2 Corintios 1 - Emberá Chamí

Nau kartad̶e Pabloba naa b̶ʉd̶a

¹ Mʉ Pablobʉ. Dachi Akõreba ichi kʉ̃riad̶eeba mʉ Jesucristoba bʉid̶abʉ. Dachi ãba Timoteo mʉ ome b̶uu. Nau karta b̶ʉʉruu ẽbẽrarã Dachi Akõred̶erã Corintod̶ebena baita maud̶e joma ichi ẽbẽrarã Acaya druad̶e nuree baita.

² Mʉʉba kʉ̃ria b̶uu Dachi Bajãad̶ebena Akõreba maud̶e Dachi Mechiu Jesucristo ãchi sõbiad̶eeba machi aid̶a panad̶ai maud̶e jirukaraayuwãe panabiad̶ai.

Pablo biꞌiwãe b̶uad̶a

³ Dachi Mechiu Jesucristo Bajãad̶ebena Akõremaa biꞌia berread̶ai panuu. Ichi dachi kĩra chuburiabarii Dachi Akõrebʉ, dachi sõ kĩrajʉʉbiabarii Dachi Akõrebʉ.

⁴ Ne jomad̶e ãrea biꞌiwãe panuud̶e ichiba dai sõ kĩrajʉʉbiabarii waabenarã ãrea biꞌiwãe nuree sõ kĩrajʉʉbiad̶amera ichiba dai sõ kĩrajʉʉbiad̶a kĩra.

⁵ Biawãra Cristo baita dai ãrea biꞌiwãe duanubadamina ichid̶eeba ne jomad̶e kĩrajʉʉbadau.

⁶ Maamina dai maka ãrea biꞌiwãe panuu machi sõ kĩrajʉʉbia panad̶amera maud̶e kachiruad̶ebena wãd̶amera. Dachi Akõreba dai sõ kĩrajʉʉbiaruud̶e machi sid̶a daid̶eeba kĩrajʉʉbadau. Maka machi dai kĩra ãrea biꞌiwãe paneeduud̶e poyaa dauchia jãaduad̶ai.

⁷ Daiba kuitaa panuu machiba Dachi Akõre biawãra ãrea ijãa panuu. Kuitaa panuu machi dai kĩra ãrea biꞌiwãe paneebadamina Dachi Akõreba machi dai kĩra sõ kĩrajʉʉbiabarii.

⁸ Ãbarã, maud̶eeba daiba kʉ̃ria panuu dai Asia druad̶e biawãra ãrea biꞌiwãe panaped̶aad̶a machiba mau kuitaad̶ai. Dai ãrea nebʉrad̶e panasiid̶eeba waa poyaa dauchia jãaduad̶aabai kʉ̃risiasid̶au maud̶e poyaa chokae panad̶aabai kʉ̃risiasid̶au.

⁹ Biawãra dai bead̶ai kʉ̃risiasid̶au. Maamina joma makasii ara dai du ab̶a poyaa karibad̶ai kʉ̃risiarãad̶amera maumaarã chi biuped̶aad̶a chokae jiradubibarii Dachi Akõreba karibai ijãad̶amera.

¹⁰ Ichiba dai bead̶ai bad̶a karibasii maud̶e waya bead̶ai kʉ̃risiaduubʉrã kariba b̶uai. Daiba biawãra ijãa panuu ichiba dai bead̶ai bad̶a kariba b̶uai.

¹¹ Machia bid̶a dai baita Dachi Akõremaa ʉtaa id̶i panuud̶eeba aid̶a panuu. Ãreaba maka ʉtaa id̶i panuud̶eeba ãreaba Dachi Akõremaa bichíturu kid̶ibai ad̶ai ichi sõbiad̶eeba dai aid̶a b̶uu baita.

