Apocalipsis 14 - Emberá Chamí

144.000 ẽbẽrarã kariped̶aad̶a

¹ Mau maad̶akare mʉʉba chi Oeja Kaebe Nii Sión ead̶e ʉkʉ nub̶uu unusii. Chi mau baara 144.000 ẽbẽrarã panasii. Ãchi daub̶ʉʉrʉd̶e chi Oeja Kaebe Nii trʉ̃ maud̶e ãchi Akõre trʉ̃ b̶ʉ uru panasii.

² Maabae mʉʉba bajãad̶e do ʉrʉrʉa kĩra ũrisii, bã ʉrʉrʉa kĩra. Chi mʉʉba ũrisii, arpa chaamaa panuud̶e jĩwabarii kĩra b̶uasii.

³ Maud̶e chi Dachi Akõre chi rey ãkau daad̶e kari wid̶i karimaa panasid̶au, chi kimare chokae nuree daad̶e, maud̶e 24 chõrarã mechiurã daad̶e. Ab̶au bid̶a poyaa kuitaabasii mau kari karii baita. Bari chi 144.000 Dachi Akõreba nau iujãad̶ebena karibakuad̶áburu karid̶ai kuitaa panasii.

⁴ Maarã ẽbẽrarã wẽra aud̶ua nureasii. Dachi Akõre baita maarã b̶aꞌãra bid̶a kachiruaswãe nureasii. Maarã chi Oeja Kaebe Nii baara chi wãaruumaa wãbadau. Dachi Akõreba nau iujãad̶ebena chi maarã ichi baita karibakuasii, ichi baita maud̶e chi Oeja Kaebe Nii baita bid̶a panad̶amera chi nabena chaud̶a ichimaa dearuu kĩra.

⁵ Maarãba b̶es ab̶a bid̶a setaa jarad̶akau. Bari kachiruaswãe nuree.

Chi angelerã õbea panuurãba jaraped̶aad̶a

⁶ Mau maad̶akare mʉʉba ángel ab̶a bajãad̶e ũub̶ari nii unusii. Mauba chi bed̶ea bia uru b̶uasii chi nau iujãad̶ebena jomaurãmaa jarai baita: puurud̶ebenarãcha, druad̶ebenarãcha, ẽbẽrarã didiwaraacha maud̶e bed̶ea didiwaraacha. Mau bed̶ea ewaricha maka b̶uai.

⁷ Mauba jĩwa naka jarasii: «¡Dachi Akõre wapeásturu! Ichíturu chi mechiu nii ásturu, ichiba kastikai ewari neesiid̶eeba. Bajãa, iujãa, mar maud̶e bania iorod̶e bumadrubarii waud̶ad̶eeba, mau biꞌia berreásturu».

⁸ Mau ángel kaad̶e neeped̶a naka jĩkua jarasii: «Babilonia puuru mechiu ãrisii. Biawãra joma ãrikuasii. Chi mau puurud̶ebenarãba ãrea mia kĩra nejasia wau panuud̶eeba drua aꞌawaraabenamaa ara mau kĩra kachirua waubiasid̶au uva b̶aa asia doobai panuud̶e dobiaduu kĩra».

⁹ Mau ángel wãd̶akare kaad̶e june ab̶a ũub̶ari neesii. Mauba naka jarasii: «Ab̶auba chi mau ãnimaramaa biꞌia berrearuubʉrã maud̶e chi ara ichi kĩra juaba ne kaped̶aad̶amaa biꞌia berrearuubʉrã, maud̶e chi seña daub̶ʉʉrʉd̶e maebʉrã juad̶e ida waubiiruubʉrã,

¹⁰ Dachi Akõreba ichi kĩruuruuba mau ẽbẽra kachirua ãrea b̶ui uva b̶aa asia dobiiruu kĩra. Mau ẽbẽra chi ángel biꞌia nuree daad̶e, maud̶e Oeja Kaebe Nii daad̶e azufre aoko nub̶uuba ãrea biꞌiwãe b̶uai.

