1 Timoteo 2 - Emberá Chamí

Dachi Akõremaa ʉtaa id̶id̶ai panuu ʉ̃rʉbena

¹ Nau biꞌia jaraaruu: joma ẽbẽrarã baita ãbarãba Dachi Akõremaa chi chuburia id̶id̶ai panuu, ichiba karibamera ʉtaa id̶id̶ai panuu maud̶e ichíturu kid̶ibai ad̶ai panuu.

² Joma nau iujãad̶ebena reyrã baita maud̶e jaradea ua b̶uabadaurã baita Dachi Akõremaa ʉtaa id̶id̶ai panuu dachi jirukaraayuwãe panad̶ai baita, apii panad̶ai baita, Dachi Akõre wapea panad̶ai baita maud̶e ne jomad̶e jipa panad̶ai baita.

³ Maka ʉtaa id̶i panad̶ai biꞌia b̶uu. Dachi Karibabarii Dachi Akõreba mau biꞌia unu b̶uu.

⁴ Ichiba kʉ̃ria b̶uu jomaurãba chi biawãra bed̶ea kuitaaped̶aad̶a kachiruad̶ebena karibad̶ai.

⁵ Dachi Akõre ab̶aburu nii. Maud̶e chi ẽbẽrarã Dachi Akõre ome nebʉrad̶e panad̶a mau biꞌia nibabiabarii ab̶aburu nii. Mau ẽbẽra Jesucristobʉ.

⁶ Ara ichi ida beabisii ẽbẽrarã joma kariba b̶uai baita. Dachi Akõreba b̶ud̶a ewarid̶e mau kuitaabisii.

⁷ Mau baita mʉ ichi bed̶ea jarabarii b̶usii. Mʉ ichiba bʉid̶a b̶usii chi biawãra bed̶ea ichi ijãad̶ai panuu ʉ̃rʉbena judiowãerãmaa jaradead̶e wãmera. Mʉʉba biawãra jara b̶uu maud̶e setawãe b̶uu.

⁸ Maud̶eeba, ãbarã araa ãbua imiiduucha mʉʉba kʉ̃ria b̶uu mukĩrarãba kʉ̃risia biad̶eeba ãchi jua ʉtaa jiraaduud̶e Dachi Akõremaa ʉtaa id̶id̶amera. Maud̶e kĩru panad̶aabai panuu maud̶e oa kachirua berrea panad̶aabai panuu.

⁹ Mʉʉba kʉ̃ria b̶uu wẽrarãba paru arakʉd̶e jʉ̃d̶amera, wẽrarã jipa nureeba jʉ̃badau kĩra. Ãchi bud̶a ãrea kapipia meraa irud̶awẽa panad̶ai panuu. Nee maebʉrã perla jʉ̃d̶awẽa panad̶ai panuu. Maud̶e paru chi nejarr ãrea id̶ibadau jʉ̃d̶awẽa panad̶ai panuu.

¹⁰ Maumaarã Dachi Akõre wapea panuud̶eeba, wẽrarãba biꞌia wau panuud̶eeba ãrea biꞌia kapipia jʉ̃badau kĩra panad̶ai panuu.

¹¹ Ãbarã araa ãbua imiiduud̶e wẽrarãba chũpea ũrid̶ai panuu maud̶e chi ijãabadaurã nubadaurã wapea panad̶ai panuu.

¹² Ãbua panuud̶e mʉʉba ida b̶ukau wẽraba mukĩrarãmaa jaradea b̶uai maebʉrã mukĩra ichi juad̶e uru b̶uai. Maumaarã wẽrarãba chũpea ũri panad̶ai panuu.

¹³ Maka b̶uai b̶uu Dachi Akõreba Adán naa wausiid̶eeba. Mawãare Eva wausii.

¹⁴ Mau awara jʉbawãe niiba Adán setaa kũruabasii, maumaarã wẽráturu setaa kũruasii. Maka setaa kũruasiid̶e wẽraba kachirua wausii.

¹⁵ Maamina wẽrarãba warr adaubadaud̶eeba maarã karibai, Cristod̶e ijãa paneeduubʉrã, biawãra waabenarã kʉ̃ria uru paneeduubʉrã maud̶e Dachi Akõre baita biꞌia paneeduubʉrã. Joma mau kĩra jipa nuread̶ai panuu.