1 Timoteo 1 - Emberá Chamí

Pabloba nau kartad̶e naa b̶ʉd̶a

¹ Mʉ Pablobʉ, Jesucristoba bʉid̶a. Dachi Akõre chi Karibabariiba maud̶e Dachi Mechiu Jesucristoba mʉ naka b̶usid̶au. Ara mau Jesucristod̶eeba dachi biawãra biꞌia nuread̶ai kuitaa panuu. Dachiba Jesucristod̶e ijãabadau maud̶e ichi kakua biꞌia nuread̶ai kuitaabadau.

² Timoteo, mʉʉba nau karta bichi baita b̶ʉʉruu. Mʉʉd̶eeba Cristod̶e ijãasiid̶eeba bichi biawãra mʉ warr kĩra b̶uu. Mʉʉba kʉ̃ria b̶uu Dachi Bajãad̶ebena Akõreba maud̶e Dachi Mechiu Jesucristoba kĩra chuburia panad̶amera, ãchi sõbiad̶eeba aid̶a panad̶amera, maud̶e jirukaraayuwãe panabid̶amera.

Setaa jaradeabadaurãmaa ida jaradeabiarã́se

³ Mʉʉba bichimaa chi chuburia id̶id̶a kĩra Macedonia druad̶aa wãsiid̶e, maucha jaraaruu: Efesod̶e b̶eese, chi ãyaa jaradeabadaurã waa setaa ida jaradeabiarãad̶amera.

⁴ Ãchimaa jarase nabẽraed̶ebena nebʉrʉ maud̶e dachi nabẽraed̶ebenarã trʉ̃ ãrea jaradeabadau ʉ̃rʉbena ãrea kʉ̃risiarãad̶amera. Maud̶eeba oa kachirua berrea duaneebiabarii. Mauba dachi aid̶akau Dachi Akõreba waubi b̶uu waud̶amera. Ab̶a ichi bed̶ea ijãa panuud̶eeburu poyaa waud̶ai.

⁵ Mʉʉba maka jara b̶uu ãbarã kʉ̃risia sõbiad̶eeba, biawãra Dachi Akõred̶e ijãa panuud̶eeba chiya kʉ̃ria duanad̶amera.

⁶ Maamina waabenarã o ãyare wãsid̶au. Maabae barikia dachi aid̶akau bed̶eáturu berreabadau.

⁷ Ãchiba Moisesba b̶ʉd̶a jaradeabadaurã ba kʉ̃ria panuu, maamina ãrea kuitaa panuu kĩra jaradeabadamina adua panuu kãare jaradea panuu.

⁸ Dachiba kuitaa panuu Moisesba b̶ʉd̶a bibuara b̶uu. Maamina arakʉd̶e jaradead̶ai panuu.

⁹ Nau kuitaad̶ai panuu: Dachi Akõreba mau Moisesba b̶ʉd̶a deabasii chi jipa nuree baita, maumaarã deasii chi Dachi Akõreba jara b̶uu kĩra waud̶akaurã baita, ũribabaswãe nuree baita, Dachi Akõreswãe nuree baita, kachirua wau nuree baita, Dachi Akõre wapead̶akau baita, chi nau iujãad̶ebenarã kĩra panabadaurã baita, ãchi akõrerã beabadau baita, mia beabadau baita,

¹⁰ junebena ome kãi topaneebadaurã baita, ãchi arab̶aurã ome mia pera waubadaurã baita, ẽbẽrarã jidaud̶aped̶a nedobʉibadaurã baita, setaa jarabadaurã baita, chi juez kĩraare setaa jarabadau baita maud̶e chi biawãra bed̶ea jara b̶uu waud̶akaurã baita.

¹¹ Dachiba chi Dachi Akõre ʉ̃rʉbena bed̶ea bia jaradeaduud̶e mau joma kauwa kuitaabid̶ai. Dachi Akõre bia niiba mau mʉʉmaa deasii jaradea b̶uamera.

Dachi Akõreba Pablo kĩra chuburiad̶a

¹² Dachi Mechiu Jesucristoba mʉʉmaa poyaabarii deasii ichi bed̶ea jaradea b̶uamera. Kuitaasii mʉʉba ne joma jipa waui ichi baita. Maud̶eeba mʉ iusii ichiba kʉ̃ria b̶uu wau b̶uamera. Mau baita mʉʉba ichíturu kid̶ibai b̶uu ai.

¹³ Naed̶e mʉʉba ichi ʉ̃rʉbena kachirua berreabachii maud̶e ichid̶irã kachirua waui baita wãraabachii. Waabenarãmaa kachirua berreabachii. Ichid̶e wabid̶a ijãawẽa b̶uasiid̶eeba maud̶e adua b̶uasiid̶eeba maka kachirua waubachii. Maamina ichiba mʉ kĩra chuburiasii.

¹⁴ Dachi Mechiu Jesucristoba ichi sõbiad̶eeba mʉ ãrea karibasii ichid̶e ijãamera maud̶e ichi kʉ̃ria uru b̶uamera.

¹⁵ Nau bed̶ea biawãrad̶eeba jomaurãba mau ijãad̶ai panuu: Jesucristo nau druad̶aa neesii kachirua waubadaurã karibai baita. Maarãd̶ebena mʉ chi aude kachirua b̶uasii.

¹⁶ Maamina maud̶eeba Dachi Akõreba mʉ kĩra chuburiasii. Maka Jesucristoba mʉ, chi aude kachirua wau b̶uad̶ad̶eeba unubisii ichi joma dauchia jãadua esed̶au b̶uai b̶uu. Mʉʉd̶eeba chi wabid̶a ijãad̶akaurãmaa kuitaabiasii saka ẽbẽra kachirua kĩra chuburiabarii ewaricha chokae b̶uamera.

¹⁷ Dachi Akõre ewaricha jomaurã Reybʉ. Mau chi dachiba unud̶akau biukau. Ichíturu ab̶aburu nii. Ichíturu dachiba ewaricha biꞌia berread̶ai panuu maud̶e wapead̶ai panuu. Maka biꞌia b̶uase.

^18-19 Mʉ warr Timoteo, mʉʉba Dachi Akõreba naa jarabʉid̶a bichi ʉ̃rʉbena kʉ̃risiaruud̶e, bichiba waui b̶uu jarabʉiruu. Maka Cristod̶e ijãa b̶uud̶eeba, kʉ̃risia jipa b̶uud̶eeba chi biawãra bed̶ea uru b̶uase waabenarã tãed̶e kokoroa chĩobarii kĩra. Waabenarãba mau kʉ̃risia bia uru panad̶a ida b̶ud̶aped̶a ãchiba Cristod̶e ijãa panuu ida b̶usid̶au.

²⁰ Maarãd̶ebena ab̶a Himeneo basii. Maud̶e ab̶a Alejandro basii. Maarã mʉʉba Satanás juad̶e b̶usii kuitaad̶amera Dachi Akõre ʉ̃rʉbena waa kachirua berrearãad̶amera.