Apocalipsis 18 - Emberá Chamí

Dachi Akõreba Babilonia kastikai ʉ̃rʉbena

¹ Mau maad̶akare mʉʉba june ab̶a ángel bajãad̶ebena ed̶aa uruu unusii. Mau chi mechiu nibasii. Ichi ted̶echoaba nau iujãa ʉ̃d̶aasii.

² Naka jĩwa jarasii: «¡Babilonia puuru mechiu ãrisii! ¡Biawãra joma ãrikuasii! Ẽbẽrarã duanad̶amare, bari jãma chi jai kachirua nuréturu duanuu. Jãma joma jairã kachirúaturu duanuu. Joma chi Dachi Akõremaarã ibanarã miadáturu jãma duanuu.

³ Mau puurud̶ebenarãba mia kĩra nejasia wau panuud̶eeba, drua aꞌawaraabenamaa ara mau kĩra kachirua waubiasid̶au uva b̶aa asia doobai panuud̶e dobiaduu kĩra. Maud̶e reyrã joma druachad̶ebenarãba ara mau kĩra waubiasid̶au wẽra aud̶uabarii ome kachirua wau panuu kĩra. Chi nau iujãad̶ebena ne kaebea nedobadau barau duaneesii, mau puurud̶ebenarãba ne kaebea chi aude chi bia ãrea adaud̶ai kʉ̃ria panasiid̶eeba».

⁴ Maabae mʉʉba ũrisii ab̶auba bajãad̶ebena naka jaraaruu: «Mʉ ẽbẽrarã, Babiloniad̶ebena wãurísturu mau puurud̶ebenarãba kachirua wau panuu waurãad̶amera. Maka Dachi Akõreba maarã kastikakuaruud̶e, machi kastikaabai.

⁵ Mau puurud̶ebenarãba kachirua ãrea waumaa panuu. Maarã kachirua bajãad̶e neesid̶au, ab̶au ʉ̃rʉ ʉtaa pewãaduu kĩra. Dachi Akõreba ãchiba kachirua wauped̶aad̶a kĩrabai ida b̶uwẽa b̶uu.

⁶ Jãu puuru kachirua wáusturu waabenarãmaa makasid̶au kĩra. Chi mauba jãka waabenarãmaa miadaa wausii baerã, b̶es ome kachirua wáusturu. Chi mauba waabenarãmaa miadaa wausii uva b̶aa asia doobai b̶uud̶e dobiaruu kĩra. Maud̶eeba maumaa b̶es ome miadaa wáusturu, uva b̶aa asia doobai b̶uud̶e b̶es ome dobiaruu kĩra.

⁷ Mau puuru ãrea biꞌiwãe paneebísturu maud̶e ãrea kĩra nomaabísturu, ãchi puuru mechiu b̶uu a panuud̶eeba maud̶e ne biꞌia ãrea uru panuu a panuud̶eeba. Mau puurud̶ebena naka kʉ̃risia duanuu. “Mʉ chi reina ãkaud̶e akʉ b̶uu kĩra nii. Mʉ ab̶a pẽdrãa kĩra niiwãe. Mʉ biꞌiwãe b̶uabai”.

⁸ Maud̶eeba ewari ab̶aburu kĩra nomaa jẽai, jarrbisiaba kachirua b̶uai, maud̶e biui. Dachi Akõre Mechiu chi joma poyaabariiba mau puuru joma ãriped̶a baabʉʉi».

⁹ Reyrã drua jomad̶ebenarãba jãu puurud̶ebenarã ome kachirua waubachid̶au wẽra aud̶uabarii ome kãi b̶eeruu kĩra. Maarã sid̶a barau paneesii mau puurud̶e ne bia wãꞌãekaraa uru panad̶a adausid̶aud̶eeba. Maud̶eeba chi mau puuru baawãmaa b̶uud̶e nari unuuduud̶e maarã ẽrod̶ai.

¹⁰ Wapead̶ai Dachi Akõreba Babilonia puuru kastikad̶a kĩra maarã kastikakuai. Maud̶eeba kaitawẽeba ichia kopanuuba naka jarad̶ai: «¡Miichuburi, Miichuburi, Babilonia puuru mechiu ne joma waubadaud̶eeba! Dachi Akõreba mau puuru kãꞌãabariwãed̶e kastikai».

¹¹ Nau druad̶ebena ne kaebea nedobʉibadaurã jẽad̶ai mau puuru kakua ãchiba nedobʉi panuu kaiba nedod̶ai wãꞌãe baid̶eeba.

