâu koh dŏng nau di ma phung o ach tâm ntŭk mpông ƀon.

¹³ Yor nây, tâm rnôk tâm ban pô aơ, nơm blau mĭn mra gŭ klăk klêm Yorlah rnôk aơ jêng rnôk djơh mhĭk.

¹⁴ Tĭng joi hom nau ueh jêh ri lơi dĭng joi ôh nau mhĭk Gay ma khân may dơi gŭ rêh Pôri mơ Yêhôva Brah Ndu ma phung tahan mra gŭ ndrel ma khân may, Nâm bu khân may lah jêh.

¹⁵ Tâm rmot hom ma nau mhĭk jêh ri rŏng hom ma nau ueh; Ndâk hom nau sŏng ta mpông ƀon. Klăp lah Yêhôva Brah Ndu ma phung tahan Mra ăn nau yô̆ ma phung Yôsep hôm klen!

¹⁶ Yor nây, Brah Yêhôva jêng Brah Ndu ma phung tahan lah: “Tâm lĕ rngôch nhuang ƀon, bu mra nhhiăng nhĭm, Tâm lĕ rngôch trong sâng ta ƀon toyh, bu mra lah pô aơ: ‘Rêh ni ngăn! Rêh ni ngăn!’ Bu mra kuăl phung ƀư mir văch ma nau klâng rvê, Jêh ri phung nhĭm nkhôm văch gay mprơ ma nau mprơ rngot.

¹⁷ Lĕ rngôch đang krăk ƀâu mra huy nau nhĭm vơl Yorlah Gâp mra rgăn ta nklang khân may.” Brah Yêhôva lah pônây.

Nar Brah Yêhôva

¹⁸ “Rêh ni ngăn ma khân may jêng phung kâp gân nar Brah Yêhôva! Ndơ jan khân may kâp gân ma nar Brah Yêhôva? Nây jêng nar nau ngo klĕng, mâu di nar nau ang ôh.

¹⁹ Nâm bu du huê bunuyh nchuăt klach bơh yau mŭr, Nkhơng mâp ma kau; Dôl lăp tâm ngih, mbin ti ta mpir Nkhơng geh bêh chôk.

²⁰ Mâu di hĕ nar Brah Yêhôva jêng nar nau ngo, mâu geh nau ang, Nar ngo vêt vê mâu geh nchrat ang ôh?

²¹ Gâp tâm rmot, mưch ma lĕ yan rƀŭn khân may; Gâp mâu maak ôh ma lĕ nau tâm rƀŭn toyh khân may.

²² Nđâp tơlah khân may nhhơr ma Gâp ndơ ƀư brah gŭch jêh ri ndơ ƀư brah rnih môi, Gâp mâu mra dơn ôh ndơ nây; Gâp mâu treng uănh ôh ma lĕ mpô mpa lay khân may dŏng ƀư ndơ ƀư brah ma nau đăp mpăn.

²³ Mƀăr lơi hom bơh Gâp bâr khân may mprơ drơu drơu! Gâp mâu hôm ŭch iăt ôh gong rêng khân may.

²⁴ Ƀiălah ăn nau sŏng hoch nâm bu dak, Jêh ri nau sŏng srăng nâm bu dak krong toyh hoch thăng ƀaƀơ.

²⁵ Hơi ngih Israel, di lĕ khân may hŏ nhhơr mpa ƀư brah jêh ri ndơ ƀư brah rnih muy ma Gâp Tâm puăn jât năm gŭ ta bri rdah?

²⁶ Pôri khân may lŏ tung Sikut, brah hađăch khân may, Jêh ri Kaiwan, brah mănh khân may Pôri yơh khân may hŏ ƀư ma khân may nơm.

²⁷ Yor nây, Gâp mra ăn khân may jêng bu nă đah ri ƀon Damas.” Brah Yêhôva lah kơt nây, Amoh Păng jêng Brah Ndu ma phung tahan.