3 Juan 1 - Emberá Chamí

Ãba Gayoba biꞌia waud̶a

¹ Mʉ Chõrabʉ. Mʉʉba nau karta b̶ʉʉruu mʉ ãba Gayo baita. Mʉʉba bichi biawãra kʉ̃ria b̶uu.

² Ãba, mʉʉba Dachi Akõremaa ʉtaa id̶i b̶uu bichi ichi ome biꞌia b̶uud̶eeba ne jomad̶e biꞌia b̶uamera maud̶e kakua biꞌia b̶uamera.

³ Mʉ ãrea kĩrajʉʉsii, waabenarã ãbarã mʉʉmaa neeped̶aad̶aba nebʉrʉsid̶aud̶eeba bichiba chi biawãra bed̶ea ijãa b̶uu.

⁴ Mʉ ãbarãba chi biawãra bed̶ea ijãa panuu ũriiruud̶e, mʉ ãrea kĩrajʉʉ b̶uabarii.

⁵ Ãba, bichiba ãbarã aid̶a b̶uud̶eeba biꞌia wau b̶uu. Chi bichiba unukau ãbarã sid̶a aid̶abariid̶eeba biawãra ãrea biꞌia wau b̶uu.

⁶ Ãbarã araa ãbua imisid̶aud̶e, jomaurã daad̶e maarãba bichi kʉ̃ria panuu ʉ̃rʉbena nebʉrʉsid̶au. Mʉ kĩra chuburiáse, ãchi aid̶ase biꞌia wãd̶amera Dachi Akõreba ichi traju waubadaurã aid̶abiabarii kĩra.

⁷ Ãchiba Jesucristo ʉ̃rʉbena jaradead̶e wãsid̶aud̶e, chi Dachi Akõred̶e ijãad̶akaurãd̶ebena ne adaud̶aabasii.

⁸ Maud̶eeba dachiba mau ãbarã biꞌia aid̶ad̶ai panuu. Maka ãchi ome ãbua traja panuu chi biawãra bed̶ea kuitaabiad̶ai baita.

Ãba Diotrefesba kachirua waud̶a

⁹ Mʉʉba naed̶e karta b̶ʉsii joma ãbarã mamabena baita. Maamina Diotrefesba dai bed̶ea ijãawẽa nii. Ichi ãbarã tãed̶e chi mechiu nibai kʉ̃ria b̶uu.

¹⁰ Maud̶eeba mamaa wãaruud̶e mʉʉba jomaurãmaa kuitaabiai ichiba kachirua wau b̶uu. Ichiba dai ʉ̃rʉbena setaa kachirua jarabarii. Mau awara chi ãbarã mamaa wãaduu ichiba biꞌia irsibiabikau maud̶e chi ãbarãba ãchi ded̶e biꞌia irsibi kʉ̃ria panuud̶e ida b̶ukau. Maarã biꞌia irsibiiduubʉrã mau ãbarã duabʉikabarii.

Ãba Demetrio ʉ̃rʉbena biꞌia b̶ʉd̶a

¹¹ Ãba, chi kachirua waubadau kĩra waurã́se maumaarã biꞌia wause. Chi biꞌia waubarii Dachi Akõred̶ebʉ, maamina chi kachirua waubariiba Dachi Akõre adua b̶uu.

¹² Ãba Demetrio ʉ̃rʉbena jomaurãba biꞌia berrea panuu. Chi biawãra bed̶ea ijãa b̶uud̶eeba unubia b̶uu ichi jipa nii. Dai bid̶a ichi ʉ̃rʉbena biꞌia kʉ̃risia panuu. Machiba kuitaa panuu daiba jara panuu biawãrabʉ.

Juanba nau kartad̶e aanama b̶ʉd̶a

¹³ Mʉʉba ne ãrea bichimaa jara kʉ̃ria b̶umina kartad̶e b̶ʉwẽma.

¹⁴ Isa bichi ichiad̶e wã kʉ̃ria b̶uu. Maabae ãbua berread̶ai.

¹⁵ Mʉʉba kʉ̃ria b̶uu Dachi Akõreba ichi jirukaraayuwãe b̶uabii. Chi namabena ãbarãba kʉ̃ria panuu bichi biꞌia b̶uai. Jãmabena ãbarãmaa ãchi kakawaa jarakuase mʉʉba kʉ̃ria b̶uu ãchi biꞌia duanad̶ai.