2 Corintios 10 - Emberá Chamí

Pabloba ara ichi ʉ̃rʉbena ãbarãmaa kuitaabiad̶a

¹ Mʉ Pablobʉ. Cristo kʉ̃riad̶eeba maud̶e ichi sõbiad̶eeba mʉʉba machimaa chi chuburia id̶iiruu mʉ bed̶ea ũrid̶amera. Waabenarãba jara panuu machi ome b̶uud̶e mʉʉba wapea b̶uabarii machi iadaai baita, maamina machi ome b̶uuwãed̶e wapeakau kartad̶eeba iadaai baita.

² Maka jara panumina machimaa neeruud̶e dai kachirua jara panuu mʉʉba biawãra iadaai. Ãchiba jara panuu dai nau kakuaba kʉ̃ria b̶uu kĩra nibabadau. Maud̶eeba machi sid̶a iadaamaaba mʉʉba chi chuburia id̶iiruu jipa waud̶amera.

³ Dai nau kakuad̶e panuu maamina nau kakuad̶eeba chĩo panuuwãe kachirua poyaad̶ai baita.

⁴ Daiba chĩod̶ai baita uru panuu nau iujãad̶ebenawãema, maumaarã Dachi Akõre poyaabariid̶eeba joma nau iujãad̶ebena kʉ̃risiabadau daiba poyaabadau.

⁵ Joma kʉ̃risia biꞌiwãe b̶ee maud̶e dachi nejuakayad̶eeba Dachi Akõre ʉ̃rʉbena ida kuitaabiad̶akau, daiba chi seta kuitaabiabadau. Jʉ̃a uru paneeduu kĩra daiba chi maka kʉ̃risia nuree jipa kʉ̃risiabiabadau Cristod̶e ijãad̶amera.

⁶ Daiba ãbarã sõ chaarea nuree kastikad̶ai baita panuu. Maamina naa esed̶au panuu machiba Cristod̶e joma ijãa panuu unubiad̶amera.

⁷ Machiba chi ʉ̃rʉbena ichia panuu. Barikiuba biawãra Cristod̶e b̶uu kʉ̃risia b̶uubʉrã, kuitaa b̶uai b̶uu dai sid̶a Cristod̶erã.

⁸ Dachi Akõreba daimaa waubi b̶uu ʉ̃rʉbena mʉʉba ãrea berrea b̶umina mau kakua kĩra nejasia b̶uuwãe. Dachi Mechiuba daimaa maka waubi b̶uu machiba biꞌia ijãad̶amera. Ichiba dai b̶uubasii machiba ijãa panuu ida b̶ud̶amera.

⁹ Mʉʉba kʉ̃riawẽe machiba kʉ̃risiad̶ai mʉ kartad̶eeba machi perabiai kʉ̃ria b̶uu.

¹⁰ Waabenarãba jara panuu: «Pabloba kartad̶eeba ãrea iadaabarii maud̶e machimaa ãrea waubiabarii. Maamina machi ome b̶uud̶e wapea b̶uu kĩra nii maud̶e biꞌiwãe berreabarii abadau».

¹¹ Chi maka jara panuuba kuitaad̶ai panuu daiba kaitawẽeba kartad̶eeba iadaa panuu kĩra, machi baara panuud̶e maka iadaad̶ai.

¹² Maamina ¿sakaburu dai ara ãstu chi bibuara nuree abadau kĩra kʉ̃risiad̶aima? Ara ãstu ichiabadau maud̶e ãchid̶ebena ichiabadau kai aude bibuara nuree kuitaad̶ai baita. Maka wau panuuba, kauwa ũrid̶akau unubiabadau.

¹³ Ara dai ʉ̃rʉbena biꞌia berread̶aabai, maumaarã Dachi Akõreba daimaa waubi b̶uu ʉ̃rʉbena biꞌia berread̶ai. Ichiba waubi b̶uu wau panuud̶eeba dai machimaa neesid̶au.

¹⁴ Dai machimaa naa chi bed̶ea bia Cristo ʉ̃rʉbena jaradead̶e wãsid̶au. Maka b̶uad̶awãe basirã id̶ibae machimaa jaradeaduud̶e, Dachi Akõreba bʉid̶awãemaa panad̶aabai basii.

¹⁵ Waabenarãba wauped̶aad̶a kakua ara dai ʉ̃rʉbena biꞌia berread̶akau ara daiba wauped̶aad̶a kĩra. Maumaarã daiba kʉ̃ria panuu machiba Cristod̶e biꞌia ijãad̶ai. Maka daiba machi druad̶e poyaa biꞌia jaradead̶ai ara Dachi Akõreba waubi b̶uu kĩra.

¹⁶ Jãabae chi bed̶ea bia Cristo ʉ̃rʉbena waabena druad̶e bid̶a jaradead̶ai. Maamina waabenarãba jaradeaped̶aad̶amaa wãd̶aabai, mau waabenarãba wauped̶aad̶a daiburu wausid̶au ad̶aamaaba.

¹⁷ Dachi Akõre bed̶ead̶e b̶ʉ kub̶uu: «Ab̶auba biꞌia berrearuubʉrã, Dachi Mechiu ʉ̃rʉbena biꞌia berreai b̶uu».

¹⁸ Ab̶auba ara ichi ʉ̃rʉbena biꞌia jaraaruubʉrã, mauba jara b̶uuwãe Dachi Mechiuba mau ẽbẽra biꞌia unu b̶uu. Maumaarã chi Dachi Mechiuba biꞌia jara b̶uu ẽbẽra biꞌia unu b̶uu.