¹¹ Mau ẽbẽra ãrea biꞌiwãe b̶uumaa aoko nub̶uu id̶i kiikau, bari ewaricha bod̶iu nub̶uabarii. Ab̶auba chi ãnimara maud̶e chi ara ichi kĩra juaba ne kaped̶aad̶a ãrea kʉ̃riaruubʉrã, kʉrrjĩruswãe b̶uai. Chi mau ãnimara seña juad̶e waubiped̶aad̶a maebʉrã daub̶ʉʉrʉd̶e ãyadaa maud̶e ẽsabud̶e kʉrrjĩruswãe b̶uai».

¹² Maud̶eeba ẽbẽrarã Dachi Akõred̶erã ãrea dauchia jãadua panad̶ai panuu. Jesusd̶e ãrea ijãad̶aped̶a, ichiba waubi b̶uu bed̶ea ũribaba panad̶ai panuu.

¹³ Mau maad̶akare mʉʉba bajãad̶e ab̶aba jaraaruu ũrisii: «Chi kartad̶e naka b̶ʉse: “Id̶iid̶eeba chi Dachi Mechiud̶e ijãa biubadaurã biꞌia panad̶ai”». Maud̶e Dachi Akõreba naka jarasii: «Biawãra biꞌia panad̶ai. Maarã biꞌiwãe panad̶ad̶ebena kʉrrjĩru panad̶ai, maarãba biꞌia wauped̶aad̶a waa chau kãriid̶eeba».

Dachi Akõreba ẽbẽrarã kastikai ʉ̃rʉbena

¹⁴ Mau maad̶akare mʉ bajãad̶aa ichiasiid̶e jʉ̃rʉara torr unusii. Mʉʉba chi Ẽbẽra Ba B̶uad̶a kĩra mau jʉ̃rʉara ʉ̃rʉ akʉ b̶uu unusii. Boro jũra nee waud̶a jʉ̃ b̶uasii. Ichi juad̶e neko peed̶ea jũria b̶uu uru b̶uasii.

¹⁵ Maud̶e Dachi Akõre de mechiu bajãad̶e kub̶uareeba ángel ab̶a awara neesii. Chi mauba jʉ̃rʉara ʉ̃rʉ akʉ b̶uasiimaa naka jĩwa b̶ia jarasii: «Iujãad̶e uud̶a joma waraa kub̶uu. Bichi neko jũria b̶uuba tarise chi tarii ewari basiid̶eeba».

¹⁶ Ara makʉd̶e chi jʉ̃rʉara ʉ̃rʉ akʉ b̶uad̶aba neko jũria b̶uuba ara jua ab̶a tuuruba joma nau iujãad̶e tarisii.

¹⁷ Maabae Dachi Akõre de mechiu bajãad̶e kub̶uud̶ebena ángel ab̶a maucha awara neesii. Mau bid̶a neko peed̶ea jũria b̶uu ab̶a uru b̶uasii.

¹⁸ Maabae chi Dachi Akõre baita bajãad̶e kera baa deabadaumarebena june ab̶a ángel awara neesii. Maud̶eeba chi tʉbʉchia aoko uru b̶uabarii chi kera baai baita. Naka jĩwa jarasii chi neko peed̶ea jũria uru b̶uumaa: «Chi iujãad̶ebena uva waraa kub̶uud̶eeba, bichi neko jũria b̶uuba joma tuukuase».

¹⁹ Ara makʉd̶e chi angelba chi neko jũria b̶uuba jua ab̶a tuuped̶a chi uva b̶ʉʉrʉcha araa pesii. Maabae chi uva biraduabadaumare bʉikasii biraduad̶amera chi b̶aa adaud̶ai baita. Mau jara b̶uu Dachi Akõreba kastikai.

²⁰ Chi uva Jerusalén puuru awara biraduasid̶au. Biraduasid̶aud̶e mamabena oa ãrea chesii. Mau oa chi id̶ubena ʉtʉ mura okarrd̶e jʉ̃badaumaa ba b̶uasii.