Apocalipsis 20 - Emberá Chamí

1.000 años

¹ Mau maad̶akare mʉʉba ángel ab̶a bajãad̶ebena ed̶aa uruu unusii. Mauba eakarr ed̶aa chob̶eabena poraa ewabarii uru b̶uasii. Maud̶e kaena borea b̶uu ichi juad̶e uru b̶uasii.

² Chi dragón jidadauped̶a 1.000 años jʉ̃ kub̶usii. Mau dragón nabẽraed̶ebena damabʉ. Jʉbawãe nii maud̶e Satanás abadau.

³ Angelba mau eakarr ed̶aa chob̶ead̶e jiratasii maabae jʉ̃a kub̶usii ab̶au bid̶a poyaa ewarãad̶amera. Maud̶eeba jʉbawãe niiba drua jomad̶ebenarã waa setaa kũruabai ab̶a 1.000 años wãꞌãeruud̶aa. 1.000 años bad̶akare mau enatai nau iujãad̶e ewari b̶aꞌãra b̶uamera.

⁴ Maabae mʉʉba rey ãkaurã ãrea unusii. Mau ʉ̃rʉ akʉ b̶eemaa Dachi Akõreba dead̶akasii ẽbẽrarãba wauped̶aad̶a ichiad̶amera. Maud̶e ẽbẽrarã boro tʉʉtaped̶aad̶a jauri unusii. Maka boro tʉʉtasid̶au Jesusba jaradead̶a ijãa panuud̶eeba maud̶e Dachi Akõre bed̶ea jaradea panuud̶eeba. Ãchiba ãnimara kachirua nii maud̶e chi ara ichi kĩra juaba ne kaped̶aad̶a ãrea kʉ̃riad̶aabasii. Ichi seña ãchi daub̶ʉʉrʉd̶e juad̶e bid̶a ida waubid̶aabasii. Ãchi chokae jiradud̶aped̶a Cristo baara karrarã 1.000 años paneesid̶au.

⁵ Mau chokae jiraduped̶aad̶a chi Dachi Akõreba naa chokae jiradubiad̶a basii. Waabenarã biuped̶aad̶arã chokae jiradud̶aabasii ab̶a 1.000 años wãꞌãesiid̶aa.

⁶ Ẽbẽrarã Dachi Akõreba naa chokae jiradubiaruu ãrea biꞌia nuread̶ai. Maarã waa biud̶aabai, bari Dachi Akõre maud̶e Cristo paarerã paneed̶ai. Maud̶e 1.000 años Cristo ome chi karrarã nuread̶ai.

Dachi Akõreba Satanás tʉbʉchia kiikaud̶e jiratad̶a

⁷ 1.000 años neeruud̶e Satanás jʉ̃ b̶uad̶a ena b̶eei.

⁸ Mau maad̶akare chi mauba joma druacha setaa kũruakuad̶e wãi. Gog druad̶ebenarã maud̶e Magog druad̶ebenarã setaa kũruakuad̶e wãi. Mau druad̶ebenarã kokoroarã mar ibu kĩra ãrea panuu uad̶oi ẽbẽrarã Dachi Akõred̶erã ome chĩod̶amera.

⁹ Joma nau iujãad̶e wãd̶ai. Maabae Dachi Akõreba kʉ̃ria b̶uu puuru maud̶e ichi ẽbẽrarã duanuumaa ad̶u jũrad̶ai. Maamina Dachi Akõreba bajãad̶ebena tʉbʉchia b̶aebiai. Mauba chi maarã joma baa kenai.

¹⁰ Mau maad̶akare Dachi Akõreba jʉbawãe nii ẽbẽrarã setaa kũrua uru b̶uad̶a chob̶ea mar kĩra azufre bara aoko nub̶uud̶e jiratai. Naed̶e Dachi Akõreba ãnimara kachirua b̶uu, Dachi Akõre baita berreabarii chi biawãrawãe sid̶a mau tʉbʉ aokod̶e jiratasii. Chi maarã maud̶e jʉbawãe nii sid̶a ewaricha ãyadaa maud̶e ẽsabud̶e ãrea biꞌiwãe panad̶ai.

Rey ãkau torroa mechiu nub̶uud̶eeba nebʉra ichiakuai

¹¹ Mau maad̶akare mʉʉba rey ãkau mechiu torroa b̶uu maud̶e chi maud̶e akʉ b̶uu unusii. Ichi daad̶e joma nau iujãa maud̶e bajãa wãꞌãesii. Ab̶au bid̶a waa unud̶aabasii.

¹² Maud̶e mʉʉba unusii biuped̶aad̶arã chi mechiurã maud̶e chi kaebeurã Dachi Akõre rey ãkau daad̶e akʉ topanuu. Maud̶e chi b̶ee karta ewakuasii. Maabae june ab̶a karta ewasii. Mau kartad̶e ẽbẽrarã ewaricha chokae nuread̶ai trʉ̃ b̶ʉ kub̶uasii. Dachi Akõreba chi biuped̶aad̶arã joma ichiasii ãchiba wauped̶aad̶a kĩra, chi maarã kartad̶e b̶ʉ kub̶uad̶a kĩra.

¹³ Joma chi mard̶e biuped̶aad̶arã Dachi Akõre daad̶e imisid̶au. Joma chi biuped̶aad̶a ãchi panabadaumarebena Dachi Akõre daad̶e imisid̶au. Maabae Dachi Akõreba ãchi ab̶aab̶aa ichiai ãchiba wauped̶aad̶a kĩra.

¹⁴ Dachi Akõreba chi biud̶ai joma wãꞌãebisii ea chob̶ead̶e azufre bara aoko nub̶uud̶e jirataaruu kĩra. Biuped̶aad̶a panabadaumarebena sid̶a aria jiratasii. Mau ea chob̶ead̶e azufre bara aoko nub̶uu b̶es ome biui jara b̶uu.

¹⁵ Chi ẽbẽrarã trʉ̃ chi ewaricha chokae duanabarii kartad̶e wãꞌãerã Dachi Akõreba mau ea chob̶ead̶e azufre bara aoko nub̶uud̶e jiratasii.