2 Corintios 11 - Emberá Chamí

Jesucristoba bʉid̶arã kĩra nuree

¹ Mʉ kʉ̃risiaswãe nii kĩra berrea b̶umina kʉ̃ria b̶uu machiba dauchia jãadua panad̶ai. Mʉ chi chuburia id̶iiruu mʉʉba jaraaruu ũrísturu.

² Dachi Akõreba nubia b̶uu kĩra mʉʉba machi ãrea nu kʉ̃ria b̶uu. Ẽbẽraba ichi kau kima dearuu kĩra mʉʉba machi Cristomaa dea kʉ̃ria b̶uu ara ichid̶irã nuread̶amera. Mʉʉba kʉ̃ria b̶uu machi ichi baita ãrea biꞌia nuread̶ai ãwera mukĩra adua b̶uu kĩra.

³ Maamina mʉʉba wapea b̶uu waabenarãba machi setaa kũruad̶ai damaba kʉ̃risia kuitaad̶eeba Eva setaa kũruad̶a kĩra. Makarã machiba Cristod̶e biawãra sõd̶eeba ijãa panuu ida b̶ud̶ai.

⁴ Dai diware nuree need̶aba Jesús ʉ̃rʉbena daiba jaradeaped̶aad̶a awara jaradearuud̶e maebʉrã chi Dachi Akõre Jauri machiba adauped̶aad̶a ʉ̃rʉbena awara jaradearuud̶e machiba kauwa ũribadau. Maud̶e chi bed̶ea bia machiba ijãaped̶aad̶a awara jaradearuud̶e kauwa ũribadau.

⁵ Chi maka jaradeabadaurã ¿machimaarã, jãarã Jesucristoba bʉid̶arã chi aude bibuararãka? Mʉʉmaarã, ãchi audeara mʉ chi aude kaebeu b̶uwãema.

⁶ Mʉ biꞌia berreakamina, biawãra bed̶ea ãrea kuitaa nii. Mau biawãra bed̶ea daiba nejomad̶eeba machimaa arakʉd̶e kuitaabiasid̶au.

⁷ Mʉʉba chi bed̶ea bia Dachi Akõre ʉ̃rʉbena machimaa chi nejarra id̶iyuswãe jaradeasiid̶eeba mʉ machi daad̶e kaebeu kĩra b̶eesii Dachi Akõre ome biꞌia nuread̶amera. ¿Makarã kachirua wauska?

⁸ Waabena ãbarãba chi nejarra mʉʉmaa deasid̶au machimaa poyaa ãrea jaradea b̶uamera.

⁹ Mʉ machimare b̶uasiid̶e ne joma uru b̶uabasmina machimaa ne id̶iibasii. Maumaarã mʉʉba wãꞌãe b̶uad̶a ãbarã Macedoniad̶ebena neeped̶aad̶aba joma mʉʉmaa deasid̶au. Mʉʉba ne ab̶a bid̶a machimaa id̶iibasii maud̶e id̶iwẽa b̶uai.

¹⁰ Cristo mʉ sõd̶e b̶uud̶eeba biawãra jaraaruu: Mʉʉba machid̶eeba chi nejarra adauwẽa b̶uu aaruud̶e, chi waabenarã audeara nii kĩra jara b̶uu. Acaya druad̶ebenarã ab̶au bid̶a poyaa jarad̶aabai mʉʉba maka jaraabai b̶uu.

¹¹ ¿Mʉʉba sakãe maka chi nejarra id̶iwẽa b̶uma? ¿Machi kʉ̃riawẽa b̶uud̶eeba maka wau b̶uka? Dachi Akõreba kuitaa b̶uu mʉʉba machi kʉ̃ria b̶uu.

¹² Ara mʉʉba waubarii kĩra wau b̶eei. Chi dai kĩra wau panuu abadaurãba maka berreabadau waabenarã audeara nuree a kʉ̃risia panuud̶eeba. Maamina ab̶au bid̶a poyaa jarad̶aabai dai kĩra wau panuu.

¹³ Ãchi Cristoba bʉid̶arãwãema, maumaarã waabenarã setaa kũruabadaurãbʉ. Setad̶eeba kʉ̃risiabiabadau ãchi Cristoba bʉid̶arã.

¹⁴ Jãarã ʉ̃rʉbena machiba kauwa kʉ̃risiad̶ai adua panuuwãema. Satanás sid̶a ángel ʉ̃d̶aad̶ebena kĩra neebarii.

¹⁵ Maud̶eeba ichi baita bari trajabadaurã bid̶a jipa wau panuu kĩra needuubʉrã machiba kʉ̃risiad̶aabai panuu saka jãka needuu. Maamina ãchi biud̶ai ewarid̶e ãchiba kachirua wauped̶aad̶a kĩra kastikai.

Pablo ãrea biꞌiwãe b̶uu tãed̶e kĩrajʉʉd̶a

¹⁶ Mʉʉba waya jaraaruu: ab̶au bid̶a kʉ̃risiabai b̶uu mʉ kʉ̃risiaswãe nii. Maamina maka kʉ̃risiaduubʉrã, mʉ kʉ̃risiaswãe nii kĩra ida berreabísturu mʉa bid̶a ara mʉ ʉ̃rʉbena b̶istĩika biꞌia berreai baita.

