Tito 3 - Emberá Chamí

Dachi Akõreba ichi sõbiad̶eeba dachi karibad̶a

¹ Ãbarãmaa kĩrababiáse nau iujãad̶ebena jaradea ua b̶uabadaurã juad̶e panad̶amera. Ãchiba jaraaduu ijãa waud̶ai panuu maud̶e ne joma biꞌia waud̶ai baita nuread̶ai panuu.

² Ãbarãmaa jarase: ab̶au ʉ̃rʉbena kachirua berread̶awẽa panad̶ai panuu maud̶e oa kachirua berread̶awẽa panad̶ai panuu, maumaarã jomaurã ome sõbia nuread̶ai panuu, maarã audeara kʉ̃risiad̶awẽa.

³ Biawãra naed̶e dachia bid̶a kʉ̃risia biꞌiwãe panasid̶au, Dachi Akõred̶e ijãad̶aabai panasid̶au, biꞌiwãe kʉ̃risia panasid̶au. Dachiba kachirua wau kʉ̃ria nuree maud̶e kĩrajʉʉ wau kʉ̃ria nuree, chibari baita bari trajabarii kĩra joma waubachid̶au. Barikia kachiruad̶e nibabachid̶au, waabenarãba uru panuu kakua sõd̶e kachirua panabachid̶au, waabenarãba dachi kĩramaabachid̶au, maud̶e dachiba waabenarã kĩramaabachid̶au.

⁴ Maamina Dachi Akõre chi Karibabariiba ichi biꞌia nii maud̶e ichiba dachi kʉ̃ria b̶uu jomaurãmaa kuitaabiasii.

⁵ Mauba dachi karibasii. Dachiba biꞌia wauped̶aad̶a kakua karibaabasii, maumaarã ichi kĩra chuburiasiid̶eeba karibasii. Dachi kachirua jeraasii paru ea jeraad̶a kĩra nuread̶amera maud̶e Dachi Akõre Jauriba dachimaa chokae b̶uai chiwid̶i deasii.

⁶ Dachi Karibabarii Jesucristod̶eeba, Dachi Akõreba ichi Jauri dachimaa ãrea deasii bania ãrea easii kĩra dachi kakua ʉ̃rʉ.

⁷ Maka Dachi Akõreba ichi sõbiad̶eeba dachi jipa unu b̶uud̶eeba ewaricha ichi ome chokae panad̶ai. Mau esed̶au panuu.

⁸ Mau bed̶ea biawãrad̶eeba, mau ijãad̶ai panuu. Mʉʉba kʉ̃ria b̶uu bichiba mau ãrea jaradea b̶uai Dachi Akõred̶e ijãabadaurãba ne joma biꞌia wau wãd̶amera. Mau bed̶ea ãrea biꞌia b̶uu. Jomaurã karibabarii.

⁹ Maamina barikia bed̶ea biawãe b̶uu kakau oa kachirua berrearã́se. Maud̶e Moisesba b̶ʉd̶a ʉ̃rʉbena oa kachirua berrearã́se. Maud̶e dachi nabẽraed̶ebenarã trʉ̃ jaradeabadau ida b̶use. Joma mau biꞌiwãe b̶uu maud̶e ab̶a bid̶a karibakau.

¹⁰ Ab̶auba ãbarã ijaraa berreabiiruubʉrã, mau iadaase waa maka waurãamera. Mauba ijãawẽebʉrã, waya iadaase. Maud̶e wabid̶a ijãawẽa b̶uubʉrã, mau ome b̶uarã́se.

¹¹ Bichiba ãrea kuitaa b̶uu mau ẽbẽraba biawãra bed̶ea ida b̶uped̶a kachirua wau b̶uu. Kachirua wau b̶uud̶eeba unubi b̶uu ara ichi Dachi Akõre daad̶e nebʉra barau a b̶uu.

Pabloba nau kartad̶e aanama b̶ʉd̶a

¹² Mʉʉba ãba Artemas maebʉrã ãba Tíquico bichimaa bʉiruu. Jãma neeruud̶e isa Nicópolis puurud̶aa mʉ ichiad̶e neese. Mʉ nau kui che ewarid̶e mama b̶uai kʉ̃risia b̶uu.

¹³ Ẽbẽra chi aid̶a berreabarii Zenas maud̶e Apolos bichid̶ebena wãaduud̶e ne jomad̶e aid̶ase biꞌia wãd̶amera.

¹⁴ Dachi chi Cristod̶e ijãabadaurãba biꞌia wau kuitaa wãd̶ai panuu chi nejarr barauwãe nuree aid̶ad̶ai baita. Maka ara dachi bari nuread̶aabai.

¹⁵ Joma mʉ ome panuuba jarabʉi panuu bichi biꞌia b̶uai. Chi Cristod̶e ijãabadaurãmaa jarábad̶e ase daiba jarabʉi panuu maarã biꞌia duanad̶ai. Daiba maarã ãrea kʉ̃ria panuu. Mʉʉba kʉ̃ria b̶uu Dachi Akõreba ichi sõbiad̶eeba joma machi kariba b̶uai.