Pablo Corintod̶aa wãi bad̶a

¹² Nau kakua kĩrajʉʉ panuu: daiba kuitaa panuu sõ jipa panuud̶eeba, kʉ̃risia biad̶eeba nau iujãad̶ebenarã tãed̶e, maud̶e machi tãed̶e biꞌia nibaped̶aad̶a. Mau sõ jipa b̶uai maud̶e kʉ̃risia bia Dachi Akõred̶ebenabʉ. Dai nau iujãad̶ebena kʉ̃risia kuitaad̶eeba maka nibad̶akau, maumaarã Dachi Akõreba ichi sõbiad̶eeba aid̶a b̶uud̶eeba maka nibabadau.

^13-14 Daiba kartad̶e b̶ʉd̶aabasii chi machiba poyaa kuitaad̶aabai panuu. Mʉʉba kʉ̃risia b̶uu machiba b̶aꞌãra kuitaaped̶aad̶a ãrea kuitaa kãribad̶ayu. Maka machi dai kakua kĩrajʉʉd̶ai maud̶e Dachi Mechiu Jesús neeruud̶e dai machi kakua kĩrajʉʉd̶ai.

¹⁵ Machi biawãra kĩrajʉʉd̶ai mʉ kakua mʉʉba kʉ̃risia b̶uud̶eeba, naa mʉʉba kʉ̃risia b̶uasii b̶es ome machi ichiad̶e wãi ãrea aid̶ai baita.

¹⁶ Mʉʉba kʉ̃risia b̶uasii Macedonia druad̶aa wãaruud̶e naa machi ichiad̶e wãi. Maabae Macedoniad̶aa wãped̶a waya machi ichiad̶e wãi kʉ̃risia b̶uasii. Maka Judea druad̶aa wãaruud̶e machiba mʉ poyaa aid̶ad̶ai kʉ̃risia b̶uasii.

¹⁷ Maamina mʉʉba kʉ̃risia b̶uad̶a kĩra waubasiid̶eeba ¿machimaarã mʉʉba ãyaa jaraska? ¿Machimaarã mʉʉba waui ad̶a waya wauwẽ abarika mʉʉba wau kʉ̃ria b̶uu kĩra waui baita?

¹⁸ Dachi Akõre bed̶ea ab̶a b̶uu. Ichiba kuitaa b̶uu daiba jaraped̶aad̶a biawãra basii. Daiba machimaa wãd̶ai ad̶aped̶a ara makʉd̶e wãd̶aabai ad̶aabasii. Daiba «nau biawãra» ad̶aabasii, maad̶akare «seta» ad̶ai baita.

¹⁹ Silvanoba, Timoteoba maud̶e mʉa bid̶a machimaa Dachi Akõre Warr Jesucristo ʉ̃rʉbena jaradea panasid̶au. Jesucristoba waui ad̶a waya wauwẽa akau. Ichiba waui ad̶a joma waubarii. Daiba «nau biawãra» ad̶aabasii, maad̶akare «seta» ad̶ai baita.

²⁰ Biawãra Dachi Akõreba waui jarad̶a joma Cristod̶eeba waubarii. Maud̶eeba dachiba Dachi Akõremaa ʉtaa id̶iiduud̶e Cristod̶eeba biꞌia b̶uu maka b̶uai abadau. Maka ichi ʉ̃rʉbena biꞌia jara panuu.

²¹ Dachi Akõréburu dai maud̶e machi sid̶a Cristo ome ãrea nu ua b̶uu. Ichiba dachi jʉrʉ adausii.

²² Ichi Jauriba dachicha dauchaa b̶usii dachiba ichid̶irã kuitaad̶amera. Maud̶e dachi sõd̶e b̶usii kuitaad̶amera joma ichiba deai jarad̶a biawãra adaud̶ai.

²³ Mʉʉba Dachi Akõre daad̶e jaraaruu: Corintod̶aa wabid̶a wãwãe b̶uu machi kĩra nomaabiamaaba chi mʉʉba machi ãrea kastikakuai b̶uud̶eeba.

²⁴ Daiba jara panuu kĩra waubiad̶aabai machiba Cristod̶e ãrea ijãa panuud̶eeba. Bari machi aid̶a kʉ̃ria panuu kĩrajʉʉ panad̶amera.