Romanos 11 - Emberá Chamí

Chi nuree judiorãba Cristod̶e ijãaped̶aad̶a

¹ Maud̶eeba mʉʉba nau id̶iiruu: «¿Dachi Akõreba israeld̶ebenarã ichid̶irã ida b̶uska?» ¡Makawãema! Mʉ israeld̶ebenabʉ, Abrahamd̶ebena need̶abʉ, Benjamind̶ebena need̶abʉ.

² Dachi Akõreba naed̶e israeld̶ebenarã jʉrʉ adausii ichi puuru b̶uamera. Maud̶eeba ãchi ida b̶uwẽa b̶uu. Machiba Dachi Akõre bed̶ead̶e Elías ʉ̃rʉbena b̶ʉd̶a kuitaa panuu. Eliasba Dachi Akõremaa israeld̶ebenarã ʉ̃rʉbena naka biꞌiwãe jarasii.

³ «Mʉ Mechiu, bichi baita berreabadaurã joma kenasid̶au maud̶e bichimaa ãnimara baa deabadau joma ãrisid̶au. Ab̶aburu mʉ́turu b̶eesii, maamina mʉ sid̶a bead̶ai baita jʉrʉ panuu».

⁴ Maud̶e Dachi Akõreba naka panausii: «Mʉʉba 7.000 ẽbẽrarã mʉ baita nu uru b̶uu. Maarã Baal daad̶e õdarrd̶eeba kob̶eed̶akau».

⁵ Ara mau kĩra nau ewarid̶e bid̶a Dachi Akõreba ichi sõbiad̶eeba dai judiorã ãreawãe panuu nu uru b̶uu.

⁶ Maka Dachi Akõreba ichi sõbiad̶eeba adausiibʉrã, daiba wau panuu kakua jʉrʉ adaubai basii. Daiba wau panuu kakua jʉrʉ adau b̶uasirã, makarã ichi sõbiad̶eeba jʉrʉ adaubai basii.

⁷ ¿Mau ʉ̃rʉbena saka kʉ̃risia panuma? Israeld̶ebenarãba Dachi Akõre puuru bad̶ai jʉrʉ panasmina makad̶aabasii. Maamina israeld̶ebenarã ãreawãe panuuba ijãasid̶au, Dachi Akõreba jʉrʉ adausiid̶eeba. Waabenarãba ijãad̶ai kʉ̃riad̶aabasii.

⁸ Dachi Akõre bed̶ead̶e naka b̶ʉ kub̶uu: «Dachi Akõreba ãchi kʉ̃risia jʉ̃asii poyaa kuitaarãad̶amera, ãchi dauba unud̶a poyaa kuitaarãad̶amera, maud̶e ãchi kʉʉrʉba ũrid̶a poyaa kuitaarãad̶amera. Wabid̶a maka panuu».

⁹ Maud̶e judiorã rey Davidba mau ʉ̃rʉbena Dachi Akõremaa jarasii: «Ãchi kĩrajʉʉ kobadau ewarid̶e komaa panuud̶e bichiba kastikaabai kʉ̃risiabiáse. Maka ãchi du ab̶a setaa kũruad̶ai ãnimara enabed̶e b̶aeduu kĩra. Maud̶e ãchi kastikase.

¹⁰ Ãchi dau pãriu nuree kĩra b̶use ãchiba unu panuu kuitaarãad̶amera. Maud̶e ewaricha ãrea biꞌiwãe panabiáse».

Dachi Akõreba judiowãerã karibad̶a

¹¹ Nau mʉʉba id̶iiruu: ¿judiorãba Cristo ida b̶usid̶aud̶eeba waa Dachi Akõre ome poyaa biꞌia nuread̶aabai panuka? ¡Makawãema! Maumaarã maka wausid̶aud̶eeba Dachi Akõreba judiowãerã karibabarii. Maka judiorãba jiwaad̶aped̶a ichi kʉ̃riad̶ai.

