2 Corintios 9 - Emberá Chamí

Ãbarã Jerusalend̶ebena baita chi nejarra peped̶aad̶a

¹ Machiba ãbarã Jerusalend̶ebena baita chi nejarra pe panuu ʉ̃rʉbena mʉʉba nau kartad̶e waa b̶ʉʉbai b̶uu,

² mʉʉba kuitaa b̶uud̶eeba machiba aid̶a kʉ̃ria panuu. Maud̶eeba nama Macedonia druad̶e mʉʉba ãbarãmaa machi ʉ̃rʉbena biꞌia berreabarii. Mʉʉba ãchimaa jarabachii nabena año basid̶eed̶ebena machi Acaya druad̶ebenarãba aid̶ad̶ai baita panuu. Maka ũrisid̶aud̶eeba ãbarã ãrea Macedoniad̶ebenarãba ara mau kĩra aid̶ad̶ai kʉ̃ria panuu.

³ Maud̶eeba mʉʉba nau ãbarã machimaa bʉiruu chi mʉʉba machi ʉ̃rʉbena biꞌia jarad̶a setawãe b̶uu maumaarã machiba biawãra dead̶ai baita panad̶ai.

⁴ Maka waud̶awẽebʉrã, chi nuree Macedoniad̶ebena ãbarã mʉ baara machimaa wãaduud̶e machiba chi nejarra ped̶awẽa panuu unud̶ai basii. Maud̶eeba dai kĩra nejasiad̶ai, kʉ̃risia panuud̶eeba machiba biawãra ped̶ai bad̶a. Maud̶e machi sid̶a ãrea kĩra nejasiad̶ai.

⁵ Maud̶eeba mʉʉba naarã ãbarãmaa chi chuburia id̶isii mʉ naa machimaa jarad̶e wãd̶amera machiba sõbiad̶eeba dead̶ai aped̶aad̶a joma ped̶amera. Maka mʉ neeruud̶e mau joma uru panad̶ai. Mauba unubiad̶ai daiba deábad̶e ad̶awẽa panuu, maumaarã machiba sõbiad̶eeba deasid̶au.

⁶ Nau kĩrabásturu: «B̶aꞌãra uuruuba b̶aꞌãra junai. Ãrea uuruuba ãrea junai».

⁷ Ẽbẽraba ab̶aab̶acha deai b̶uu ichi sõd̶e kʉ̃risia b̶uu kĩra. Deamaa b̶uud̶eeba deabai b̶uu, maebʉrã deábad̶e a panuud̶eeba deabai b̶uu. Chi kĩrajʉʉba dea b̶uu Dachi Akõreba kʉ̃ria b̶uu.

⁸ Biawãra Dachi Akõreba ne joma machimaa ãrea poyaa deai. Maka ewaricha ne jomad̶e machiba uru nuread̶ai panuu biawãra uru panad̶ai maud̶e joma biꞌia waud̶ai baita.

⁹ Dachi Akõre bed̶ead̶e naka b̶ʉ kub̶uu: «Ichiba dead̶akasiid̶e chi nejarra barauwãe nureerãmaa ãrea deasii. Ewaricha ichiba jipa waubarii».

¹⁰ Dachi Akõreba netaa deabarii uud̶amera. Kod̶ai baita bid̶a deabarii. Netaa ãrea deabarii kĩra uud̶amera, ichiba joma ãrea machimaa deai waabenarã ãrea aid̶ad̶amera. Maud̶e jipa wau panuud̶eeba ne biꞌia ãrea unud̶ai, ne uud̶a ãrea chaubarii kĩra.

¹¹ Biawãra Dachi Akõreba machimaa ne joma ãrea deai waabenarã sõbiad̶eeba poyaa aid̶ad̶amera. Maabae machiba dai ome chi nejarra urubʉiduu ʉ̃rʉbena ãbarãba Dachi Akõremaa ichíturu kid̶ibai ad̶ai.

¹² Machiba chi nejarra deaduuba ab̶aburu aid̶ad̶aabai ãbarã barauwãe panuuba uru panad̶amera, maumaarã mau kakua ãchiba Dachi Akõremaa ãrea ichíturu kid̶ibai a panad̶ai.

¹³ Machiba maka aid̶a panuuba, maka unubi panuu chi bed̶ea bia Cristo ʉ̃rʉbena biawãra ijãa panuu. Sõbiad̶eeba chi ãbarãmaa dea panuu maud̶e jomaurã aid̶a panuu. Maud̶eeba Dachi Akõremaa biꞌia berread̶ai.

¹⁴ Dachi Akõreba ichi sõbiad̶eeba machi ãrea aid̶asii maarã aid̶ad̶amera. Maud̶eeba ãchiba machi ãrea kʉ̃ria panuud̶eeba Dachi Akõremaa machi baita ʉtaa id̶i panad̶ai.

¹⁵ Biawãra Dachi Akõreba mau dead̶a kakua dachiba Dachi Akõremaa ichíturu kid̶ibai ad̶ai panuu. Mau dead̶a aude biꞌia b̶uud̶eeba dachiba poyaa kuitaa jarad̶aabai saka b̶uu.