1 Timoteo 4 - Emberá Chamí

Setaa jaradeabadaurã

¹ Dachi Akõre Jauriba arakʉd̶e jara b̶uu nau kaad̶ebena ewarid̶e waabenarãba Cristod̶e ijãa panaped̶aad̶a ida b̶ud̶aped̶a jai kachirua seta id̶aa nuree maud̶e ãchiba jaradeabi panuu ijãad̶ai.

² Mau jai kachiruarãba jaradeabi panuu ẽbẽrarã chi jipa kĩra nureeba jaradeabadau. Kachirua waubadaud̶eeba mau ẽbẽrarãba adua nuree sãu chi bia maud̶e sãu chi kachirua.

³ Jãarãba wẽra ida miakãibid̶akau maud̶e chi b̶ee chiko ida kobid̶akau. Maamina Dachi Akõreba joma deasii ichid̶e ijãabadaurãba maud̶e chi biawãra bed̶ea kuitaa panuurãba ichimaa ichíturu kid̶ibai ad̶aped̶a kod̶amera.

⁴ Ne joma Dachi Akõreba waukuad̶a biꞌia b̶uu. Maud̶eeba Dachi Akõremaa ichíturu kid̶ibai aaduubʉrã dachiba kod̶aid̶ebena ab̶a bid̶a kod̶aabai ad̶aabai panuu.

⁵ Mau kod̶ai Dachi Akõre daad̶e biꞌia b̶uu Dachi Akõre bed̶eaba maka jara b̶uud̶eeba maud̶e ichimaa ʉtaa id̶ibadaud̶eeba.

Jesucristo baita bari trajabarii bia

⁶ Timoteo, bichiba joma mau ãbarãmaa jaradea b̶uaruubʉrã, Jesucristo baita bari trajabarii biꞌia b̶uai. Dachi Akõre chi biawãra bed̶ea dachiba ijãa panuu ijãa kãriid̶eeba bichi jauri chaarea wari b̶uai biꞌia ko b̶uu kĩra.

⁷ Nabẽraed̶ebena nebʉrʉbadau kachirua b̶ee ida b̶use. Dachi Akõreba kʉ̃ria b̶uu kĩra nibai baita jʉrʉse.

⁸ Biawãra dachi kakua chaareabid̶ai baita wau panuubʉrã, dastu dachi kakua aid̶ad̶ai. Maamina Dachi Akõre baara nibaaduubʉrã, mauba dachi ne jomad̶e aid̶ai. Id̶ibae maud̶e kaad̶ebena ewarid̶e bid̶a karibai.

⁹ Mau bed̶ea biawãra b̶uu. Jomaurãba mau ijãad̶ai panuu.

¹⁰ Mau baita dachi traja panuu. Ãrea biꞌiwãe panuu, Dachi Akõre chokae b̶uuba jomaurã poyaa karibai kuitaa panuud̶eeba. Biꞌia jaraaruubʉrã, chi ichid̶e ijãaduu karibabarii.

¹¹ Joma mau jaradease maud̶e jarase waud̶amera.

¹² Bichi kũudrãa b̶umina ab̶aumaa bid̶a ida kabirã́se. Maumaarã bichiba berrearuud̶eeba, ne wau b̶uud̶eeba, waabenarã biawãra kʉ̃ria b̶uud̶eeba, kĩra jipa b̶uud̶eeba, maud̶e Cristod̶e ijãa b̶uud̶eeba ãbarãmaa unubiáse saka panad̶ai panuu.

¹³ Mʉ jãmaa wãaruumisa, jomaurã daad̶e Dachi Akõre bed̶ea jĩwa ed̶a jarase, jaradea b̶uase maud̶e ãbarã aid̶a b̶uase biꞌia ijãad̶amera.

¹⁴ Dachi Akõreba bichimaa waubi b̶uu dead̶a wãꞌãebirã́se. Ãbarã nubadaurãba ãchi jua bichi ʉ̃rʉ kub̶usid̶aud̶e Dachi Akõred̶eeba jarasid̶au ichiba mau dearuu.

¹⁵ Joma mau kĩra jipa wau b̶uase jomaurãba kuitaad̶amera bichiba ewaricha biꞌia wau kãrii.

¹⁶ Ara bichi ʉ̃rʉbena maud̶e bichiba jaradea b̶uu ʉ̃rʉbena kauwa b̶uase. Joma mau jipa wau nibase. Maka wau niibʉrã bichi karibai. Bichiba jaradea b̶uu ũri panuu sid̶a karibad̶ai.