Mateo 3 - Emberá Chamí

Juan chi Boro Eabarii ʉ̃rʉbena b̶ʉd̶a

¹ Mau maad̶akare Juan chi Boro Eabarii Judea drua sirua wãꞌãe b̶uud̶e jaradea kob̶eesii.

² Juanba naka jarabachii: «Bajãad̶e B̶uu neeruu ichid̶irã ichi juad̶e ua b̶uai baita. Maud̶eeba machiba kachirua waubadau ida b̶ud̶aped̶a ichimaa wã́sturu».

³ Mau Juan ʉ̃rʉbena Dachi Akõre baita berreabarii Isaiasba jarasii: «Ẽbẽra drua sirua wãꞌãe b̶uud̶e jĩwa berrea b̶uu: “O jarésturu Dachi Mechiu biꞌia neemera. O ichi baita jipa wirua wáusturu”».

⁴ Juanba paru camello kara waud̶a jʉ̃bachii. Kʉrrd̶e ãnimara e waud̶a jʉ̃bachii. Sisi kobachii maud̶e moded̶ebena nidurr kũab̶ari b̶aa dobachii.

⁵ Ẽbẽrarã Jerusalend̶ebenarã, joma Judea druad̶ebenarã maud̶e joma Jordán do kaita panad̶a Juanmaa wãbachid̶au.

⁶ Ãchiba kachirua wauped̶aad̶a ichi daad̶e jarabachid̶au. Maabae Juanba ãchi Jordán dod̶e boro eakuabachii.

⁷ Maka b̶uud̶e waabenarã Moisesba b̶ʉd̶a jaradeabadau neesid̶au Juanba boro eamera. Waabenarã fariseorã basii; waabenarã saduceorã basii. Maamina Juanba ãchi unuuruud̶e jarasii: «Ẽbẽrarã dama kĩra nuree, ¿kaiba jarasma machi Dachi Akõre kĩruuruud̶e poyaa mirud̶ayu?

⁸ Machiba wau panuud̶eeba unubísturu biawãra machi kachirua ida b̶ud̶aped̶a, Dachi Akõremaa neeped̶aad̶a.

⁹ Kʉ̃risiarã́sturu Abrahamd̶ebena imiped̶aad̶ad̶eeba Dachi Akõreba kastikaabai. Mʉʉba machimaa jaraaruu: “Dachi Akõreba kʉ̃riaibʉrã, cha b̶ee mo Abrahamd̶ebena imiped̶aad̶arã babiakuai”.

¹⁰ Dachi Akõreba chaara uru b̶uu bakuru tutai baita. Joma bakuru bia chaud̶akau tukuaped̶a tʉbʉd̶e jirakuai.

¹¹ »Mʉʉba baniaba machi boro ea b̶uu waabenarãmaa unubiad̶amera chi kachirua waud̶ai ida b̶uped̶aad̶a. Maamina mʉare ab̶a neei chi mʉ aude mechiu nii. Maud̶eeba ichiba jʉ̃rʉd̶e jʉ̃barii poyaa enai b̶uuwãe. Ichiba Dachi Akõre Jauri deai. Maamina ijãad̶awẽebʉrã kastikakuai.

¹² Ichi juad̶e uru b̶uuba chi trigo ʉtaa jirakuabarii chi jãra ãyaa jãripuabii baita. Maabae chi trigo taa jãripuaped̶aad̶a chi pebariimarẽ pe nub̶ui maamina chi jãra tʉbʉchia kiikaud̶e baai».

Juanba Jesús boro ead̶a

¹³ Mau ewarid̶e Jesús Galilea druad̶ebena Jordán dod̶aa neesii Juanba ichi boro eamera.

¹⁴ Maamina Juanba Jesús boro eamaaba jarasii: —Bichiaburu mʉ boro eai b̶uu. ¿Sakãe mʉʉmaa neeruma?

¹⁵ Maud̶e Jesusba panausii: —Anakʉd̶e bichiba wau b̶uu kĩra wause. Bibuara b̶uu waud̶ai joma Dachi Akõreba waubi b̶uu kĩra. Maabae Juanba ijãasii.

¹⁶ Jesús boro ead̶akare doed̶abena wãaruud̶e bajãa ewa wãsii. Maud̶e Dachi Akõre Jauri paloma kĩra ichi ʉ̃rʉ neeruu unusii.

¹⁷ Bajãad̶ebena mimi ab̶a ũrisid̶au. Naka jarasii: «Nau chi mʉʉba kʉ̃ria inii. Mʉ ichi kakua ãrea kĩrajʉʉ b̶uu».