¹² Mau puurud̶e ne joma nedobʉibachid̶au: Nee, parata, mo dod̶aa mipitaa maud̶e perla chi nejarr ãrea id̶ibadau, lino maud̶e seda paru chi aude chi bia, paru pupuchia, paru purr, bakuru tuwaa b̶ee, ne elefante kid̶a waud̶a, ne bakuru chi nejarr ãrea id̶ibadau waud̶a, bronce waud̶a, ne jiorr waud̶a maud̶e ne mármol mokara waud̶a.

¹³ Canela, joma barikiu ne tuwaa, incienso ne tuwaa, mirra ne tuwaa, kera, uva b̶aa, olivo drabirua, harina biꞌia b̶ad̶a, trigo, pakarã, oejarã, murarã maud̶e karretarã nedobʉibachid̶au. Maud̶e mau puurud̶e ẽbẽrarã sid̶a nedobʉibachid̶au chibari baita bari trajabadaurã nuread̶amera.

¹⁴ Joma mau nedobʉibadaurãba naka jarad̶ai: «Joma mau puurud̶ebenarãba kʉ̃ria panad̶a jãabae wãꞌãesii. Chi nejarra ãrea uru panad̶a maud̶e chi ne bia nuree ãrea uru panad̶a joma wãꞌãesii. Waa makaa adaud̶aabai».

¹⁵ Biawãra mau puurud̶aa ne kaebea nedobʉid̶e wãped̶aad̶a ãrea barau paneesii. Chi maarã wapea panad̶ai Dachi Akõreba mau puuru kastikad̶a kĩra ãchi sid̶a kastikaid̶eeba. Maud̶eeba kaitawẽeba ichia kopanuuba naka biuchaa jẽasid̶au:

¹⁶ «¡Miichuburi, Miichuburi jãu puuru mechiu b̶uad̶a! Jãu puuru wẽra lino paru chi aude chi bia jʉ̃ b̶uad̶a kĩra b̶uasii. Wẽra paru pãaraa maud̶e puria jʉ̃ b̶uu kĩra b̶uasii. Ne kaebea nee waud̶a, mo dod̶aa mipitaa maud̶e perla chi nejarr ãrea id̶ibadau jʉ̃ b̶uasii.

¹⁷ Maamina mau puurud̶e ne bara b̶uad̶a kãꞌãabariwãed̶e wãꞌãesii». Joma chi jãba adoebadaurã, jãbad̶e wãbadaurã, jãbad̶e trajabadaurã maud̶e mau mard̶e trajabadaurãba kaitawẽeba ichia duanad̶ai.

¹⁸ Mau puuru baa nub̶uu nari unuuduud̶e jĩwa naka jarad̶ai: «¿Sãu puuru jãu puuru kĩra b̶uasma?»

¹⁹ Nomaaba ãchi boro ʉ̃rʉ ioro jora kuikuad̶ai maabae jĩwa naka jẽad̶ai: «¡Miichuburi, Miichuburi jãu puuru mechiu b̶uad̶a! Jãu puuru ne bara b̶uasiid̶eeba, joma chi jãba uru b̶ead̶a aria barau duaneesii. Maamina jãu puuru kãꞌãabariwãed̶e joma ãrisii.

²⁰ ¡Joma bajãad̶e duanuu kĩrajʉ́sturu, jãu puuru ãrisiid̶eeba! Ẽbẽrarã Dachi Akõred̶erã, Jesusba bʉid̶arã maud̶e Dachi Akõre baita berreabadaurã kĩrajʉ́sturu. Dachi Akõreba jãu puuru kastikai machimaa miadaa wausiid̶eeba».

²¹ Maabae ángel mechiuba mo mechiu kũruma kĩra b̶uu mard̶e jiratasii. Makamaa b̶uud̶e naka jarasii: «Maka mʉʉba mau mo mard̶e jiratad̶a kĩra Babilonia puuru mechiu kãꞌãabariwãed̶e joma ãrii. Mau puuru waa unud̶aabai.

²² Aria arpa, purrsiru maud̶e kachu chaaduu waa ũrid̶aabai. Ẽbẽrarã kariiduu sid̶a waa ũrid̶aabai. Ẽbẽrarãba ne kabadaurã waa unud̶aabai. Kũrumad̶e ne b̶aaduud̶e jĩwaaruu sid̶a waa ũrid̶aabai.

²³ Ʉ̃d̶aa koabarii waa unud̶aabai. Miakãiduud̶e kĩrajʉʉbadau waa ũrid̶aabai. Arabena ne kaebea nedobʉibadaurã nau iujãad̶e chi mechiu nureasii. Ariabena jaibanarãba druachabenarã joma setaa kũruabachid̶au.

²⁴ Dachi Akõre baita berreabadaurã beaped̶aad̶a, ẽbẽrarã Dachi Akõred̶erã beaped̶aad̶a, maud̶e joma nau iujãad̶e nuread̶a beaped̶aad̶a kakua mau puurud̶ebena nebʉrad̶e duanuu».