Efesios 2 - Emberá Chamí

Dachi Akõreba Cristod̶eeba dachi karibad̶a

¹ Naed̶e machi biu panasid̶au, ijãad̶awẽa panasid̶aud̶eeba, kachirua waubachid̶aud̶eeba.

² Maka nibasid̶au nau iujãad̶ebena kʉ̃risia ijãa panasiid̶eeba maud̶e jai kachiruarã chi aude mechiu nii ijãa panasiid̶eeba. Id̶ibae ichiba chi Dachi Akõre bed̶ea ijãad̶akaurã ichi juad̶e ua b̶uu.

³ Naed̶e joma dachi ãchi kĩra nibasid̶au nau kakuaba kachirua waubi b̶uu wau panasid̶aud̶eeba. Nau kakuaba kachirua waui kʉ̃ria b̶uu maud̶e dachiba kachirua waui kʉ̃risia b̶uu wau panasid̶au. Dachi kachiruad̶eeba Dachi Akõreba ichi kĩrubid̶eeba dachi kastikai b̶uasii joma kachirua waubadaurã kastikabarii kĩra.

⁴ Maamina Dachi Akõreba ãrea kĩra chuburiabarii. Ichiba dachi ãrea kʉ̃ria b̶uud̶eeba

⁵ kachiruad̶e biu panad̶a Cristo ome ãbua chokae b̶usii. Dachi Akõreba ichi sõbiad̶eeba machi karibasii.

⁶ Jesucristo ome ãbua panuud̶eeba Dachi Akõreba dachi chokae jiradubiasii maud̶e mau ome ãbua bajãad̶e akʉ b̶eebiasii.

⁷ Mau joma wausii kaad̶ebena ewarid̶e ichi ãrea sõbia nii unubii baita. Maud̶eeba dachi chi Jesucristo ome panuurã karibasii.

⁸ Jesusd̶e ijãasid̶aud̶eeba Dachi Akõreba ichi sõbiad̶eeba machi karibasii. Ara machi du ab̶a karibad̶aabasii, maumaarã Dachi Akõréburu bari karibasii.

⁹ Machiba biꞌia wau panuud̶eeba Dachi Akõreba karibaabasii. Maka ab̶au bid̶a ara ichi ʉ̃rʉbena poyaa biꞌia berreabai.

¹⁰ Dachi Akõreba dachi Jesucristod̶eeba chiwid̶i wausii ne bia wau panad̶amera. Mau ne biꞌia waud̶ai panuu, ichiba naed̶e b̶usii dachiba waud̶amera.

Cristod̶eeba judiorã maud̶e judiowãerã Dachi Akõre ome biꞌia paneed̶a

¹¹ Maud̶eeba kĩrabásturu machi judiowãerãd̶ebena adausid̶aud̶eeba, judiorãba machi «mukĩra chi kakua tõod̶awẽa nuree» abachid̶au. Ara ãchi «mukĩra chi kakua tõo nuree» abachid̶au, maamina ab̶a nau kakuad̶éburu ãyaa nuree.

¹² Kĩrabásturu naed̶e machi Cristowãe nureasii maud̶e israeld̶ebenarãwãe basii. Dachi Akõre ãchi ome bed̶ea deasiid̶e ichiba machimaa ab̶a bid̶a deai bad̶a jaraabasii. Mau awara machi saka biꞌia nuread̶aiswãe panasid̶au maud̶e nau druad̶e Dachi Akõreswãe nureasii.

¹³ Maamina jãabae Jesucristo ome panuud̶eeba, machi naed̶e kaitawẽ nuread̶a Dachi Akõreba Cristo oad̶eeba ichi kaita adausii.

¹⁴ Biawãra Cristoba dachi jirukaraayuwãe b̶usii. Ichiba judiorã, judiowãerã ome ãbua b̶usii puuru ab̶a b̶eemera. Ichi biud̶ad̶eeba dachi awara panad̶a ãbua b̶usii.

¹⁵ Moisesba b̶ʉd̶aba ne ãrea waubiabachii judiorã, judiowãerã awara b̶ui baita. Maamina Cristo biud̶ad̶eeba Moisesba b̶ʉd̶a awara b̶usii puuru wid̶i ab̶ad̶e duanad̶amera maud̶e ãbua jirukaraayuwãe duanad̶amera.

¹⁶ Ichi cruzd̶e biud̶ad̶eeba puuru ome b̶uad̶a puuru ab̶a wauped̶a omea Dachi Akõre ome biꞌia b̶usii. Maka dachi awara panad̶a ichiba ãbua biꞌia b̶usii.

¹⁷ Cristo neesii, chi bed̶ea bia Dachi Akõre ome jirukaraayuwãe b̶uai ʉ̃rʉbena machimaa jarai baita, chi Dachi Akõred̶ebena kaitawẽ panad̶amaa maud̶e chi Dachi Akõre kaita panad̶amaa.

¹⁸ Cristod̶eeba dachi omeeba arab̶au Bajãad̶ebena Akõremaa poyaa ara kaita need̶ai, ichi arab̶au Jaurid̶eeba.

¹⁹ Maud̶eeba machi judiowãerã waa drua ãid̶ebenarã kĩra nuread̶aabai, maumaarã Dachi Akõre puurud̶ebenarã ome ãbua panuu; machi ẽbẽrarã Dachi Akõred̶erãbʉ.

²⁰ Machi de mo waud̶a kĩra panuu. Jesusba bʉid̶arã maud̶e Dachi Akõre baita berreabadaurã mau de ekarebena mo kĩra panuu. Mau ded̶ebena mo chi bibuara b̶uu Jesucristobʉ.

²¹ Ichid̶eeba, mo ʉtaa karaa kãrii kĩra, de bia wau kãrii, Dachi Mechiu baita biꞌia b̶eemera.

²² Cristo ome panuud̶eeba machi sid̶a joma ẽbẽrarã Dachi Akõred̶erã baara de arab̶au kĩra nuree. Mau ded̶e Dachi Akõre ichi Jaurid̶eeba b̶uabarii.