1 Timoteo 3 - Emberá Chamí

Ijãabadaurã nubarii saka b̶uai b̶uu

¹ Nau bed̶ea biawãrad̶eeba, mau ijãad̶ai panuu: ab̶auba chi ijãabadaurã nubarii b̶uai kʉ̃ria b̶uubʉrã, biꞌia wau kʉ̃ria b̶uu.

² Maud̶eeba chi ijãabadaurã nubarii nebʉra barau nii ad̶ayuswãe b̶uu, wẽra ab̶aburu uru b̶uai b̶uu, kauwa nibai baita b̶uu, kʉ̃risia biad̶eeba b̶uai b̶uu, kĩra jipa b̶uai b̶uu, ichi ded̶e needuurã biꞌia irsibii b̶uu maud̶e jaradea kuitaa b̶uai b̶uu.

³ Itua biu nibaabai b̶uu. Kĩrubi id̶aa nibaabai b̶uu, maumaarã kĩrabia b̶uai b̶uu. Jomaurã ome jirukaraayuwãe b̶uai b̶uu. Chi nejarra kʉ̃ria nibaiswãe b̶uai b̶uu.

⁴ Ichi ded̶ebenarã ãrea nu kuitaa b̶uai b̶uu, ichi warrarã ũribaba nuread̶ai b̶uu maud̶e ãchiba ichi wapead̶ai panuu.

⁵ Ara ichi ded̶ebenarã nu adua b̶uubʉrã, ¿saka ẽbẽrarã Dachi Akõred̶erã biꞌia nuima?

⁶ Dachi Akõre bed̶ea ea ijãad̶a nii ijãabadaurã nubarii b̶uabai b̶uu chi mechiu kʉ̃risiarãamera. Maka kʉ̃risiaruubʉrã Dachi Akõreba ichi kastikai jʉbawãe nii kastikad̶a kĩra.

⁷ Cristod̶e ijãad̶akaurã bid̶a ichi ʉ̃rʉbena biꞌia kʉ̃risiad̶ai panuu. Maka ẽbẽrarãba ichi ʉ̃rʉbena kachirua berread̶aabai maud̶e jʉbawãe niiba ichi ẽbẽrarã daad̶e nebʉra bara nii ai.

Ijãabadaurã aid̶abarii saka b̶uai b̶uu

⁸ Ara mau kĩra ijãabadaurã aid̶abadaurã jipa nibad̶ai panuu ẽbẽrarãba wapead̶amera. Ãchiba setaa berread̶aabai panuu, itua biu nibad̶aabai panuu, maud̶e chi nejarra kʉ̃ria panad̶aabai panuu.

⁹ Dachiba ijãa panuu bed̶ea Dachi Akõreba kuitaabiad̶a, kʉ̃risia biad̶eeba ãrea nud̶ai panuu.

¹⁰ Ãbarã aid̶abadaurã b̶ud̶ai naed̶e ãrea kauwa ichiad̶ai panuu. Maabae maarã ʉ̃rʉbena kachirua jarad̶ayuswãe nureebʉrã, ijãabadaurã aid̶abadau panad̶ai panuu.

¹¹ Ara mau kĩra wẽrarã sid̶a jipa nibad̶ai panuu ẽbẽrarãba wapead̶amera. Waabenarã ʉ̃rʉbena ãrea kachirua berread̶aabai panuu. Kauwa nibad̶ai baita panuu maud̶e jomad̶e jipa nuread̶ai panuu.

¹² Ãbarã aid̶abariiba wẽra ab̶a uru b̶uai b̶uu. Ichi warrarã maud̶e ichi ded̶ebenarã ãrea nu kuitaa b̶uai b̶uu.

¹³ Ãbarã aid̶abadaurãba waud̶ai panuu jipa wauduubʉrã, jomaurãba ãchi ʉ̃rʉbena biꞌia berread̶ai. Maka wapeawẽa ãchiba Jesucristod̶e ijãa panuu ʉ̃rʉbena aude poyaa berread̶ai.

Chi biawãra bed̶ea Dachi Akõreba kuitaabiad̶a

¹⁴ Mʉ isa bichi ichiad̶e wã kʉ̃ria b̶uu. Maamina nau karta bichi baita b̶ʉd̶auruu.

¹⁵ Maamina kãꞌãaruubʉrã mʉʉba kʉ̃ria b̶uu Dachi Akõre chokae nii ẽbẽrarã saka ãbua panad̶ai panuu bichiba kuitaamera. Dachiba Dachi Akõre chi biawãra bed̶ea jaradeabadau de wãto kĩra b̶uu maud̶e de jʉ̃rʉ kĩra b̶uu.

¹⁶ Biawãra Dachi Akõreba mau bed̶ea kuitaabiad̶a ãrea biꞌia b̶uu: Cristo nau kakuad̶e neesii. Dachi Akõre Jauriba kuitaabiasii ichi jipa nii. Angelerãba ichi unusid̶au. Ãbarãba ichi ʉ̃rʉbena drua awarabenarãmaa jaradeasid̶au. Ãreaba nau iujãad̶e ichid̶e ijãasid̶au. Dachi Akõreba ichi bajãa bia b̶uud̶aa waya adoesii.