Amôt 2 - Nau Brah Ndu Ngơi 2023

Mbơh lor nau phat dôih ma Môap

¹ Brah Yêhôva lah: “Yor nau tih mhĭk Môap ntop hôm nau tih mhĭk Gâp mâu rhuăt tay nau tâm rmal bơh păng. Yorlah khân păng su jêh nting Hađăch n'gor Êđôm jêng klo.

² Gâp mra njuăl ŭnh tât ta Môap, Ŭnh mra su rai lĕ pôih nâp ƀon Kêriôt. Môap mra khĭt tâm nau uh ah. Ta nklang bâr lŭng nter jêh ri uh nŭng.

³ Gâp mra ƀư rai nơm chiă uănh bơh păng, Jêh ri nkhĭt lĕ rngôch phung kôranh ndrel ma păng.” Brah Yêhôva lah pônây.

Mbơh lor nau phat dôih ma Yuđa

⁴ Brah Yêhôva lah: “Yor nau tih mhĭk Yuđa ntop hôm nau tih mhĭk Yor ri Gâp mâu rhuăt tay nau tâm rmal bơh păng. Yorlah khân păng dun jêh ma nau vay Brah Yêhôva, Jêh ri mâu djôt prăp ôh nau vay păng ntĭnh, Ƀiălah lĕ nau mbruh ƀư vĭ trong, Hăn tĭng trong chô yau khân păng,

⁵ Gâp mra njuăl ŭnh tât ta Yuđa Ŭnh mra su rai lĕ pôih nâp ƀon Yêrusalem.”

Mbơh lor nau phat dôih phung Israel

⁶ Brah Yêhôva lah: “Yor nau tih mhĭk Israel ntop hôm ntop nau tih mhĭk Yor ri Gâp mâu rhuăt tay nau tâm rmal ma păng. Yorlah khân păng hŏ tăch bunuyh sŏng srăng sŏk prăk, Tăch phung ndĭt trơi sŏk du kôp jep.

⁷ Khân păng jot plên bôk phung ndĭt trơi tâm bŏk krăk, Jêh ri ƀư kue trong ma bunuyh dêh rhêt. Kon jêh ri mbơ̆ păng hăn bê̆ch nsum ma du huê bu ur. Jêh ri pônây ƀư ƀơ̆ kơt nĕ amoh kloh ueh Gâp.

⁸ Khân păng bê̆ch êp ăp nơng ƀư brah, Ta klơ lĕ kho ao jêng ndơ khân păng hŏ sŏk ƀư ndơ nchăm Jêh ri nhêt ndrănh phung khân păng rmal Tâm ntŭk mbah brah tih khân păng.

⁹ Nđâp tơlah pônây, Gâp nơm yơh hŏ ƀư rai jêh phung Amôrit tanăp măt khân păng, Jêng phung bunuyh prêh nâm bu tơm si sêdar, Jêh ri dăng ktang nâm bu tơm si guyh. Gâp ƀư rai jêh play khân păng ta klơ n'gĭng Jêh ri reh khân păng tâm dâng neh.

¹⁰ Gâp hŏ ngluh jêh khân may tă bơh n'gor bri Êjipt, Jêh ri njŭn khân may gŭ tâm bri rdah puăn jât năm Gay ăn khân may sŏk pit bri phung Amôrit ƀư drăp ndơn.

¹¹ Gâp hŏ n'hao bơh phung kon bu klâu khân may jêng phung nơm mbơh lor, Jêh ri n'hao phung bu klâu ndăm tâm phung khân may jêng bunuyh Nasirit. Hơi phung kon sau Israel, mâu di ngăn pônây?” Brah Yêhôva lah kơt nây:

¹² “Ƀiălah khân may hŏ ăn ma phung Nasirit nhêt ndrănh Jêh ri buay phung nơm mbơh lor pô aơ: ‘Lơi khân may mbơh lor ôh!’

¹³ Aơ, Gâp mra mpet khân may tâm ntŭk khân may gŭ Nâm bu ndeh tŭn mpet yor ma lĕ nchăp ba

¹⁴ Bunuyh nchuăt dŭt prăl mâu mra dơi rklaih ôh; Bunuyh dăng ktang mâu lĕ dơi têm n'hâm suan păng, Jêh ri bunuyh janh ktang mâu mra dơi lĕ tâm rklaih nau rêh păng nơm.

¹⁵ Nơm van na mâu mra dâk nâp ôh; Jêh ri bunuyh nchuăt prăl mâu mra dơi der ngai păng nơm ôh; Bunuyh ncho seh kŏ mâu dơi rklaih lĕ păng nơm.

¹⁶ Jêh ri bunuyh janh nuih lơn tâm phung tahan janh ktang, Mra nchuăt rhôk tâm nar nây,” Brah Yêhôva lah kơt nây.