1 Timoteo 5 - Emberá Chamí

Ãbarã ome saka b̶uai b̶uu

¹ Chõrarã iadaarã́se, maumaarã bichi akõre ome berreabarii kĩra maarã ome sõbiad̶eeba berreáse ũrid̶amera. Kũudrãarãmaa berreáse bichi ãbarã ome berreabarii kĩra.

² Chõodraarãmaa berreáse bichi nawe ome berreabarii kĩra. Awẽrarãmaa berreáse bichi neekau ome berreabarii kĩra. Maarã baara joma kachiruad̶ebena awara b̶uase.

³ Pẽdrãarã chi aid̶ad̶ayuswãe nuree aid̶ase.

⁴ Maamina pẽdrãaba warrarã ua b̶uubʉrã, ãichekerã ua b̶uubʉrã, maarãba mau pẽdrãa aid̶ad̶ai panuu. Ãchiba ãrea kuitaad̶ai panuu saka ãchi ded̶ebenarã aid̶ad̶ai panuu. Ãchi akõrerãmaa ne kaebea dead̶ai panuu ãchi tatarãba ãchimaa dea panad̶a kĩra. Mau Dachi Akõre daad̶e jipa b̶uu.

⁵ Pẽdrãa biawãra ichi du ab̶a b̶uuba ãrea kuitaa b̶uu joma ichiba uru b̶uai b̶uu Dachi Akõréburu deai. Ãyadaa maud̶e ẽsabud̶e Dachi Akõremaa ʉtaa id̶ibarii karibamera.

⁶ Maamina pẽdrãaba barikia wau b̶uai jʉrʉʉruubʉrã, chokae b̶umina biud̶a kĩra b̶uu.

⁷ Joma chi ãbarãmaa mau waubiáse pẽdrãarã ʉ̃rʉbena kachirua jarad̶awẽa panad̶amera.

⁸ Ab̶aba ara ichi ded̶ebenarã aid̶akaubʉrã, Dachi Akõre bed̶ea ida b̶u b̶uu. Mau Cristod̶e ijãad̶akaurã audeara kachirua wau b̶uu.

⁹ Ãbarãba barikiu pẽdrãa trʉ̃ kartad̶e b̶ʉd̶aabai panuu aid̶ad̶ai baita. Maumaarã naka nuree b̶ʉd̶ai panuu: 60 año wãyaa nuree maud̶e mukĩra ab̶aburu uru panad̶a.

¹⁰ Ãchiba biꞌia wauped̶aad̶ad̶eeba trʉ̃ poa panad̶ai panuu. Ãchi warrarã biꞌia waribiabachid̶aubʉrã, ãchi ded̶e neeped̶aad̶a biꞌia irsibibachid̶aubʉrã, ãbarã jʉ̃rʉ jeraabachid̶aubʉrã, chi biꞌiwãe nuree aid̶abachid̶aubʉrã, maud̶e ne joma biꞌia waubachid̶aubʉrã, mau pẽdrãa trʉ̃ kartad̶e b̶ʉd̶ai panuu.

¹¹ Maamina pẽdrãa wabid̶a chõodraawãe nuree trʉ̃ kartad̶e b̶ʉrã́sturu. Maarã mukĩra awaba waya kima adaud̶ai kʉ̃riabadau. Maka ãchiba Cristo traju waud̶ai baita waya miakãid̶aabai bed̶ea deaped̶aad̶a ida b̶ubadau.

¹² Ãchiba chi naa bed̶ea deaped̶aad̶a ida b̶usid̶aud̶eeba nebʉra bara panuu.

¹³ Mau awara ãchi decha nibabadau maud̶e koꞌoa paneebadau. Mau awara chi bed̶ea ãrea paneebadau, waabenarã nebʉrad̶e ed̶a wã paneebadau, maud̶e ne jaraabai b̶uu berrea paneebadau.

¹⁴ Maud̶eeba mʉʉba kʉ̃ria b̶uu pẽdrãa wabid̶a chõodraawãe nuree miakãid̶ai, warr adaud̶ai, maud̶e ãchi de sid̶a biꞌia nud̶ai. Maka dachi kĩramaabadauba poyaa kachirua berread̶aabai.

¹⁵ Mʉʉba mau jara b̶uu waabenarã pẽdrãarã o ãyare wãd̶aped̶a Satanás baara wã panasiid̶eeba.

¹⁶ Cristod̶e ijãa b̶uu wẽraba pẽdrãa ichi ded̶ebenarã tãed̶e nuree aid̶ai b̶uu. Maka mau pẽdrãa Cristod̶e ijãabadaurãba aid̶ad̶aabai panuu. Maumaarã pẽdrãa istu nuree aid̶ad̶ai panuu.

Ãbarã nubadaurã ome saka waud̶ai panuu

¹⁷ Chi ijãabadaurã nubadaurãba biꞌia wau panuud̶eeba ãbarãba kʉ̃risia biad̶eeba maarã aid̶ad̶ai panuu, ne uru panad̶amera. Maarãd̶ebena chi Dachi Akõre bed̶ea jaradeabadaurã maud̶e dachi saka nibai ʉ̃rʉbena jaradeabadaurã, aude aid̶ad̶ai panuu.

¹⁸ Dachi Akõre bed̶ead̶e naka jara b̶uu: «Bichiba pakaba ne biraduamaa b̶uud̶e chi kũ jʉ̃rã́se». Maud̶e naka jara b̶uu: «Trajabariiba ichi deai b̶uu chi nejarra adaui b̶uu».

¹⁹ Ab̶auba ijãabadaurã nubarii jidearuubʉrã, maamina ẽbẽra omeeba maebʉrã õbeaba ara mau kĩra jarad̶awẽebʉrã, mau bed̶ea ijãarã́se.

²⁰ Maamina ijãabadaurã nubariiba kachirua wau b̶uubʉrã, jomaurã daad̶e iadaase waabenarãba wapeaba mau kachirua waurãad̶amera.

²¹ Dachi Akõre daad̶e, Cristo daad̶e maud̶e angelerã daad̶e mʉʉba bichimaa jaraaruu: joma mʉʉba jarad̶a ijãa wause. Maka wauruud̶e, ẽbẽraba jaraaruu ab̶auba aude ũrirã́se, maumaarã jomaurã ome arab̶aud̶e jipa wau b̶uase.

²² Bichi jua ab̶au ʉ̃rʉ bid̶a isa kub̶urã́se, ijãabadaurã nubarii b̶uamera. Bichiba maka wauruubʉrã, mauba kachirua waud̶abʉrã bichi sid̶a nebʉrad̶e b̶uai mau kachirua baita. Joma kachiruad̶ebena awara b̶uase.

²³ Bichi barikia kakua kachirua b̶uabariid̶eeba baníaturu dorã́se. Maumaarã uva b̶aa sid̶a bichi b̶i baita b̶istĩika dose.

²⁴ Chi kachirua ichiai naed̶e, waabenarãba kachirua wau panuu dachiba biꞌia unubadau maamina waabenarãba kachirua wau panuu maad̶akare kuitaad̶ai.

²⁵ Ara mau kĩra waabenarãba biꞌia wau panuu dachiba biꞌia unubadau, maud̶e waabenarãba biꞌia wau panuu biꞌia unud̶akamina miru b̶eebai.