¹⁷ Ara mʉ ʉ̃rʉbena biꞌia berrea b̶uud̶e Dachi Mechiuba maka berreabiwẽa b̶uu, maumaarã mʉ kʉ̃risiaswãe nii kĩra berrea b̶uu.

¹⁸ Ãreaba ara ãchi ʉ̃rʉbena ãrea berreabadau nau iujãad̶ebenarãba waubadau kĩra. Maud̶eeba mʉa bid̶a ara mʉ ʉ̃rʉbena biꞌia berreai.

¹⁹ Machi kʉ̃riskawa nureed̶eeba nau kʉ̃risiaswãe niiba jaradea b̶uu machiba dauchia jãadua panabadau.

²⁰ Machi ãchi baita bari trajabadaurã kĩra paneebiaduud̶e, machi kod̶ai bad̶a kooduud̶e, machid̶e juakaa adauduud̶e, maarãba machi aude bibuara nuree kʉ̃risiaduud̶e maebʉrã machi kĩedarr sĩiduud̶e machiba ida kabibadau.

²¹ Mʉʉba jaraaruu: mʉ machi tãed̶e b̶uasiid̶e, jãarã kĩra b̶uabasii. Machimaarã, mʉ maka chi poyaabariiswãe b̶uad̶a kakua, ¿nejasia b̶uai b̶uka? Ab̶auba ara ichi ʉ̃rʉbena poyaa biꞌia berrearuubʉrã, mʉa bid̶a ara mʉ ʉ̃rʉbena poyaa biꞌia kʉ̃riai. Maamina maka berrearuud̶e kʉ̃risiaswãe nii kĩra berreai b̶uu.

²² Ãchi hebreorã a panuu. ¿Mʉ sid̶a arab̶auwãeka? Ãchi Israeld̶ebenarã a panuu. ¿Mʉ sid̶a arab̶auwãeka? Ãchi Abrahamd̶ebena imiped̶aad̶arã a panuu. ¿Mʉ sid̶a arab̶auwãeka?

²³ Ãchi Cristo baita bari trajabadaurã a panuu. Maamina ãchi audeara mʉʉba biꞌia Cristoba kʉ̃ria b̶uu waubarii. Maka berrea b̶uud̶e kʉ̃risiaswãe nii kĩra berrea b̶uu. Biawãra ãchi audeara mʉʉba Dachi Akõre traju audeara waubarii. Ãchi audeara ẽbẽrarãba mʉ b̶es ãrea sĩsid̶au. Ãchi audeara mʉ b̶es ãrea jʉ̃a uru panasid̶au. B̶es ãrea mʉ biumaa b̶uasii.

²⁴ B̶es jua ab̶a judiorãba mʉ jidausid̶au. Jidauduucha soaba 39 b̶es pesid̶au.

²⁵ B̶es õbea mʉ jidaud̶aped̶a bakuruba usid̶au. B̶es ab̶a mʉ mooba b̶atasid̶au bead̶ai baita. B̶es õbea mʉ mard̶e wãsiid̶e, jãba taawãsii. B̶es ab̶a ãyadaa maud̶e ẽsabud̶e mʉ mar ẽsa ũu b̶uasii.

²⁶ Mʉ od̶e wãaruud̶e, do che nub̶uud̶e nibabachii, maud̶e nechiruabadau baraumare nibabachii. Ara mʉ ẽbẽrarã judiorã tãed̶e maud̶e judiowãerã tãed̶e mʉ kachiruad̶e b̶uasii. Puurud̶e maud̶e puuru awara mʉ kachiruad̶e b̶uasii. Mard̶e bid̶a kachiruad̶e b̶uasii. Biawãra ãbarãwãe kakua mʉ kachiruad̶e b̶uasii.

²⁷ Traja b̶uud̶e mʉ ãrea biꞌiwãe b̶uabachii. B̶es ãrea kãi b̶eeka basii, jarrbaa b̶uabachii, obisia b̶uabachii, kowẽa b̶uabachii. Kũrasãaba mʉ uri b̶uabachii maud̶e paruswãe b̶uabachii.

²⁸ Mau awara ewaricha joma ãbarã druachad̶ebena ʉ̃rʉbena mʉ ãrea jirukaraa b̶uabarii.

²⁹ Ab̶a ẽpermo b̶eeruubʉrã, mʉ sid̶a ẽpermo b̶eeruu kĩra b̶uabarii. Ab̶auba waabena ãba kachiruad̶e b̶aebiiruubʉrã, mʉ mau ẽbẽra ome kĩrubarii.

³⁰ Ara mʉ ʉ̃rʉbena biꞌia berrearuubʉrã, mʉ meserãaswãe nii ʉ̃rʉbena biꞌia berreai.

³¹ Dachi Bajãad̶ebena Mechiu Jesús Akõre ʉ̃rʉbena ewaricha biꞌia berread̶ai panuu. Ichiba kuitaa b̶uu mʉ setaa jarakau.

³² Damasco puurud̶e b̶uasiid̶e chi rey Aretasba ichi puuru nubariimaa mʉ jʉrʉbisii jidaumera.

³³ Maamina ãbarãba mʉ ẽ mechiud̶e ed̶a joad̶aped̶a, maabae chi puuru mooba ad̶u karaad̶a chob̶ea nub̶uud̶e ʉ̃rʉʉba ed̶aa bʉisid̶au. Maka ichi juakaa jĩidru wãsii.