Amôt 4 - Nau Brah Ndu Ngơi 2023

Phung Israel mâu ŭch rmal nau tih

¹ Hơi phung ndrôk me phung Basan, gŭ ta klơ yôk Samari, Iăt hom! Khân may tŭn jot phung o ach jêh ri jot plên phung mâu geh mâu jêng, Jêh ri lah ma sai khân păng pô aơ: “Djôt hom ndơ nhêt tât ta aơ!”

² Kôranh Brah Yêhôva hŏ dŏng nau kloh ueh Păng sơm ton pô aơ: “Mông nar mra tât ma khân may, Bu mra djôt nglĕ nklĕ nhŭp khân may, Dŏng nglĕ ndar gay nhŭp phung hôm gŭ rêh klen tâm phung khân may.

³ Ăp nơm tâm phung khân may mra hăn luh du Ta trôm mpêr ƀon lĕ bŏng, Jêh ri bu mra klŭp khân may tâm Harmôn,” Brah Yêhôva lah pônây.

⁴ “Hăn hom tât ta ƀon Bêthel jêh ri ƀư tih; Hăn hom ma ƀon Gilgal jêh ri ƀư tih tay! Ăp ôi, djôt tât hom mpa ƀư brah, Jêh ri pe nar du tơ̆ khân may nhhơr du kô̆ tâm jât!

⁵ Su lơi hom ndơ ƀư brah nau tâm rnê ma piăng let geh ndrui; Mbơh hom lĕ ndơ ƀư brah hŏ mĭn jêh tâm nuih n'hâm; Ntưih hom ăn bu gĭt lĕ nau nây! Hơi phung kon Israel, yorlah khân may ŭch ƀư nâm bu pônây.” Kôranh Brah Yêhôva lah pônây.

⁶ “Bi ma Gâp, Gâp hŏ ƀư kloh jêh sêk khân may tâm ăp ƀon khân may Jêh ri ƀư kƀah ƀănh tâm lĕ rngôch ntŭk khân may gŭ. Nđâp lah pônây, khân may mâu lĕ ŭch plơ̆ sĭt ma Gâp!” Brah Yêhôva lah pônây.

⁷ “Tâm ban lĕ Gâp mâu ăn ôh dak mih ma khân may Tâm pe khay lor ma yan rek ba; Gâp hŏ ăn jêh dak mih ta ƀon toyh aơ Ƀiălah mâu ăn dak mih ta ƀon toyh ri. Mir aơ lĕ geh dak mih jêh, Bi ma lôk mir ri mâu geh dak mih ôh lĕ nhop kro.

⁸ Yor ri, bu hăn nsong blêng ntơm bơh ƀon toyh aơ tât ƀon toyh ri gay joi dak nhêt Ƀiălah joi mâu tŏng ôh dak ma nhêt. Ƀiălah khân may mâu plơ̆ sĭt ôh ma Gâp” Brah Yêhôva lah pônây.

⁹ “Gâp hŏ dŏng sial duh jêh ri ndrŭng sa ba khân may. Geh âk n'gar trao, đang krăk ƀâu, tơm play rvi, tơm play ôlive khân may geh krah ndrach gĭnh mpŭng jêh. Ƀiălah khân may mâu lĕ plơ̆ sĭt ma Gâp,” Brah Yêhôva lah pônây.

¹⁰ “Gâp njêng nau ji tưp tât ma khân may nâm bu tâm n'gor bri Êjipt. Gâp nkhĭt jêh phung bu klâu ndăm khân may ma đao Jêh ri seh khân may lĕ Gâp nhŭp jêh. Gâp hŏ ƀư nau ƀâu ôm tă bơh ntŭk khân may njơh, n'hôl tât ma trôm muh khân may. Ƀiălah khân may mâu lĕ ŭch plơ̆ sĭt ma Gâp.” Brah Yêhôva lah pônây.

¹¹ “Gâp hŏ ƀư rai ƀaƀă tâm phung khân may Nâm bu Brah Ndu ƀư rai Sôdôm jêh ri Gômôrơ Jêh ri khân may nâm bu rlŭt ŭnh bu rhuăt bơh ntŭk ŭnh sa, Ƀiălah khân may mâu lĕ ŭch plơ̆ sĭt ma Gâp.” Brah Yêhôva lah.

¹² “Hơi Israel, yor nây, Gâp mra ƀư ma may tâm ban pônây; Hơi Israel, yorlah Gâp mra ƀư ma may tâm ban pônây, Pôri may nkra hom ma nau tâm mâp đah Brah Ndu may.”

¹³ N'hêl nanê̆ Păng hŏ njêng jêh yôk jêh ri rhăk njêng sial; Păng yơh mpơl nau bunuyh mĭn tâm nuih n'hâm. Păng rgâl luh nar luh jêng ngo Jêh ri hăn tâm lĕ ntŭk prêh ta neh ntu. Amoh Păng jêng Yêhôva Brah Ndu ma phung tahan.