Filipenses 3 - Emberá Chamí

Cristod̶éburu ijãad̶ai panuu

¹ Mau awara ãbarã, Dachi Mechiud̶eeba kĩrajʉʉ panásturu. Mʉʉba nau bed̶ea naa b̶ʉsmina, ara mau b̶ʉi baita ida b̶ukau. Maka kachiruad̶ebena machi nu b̶uai.

² Ẽbẽrarã usa kĩra nureed̶ebena kauwa duanásturu, maarãba kachirua waubadaud̶eeba. Maarãba jaradeabadau mukĩra chi kakua tõod̶ai panuu ẽbẽrarã Dachi Akõred̶erã nuread̶ai baita.

³ Maamina dachi chi biawãra mukĩra chi kakua tõoped̶aad̶abʉ. Dachiaburu Dachi Akõre Jaurid̶eeba ichimaa biꞌia berreabadau. Maud̶e Jesucristoba dachi baita waud̶a biꞌia jarabadau. Dachiba kʉ̃risiad̶akau Dachi Akõreba dachi jipa nuree unui, dachiba wau panuu kakua.

⁴ Mʉʉba nau kakuad̶e biꞌia waud̶a kakua maka kʉ̃risia b̶uai b̶umina, maka kʉ̃risiakau. Biawãra ab̶auba wau b̶uu kakua Dachi Akõreba jipa unui kʉ̃risiaruubʉrã, ichi audeara mʉʉba aude maka poyaa kʉ̃risia b̶uai b̶uu.

⁵ Mʉ danaba mʉ adaud̶a 8 ewari bad̶akare, mʉ mukĩra chi kakua tõosid̶au. Mʉ israeld̶ebenabʉ, Benjamind̶ebena need̶abʉ. Mʉ nabẽraed̶ebenarã chi biawãra hebreorã basii. Fariseo basiid̶eeba mʉʉba Moisesba b̶ʉd̶a kauwa waubachii.

⁶ Mau judiorã ley ãrea waubachiid̶eeba Cristod̶e ijãa nuree wãraabachii kachirua waui baita. Mau judiorã ley ãrea waubachiid̶eeba ab̶au bid̶a mʉ ʉ̃rʉbena kachirua jarad̶ayuswãe nii.

⁷ Maamina ne joma mʉʉba naed̶e biꞌia unu b̶uad̶a, jãabae Cristod̶e ijãa b̶uud̶eeba mau biꞌia unukau.

⁸ Biawãra mʉ Mechiu Jesucristo kuitaai ne joma audeara bibuara b̶uu. Mʉʉba kʉ̃risia b̶uad̶a ichi kakua joma ida b̶usii. Joma mau nejarr kĩra unusii Cristo kuitaai baita

⁹ maud̶e ichi ome b̶uai baita. Mʉ ichi ome b̶uuwãe chi Moisesba b̶ʉd̶ad̶eeba, maumaarã maka nii Cristoba ichi Akõreba jarad̶a kĩra wausiid̶eeba, dachi kakua biusiid̶eeba. Mʉʉba Cristod̶e ijãa b̶uud̶eeba, Dachi Akõreba mʉ ichi ome uru b̶uu.

¹⁰ Mʉʉba Cristo ãrea unui kʉ̃ria b̶uu. Ichi Dachi Akõre poyaabariid̶eeba chokae jiradusii. Mʉ ara mau poyaabariid̶eeba ichi baara nibai kʉ̃ria b̶uu. Maud̶eeba ichi ãrea biꞌiwãe b̶uad̶a kĩra mʉ sid̶a biꞌiwãe b̶uai kʉ̃ria b̶uu, maud̶e ichi biud̶a kĩra biui kʉ̃ria b̶uu.

¹¹ Maka kʉ̃ria b̶uu Dachi Akõreba mʉ chokae jiradubiid̶eeba.

¹² Mʉʉba jarawẽa b̶uu mʉ jãabae maka nii. Maud̶e jarawẽa b̶uu mʉ jãabae jipa nii. Maamina maka b̶uai baita mʉ id̶iid̶eeba naa wãaruu, Cristo Jesusba mʉ mau baita jidausiid̶eeba.

¹³ Ãbarã, mʉʉba jarawẽa b̶uu mʉ biawãra maka nii; maamina mʉʉba nau wau b̶uu: mʉʉba naed̶e wau b̶uad̶a adua b̶eeped̶a naa pira wãaruu, Cristo kĩra b̶uai baita.

¹⁴ Pira kãrii, chi neei b̶uumaa neei baita, Jesucristod̶eeba ne bia bajãad̶ebena adaui baita, Dachi Akõreba iusiid̶eeba.

¹⁵ Joma dachi Cristo ãrea kuitaa nureerãba ara mau kĩra kʉ̃risiad̶ai panuu. Machiba ãyaa kʉ̃risia panuubʉrã, Dachi Akõreba saka kʉ̃risiad̶ai panuu arakʉd̶e kuitaabiai.

¹⁶ Maamina dachiba kuitaaped̶aad̶a joma waud̶ai panuu.

¹⁷ Ãbarã, mʉ kĩra panásturu. Machi tãed̶e nibasid̶aud̶e daiba unubiasid̶au saka nuread̶ai panuu. Ãbarã maka nuree baara nibásturu.

¹⁸ B̶es ãrea mʉʉba nau machimaa jarasii maud̶e jẽa b̶uuba waya jaraaruu: ẽbẽrarã ãreaba ãchiba wau panuud̶eeba unubiabadau chi Cristo cruzd̶e biud̶a ʉ̃rʉbena bed̶ea kuitaad̶ai kʉ̃riad̶akau.

¹⁹ Maud̶eeba biuduud̶e Dachi Akõreba ãchi joma ichiai. Dachi Akõre ida b̶ubadau, ãchi kakuaba kʉ̃ria b̶uu waud̶ai baita. Mia pera wau panuu ʉ̃rʉbena ãrea berreabadau. Ab̶a nau iujãad̶ebenáturu kʉ̃risiabadau.

²⁰ Maamina dachi bajãad̶ebenarãbʉ. Dachi Karibabarii mamauba neei esed̶au panuu. Mau Dachi Mechiu Jesucristobʉ.

²¹ Ichi neeruud̶e chi kakua biui b̶uu ãyaa waui. Maud̶e ichi kakua kĩra ãrea biꞌia b̶eei. Ichi poyaabariid̶eeba maka waui. Mau poyaabariid̶eeba ichiba ne joma poyaai.