¹² Judiorãba Cristo ida b̶usid̶aud̶eeba ãchi audeara Dachi Akõreba joma nau iujãad̶ebena judiowãerã ãrea kariba b̶uu. Maud̶eeba chi judiorã waya Dachi Akõre ome biꞌia paneeduu ewarid̶e ¿Dachi Akõreba jomaurã biꞌia karibaabaika?

¹³ Mʉʉba judiowãerãmaa nau jaraaruu. Mʉ Dachi Akõreba bʉid̶a b̶usii, machimaa jaradeamera. Mau mʉʉba joma biꞌia wau kʉ̃ria b̶uu.

¹⁴ Mʉʉba judiowãerãmaa jaradea b̶uud̶eeba kʉ̃ria b̶uu mʉ ẽbẽrarã judiorã bid̶a mau bed̶ea ũrid̶ai jiwaa panuu kĩra. Maka Dachi Akõreba ãchid̶ebena chi nuree karibai.

¹⁵ Dachi Akõreba judiorã ida b̶usiid̶eeba waabenarã nau iujãad̶ebenarã ichi ome biꞌia b̶usii. Maud̶eeba Dachi Akõreba judiorã waya kʉ̃ria adauruud̶e ¿jãarã ome kãare sakaima? Ãchi sid̶a biud̶arã kĩra panad̶a Dachi Akõre ome chokae nuread̶ai.

¹⁶ Trigo naa ea junaaduud̶e pan waud̶aped̶a mau pand̶ebena Dachi Akõremaa ab̶a deaduubʉrã, waabena pan sid̶a Dachi Akõred̶ebʉ. Maud̶e bakuru karr biꞌia b̶uubʉrã, chi bakuru jua sid̶a biꞌia nuree.

¹⁷ Waabenarã judiorã Dachi Akõred̶ebena awara paneesid̶au olivo bakuru jua tʉʉd̶a kĩra. Machi judiowãerã Dachi Akõreswãe panasid̶au olivo bakuru ichi du ab̶a moded̶e warid̶a kĩra. Maamina machi ẽbẽrarã Dachi Akõred̶erã paneesid̶au chi bakuru jua chi b̶ʉatud̶amaa kara nub̶ud̶a kĩra. Maka jãabae Dachi Akõreba machi sid̶a kariba b̶uu judiorã kariba b̶uad̶a kĩra.

¹⁸ Maamina kʉ̃risiarã́sturu machi judiowãerã judiorã audeara Dachi Akõre daad̶e biꞌia nuree. Kĩrabásturu machi chi karrd̶eeba chokae panuu. Chi karr machid̶eeba chokae b̶uuwãe.

¹⁹ Ab̶a machid̶ebenaba jarai b̶uu: «Dachi Akõreba judiorã ida b̶usii bakuru jua b̶ʉatud̶a kĩra, mʉ mau bakurud̶e kara nub̶ui baita».

²⁰ Biawãra maka b̶uu. Maamina Dachi Akõreba ãchi ida b̶usii Cristod̶e ijãad̶aabasiid̶eeba. Maabae machi jʉrʉ adausii Cristod̶e ijãasid̶aud̶eeba. Maud̶eeba machi judiorã audeara biꞌia nuree kʉ̃risiarã́sturu, maumaarã Dachi Akõre wapeadee panásturu.

²¹ Judiorãba ijãad̶awẽa panuu kakua Dachi Akõreba ãchi ida b̶usii bakuru jua b̶ʉatuuruu kĩra. Ara mau kĩra machi judiowãerãba ijãad̶awẽebʉrã, Dachi Akõreba machi sid̶a ida b̶ui.

²² Ãrea kʉ̃risiásturu saka Dachi Akõreba ichi sõbiad̶eeba karibabarii maud̶e saka kastikabarii. Judiorãba ijãad̶aabasiid̶eeba Dachi Akõreba kastikaped̶a ãchi ida b̶usii. Maud̶e machi judiowãerã ichi sõbiad̶eeba kariba b̶uu maud̶e kariba b̶uai. Maamina maud̶eeba panad̶ai panuu. Machiba ijãa panad̶awẽebʉrã, Dachi Akõreba machi sid̶a kastikaped̶a ida b̶ui bakuru jua b̶ʉatuuruu kĩra.

