Amôt 3 - Nau Brah Ndu Ngơi 2023

Mbơh lor nau tâm rdâng ma phung Israel ( 3:1 – 6:14 ) Mbơh lor nau phat dôih ma phung ƀon lan Israel

¹ Hơi phung kon sau Israel, iăt hom nau aơ, jêng nau Brah Yêhôva ngơi tâm rdâng đah khân may, jêng tâm rdâng đah lĕ ndŭl mpôl Gâp hŏ ngluh jêh bơh n'gor bri Êjipt.

² Gâp knŏng gĭt khân may dơm Tâm lĕ rngôch phung băl mpôl bunuyh ta neh ntu; Yor nây, Gâp mra tâm rmal khân may Yor lĕ nau kue khân may.

³ Tơlah bar hê mâu du ai nau mĭn, Pôri mâm dơi hăn nsum tâm du trong?

⁴ Tơlah yau mŭr mâu geh kăp ôh mpa sa, Pôri păng geh rđuh ngrông tâm krŏng lĕ? Tơlah yau mŭr kon mâu geh ndơ sa Pôri păng dơi rđuh ngrông tă bơh ntŭk trôm jru lĕ?

⁵ Mâm dĭng sĭm geh tâm nhuăl bu nthăng ta neh Tơlah mâu geh ôh dăk sâm gay nhŭp păng? Tơlah păng mâu geh nhŭp du ntil ndơ ôh, Mâm dĭng nhuăl ntlư bơh neh?

⁶ Lah bu uh nŭng tâm ƀon toyh Pôri phung ƀon lan mâu hĕ klach? Geh lĕ nau mhĭk tât ma du rplay ƀon Tơlah Brah Yêhôva mâu ƀư nau nây?

⁷ Tâm ban lĕ, Kôranh Brah Yêhôva mâu mo du ntil nau ôh Mbơh lĕ nau ndâp Păng Ma phung oh mon Păng jêng phung nơm mbơh lor.

⁸ Tơlah yau mŭr rđuh ngrông Pôri mbu nơm mâu klach? Tơlah Kôranh Brah Yêhôva ntĭm nti Pôri mbu nơm mâu ngơi nau mbơh lor?

⁹ Mbơh hom ma lĕ pôih nâp tâm n'gor Asdôt, Jêh ri ma lĕ pôih toyh tâm n'gor Êjipt, Lah hom pô aơ: “Khân may tâm rgum hom ta klơ lĕ yôk Samari; Uănh hom âk nau uh ah toyh ngăn ta nây Jêh ri nau tŭn jot ta nklang ƀon lan păng”

¹⁰ Brah Yêhôva lah: “Khân păng mâu gĭt ƀư nau sŏng ôh; Khân păng bun bêng drăp ndơ mhĭk ƀai jêh ri ƀư nau ntŭng tâm lĕ pôih toyh khân păng.”

¹¹ Yor nây, Kôranh Brah Yêhôva lah: “Ri, phung rlăng mra văch tât nchueng bri neh aơ; Păng ƀư rai nau ktang may, Jêh ri pit in lĕ pôih toyh may.”

¹² Brah Yêhôva lah: “Nâm bu phung rmăk biăp knŏng dơi đŏt mphâk bar mlâm jâng, Mâu lah du mlâm trôm tôr luh tă bơh trôm mbung yau mŭr Pôri phung ƀon lan Israel gŭ ta n'gor Samari, Ta njônh sưng jêh ri ta sưng bê̆ch bri Damas Ăt mra dơi rklaih tâm ban pônây lĕ.

¹³ Kôranh Brah Yêhôva, Brah Ndu ma phung tahan lah: Iăt hom jêh ri mbơh nau tâm rdâng đah ngih Y-Yakôb.

¹⁴ Tâm nar Gâp tâm rmal phung Israel yor ma nau tih păng, Tâm ban lĕ Gâp mra ƀư rai nơng ƀư brah ƀon Bêthel; Bu mra koh lơi lĕ nke nơng ƀư brah Jêh ri tŭp ta neh.

¹⁵ Rnôk nây, Gâp mra ƀư rai ngih yan puh jêh ri ngih yan ta vai; Lĕ ngih ƀư ma la rveh mra rai Jêh ri lĕ ngih toyh mra rai tâm ban lĕ.” Brah Yêhôva lah.