²³ Maud̶e chi judiorã Cristod̶e ijãad̶awẽa panuurãba ijãaduubʉrã, Dachi Akõreba ãchi waya kʉ̃ria adaui ichi poyaad̶eeba chi bakuru jua tʉʉd̶amaa waya kara nub̶uuruu kĩra.

²⁴ Biawãra machi judiowãerã olivo bakuru ichi du ab̶a moded̶e warid̶a kĩra panasid̶au. Dachi Akõreba mau bakurud̶ebena tʉʉped̶a olivo bakuru uud̶amaa kara nub̶usii. Maka b̶uabai b̶umina Dachi Akõreba wausii. Maud̶eeba ¿judiorã waya poyaa kʉ̃ria adauwẽka chi uud̶a bakuru jua waya kara nub̶uuruu kĩra?

Dachi Akõreba joma israeld̶ebenarã karibai

²⁵ Ãbarã, mʉʉba kʉ̃ria b̶uu Dachi Akõreba ne naed̶e kuitaabiawẽa b̶uad̶a machiba kuitaad̶ai. Maka judiorã audeara biꞌia nuree kʉ̃risiad̶aabai. Dachi Akõreba naed̶e kuitaabiawẽa b̶uad̶a naubʉ: ãrea judiorã sõ chaarea paneesid̶au maud̶e maka paneed̶ai ab̶a joma chi Cristod̶e ijãad̶ai panuu judiowãerãba ijãaduud̶aa.

²⁶ Maka Israel puuru Dachi Akõreba joma karibai. Dachi Akõre bed̶ead̶e naka b̶ʉ kub̶uu: «Dachi Karibabarii Sión puurud̶ebena neei. Ichiba Jacobd̶ebena imiped̶aad̶a chi kachirua waubadau ãyaa b̶ui.

²⁷ Mʉʉba ãchi ome bed̶ea deai. Ãchiba kachirua wauped̶aad̶a perdonai».

²⁸ Judiorãba chi bed̶ea bia Jesús ʉ̃rʉbena ida b̶u panuud̶eeba Dachi Akõre ome chi kĩramaabʉ. Maud̶eeba machi judiowãerã ẽbẽrarã Dachi Akõred̶erã poyaa nuread̶ai. Maamina Dachi Akõreba ãchi nabẽraed̶ebenarã jʉrʉ adausiid̶eeba wabid̶a kʉ̃ria b̶uu.

²⁹ Biawãra Dachi Akõreba dead̶a juakaa adaukau. Ichiba iud̶a ida b̶ukau.

³⁰ Machi judiowãerãba naed̶e Dachi Akõred̶e ijãad̶akau basii. Maamina judiorãba ijãad̶awẽa panuud̶eeba jãabae Dachi Akõreba machi kĩra chuburia b̶uu.

³¹ Maarãba jãabae ijãad̶akau, Dachi Akõreba kĩra chuburiamera machi judiowãerã kĩra chuburia b̶uu kĩra.

³² Biawãra Dachi Akõreba joma jʉ̃akuasii ũribabaswãe nureed̶eeba. Maka wausii joma kĩra chuburiai baita.

³³ Dachi Akõre ãrea kuitaa nii maud̶e kʉ̃risia kuitaa nii. Ichiba waui kʉ̃risia b̶uu ab̶a bid̶a poyaa kuitaad̶aabai. Ichiba wau b̶uu sid̶a poyaa kuitaad̶aabai.

³⁴ «¿Kaiba Dachi Mechiu kʉ̃risia kuitaa b̶uma? ¿Kaiba ichimaa kʉ̃risia jaradeaima?

³⁵ ¿Kaiba Dachi Akõremaa naa deasma, waya deamera?»

³⁶ Dachi Akõréburu ne joma wausii. Ne joma ichid̶eeba b̶uu maud̶e ichi baita b̶uu. Dachiba ewaricha ichimaa biꞌia berread̶ai panuu. Biꞌia b̶uu maka b̶uai.