1 Corintios 4 - Emberá Chamí

Jesucristo baita bari trajabadaurã

¹ Maka machiba kʉ̃risiad̶ai panuu dai Cristo baita bari trajabadaurã. Dachi Akõreba dai b̶usii chi ichi ʉ̃rʉbena naed̶e kuitaabiawẽa b̶uad̶a jaradead̶amera.

² Biawãra chi chibari baita bari trajabariiba ichi jaradea ua b̶uabariiba waubi b̶uu joma jipa wau b̶uai b̶uu chi jaradea ua b̶uabariiba biꞌia unumera.

³ Maud̶eeba machiba maebʉrã barikia ẽbẽraba mʉ ʉ̃rʉbena kachirua jaraaduud̶e biꞌiwãe kʉ̃risiakau. Maud̶e ara mʉ du ab̶a jarawẽma mʉʉba wau b̶uu saka b̶uu.

⁴ Mʉʉba ne ab̶a bid̶a biꞌiwãe wauwẽa b̶uu kuitaa b̶umina mauba jarawẽa b̶uu mʉʉba joma jipa wausii. Dachi Mechiúburu kuitaa jarai.

⁵ Maud̶eeba ichiba nebʉra ichiai ewari naed̶e dachiba jarad̶aabai panuu ichi traju wau b̶uuba jipa wau b̶uu maebʉrã jipa wauwẽa b̶uu. Dachi Mechiu neeruud̶e dachi sõd̶e kʉ̃risia b̶uad̶a maud̶e ne joma dachi sõd̶e miru nuread̶a kuitaabii. Dachi Akõréburu dachicha biꞌia jarai dachiba biꞌia wauped̶aad̶a kĩra.

⁶ Ãbarã, mʉ ʉ̃rʉbena maud̶e Apolos ʉ̃rʉbena b̶ʉsii machi aid̶ai baita. Dai ʉ̃rʉbena kuitaad̶ai panuu Dachi Akõre bed̶ead̶e b̶ʉ kub̶uu aude kʉ̃risiad̶aabai panuu. Makarã machiba ab̶a bid̶a waabena audeara biꞌia b̶uu kʉ̃risiad̶awẽa panuu.

⁷ ¿Kaiba machi waabenarã audeara biꞌia b̶usma? Dachi Akõreba dead̶a awara ¿machiba kãare uru panuma? Machiba Dachi Akõred̶ebena ne joma adauped̶aad̶ad̶eeba ¿sakãe ara machi du ab̶a adauped̶aad̶a kĩra berrea panuma?

⁸ Dachi Akõred̶eeba adau kʉ̃ria panad̶a machiba joma uru panuu abadau. Dachi Akõreba dea b̶uu ãrea uru panuu abadau. Dai ida b̶ud̶aped̶a machi du ab̶a chi mechiurã paneed̶ai a kʉ̃risia panuu. Maamina makawãema. Machi biawãra chi mechiurã paneed̶a basirã biꞌia b̶uai basii. Makara dai sid̶a machi ome ãbua chi mechiurã paneed̶ai basii.

⁹ Maamina mʉʉba kʉ̃risia b̶uu dai chi Jesucristoba bʉid̶arã Dachi Akõreba jomaurã audeara kaebeu b̶usii. Dai chi juezba jomaurã daad̶e beabíbad̶e a b̶uu kĩra panuu. Ẽbẽrarãba maud̶e angelerãba, jomaurãba ichia panuu biud̶ai kuitaad̶ai baita.

¹⁰ Ẽbẽrarãmaarã dai Cristo baita ne adua nuree maud̶e meserãaswãe nuree. Maamina machi Cristo ome panuud̶eeba chi ne kuitaa nuree abadau maud̶e chi meserãa nuree abadau. Ẽbẽrarãba machi ʉ̃rʉbena biꞌia berrea panuu, maamina dai ida b̶u panuu.

¹¹ Id̶ibaed̶aa dai jarrba wau panuu, obisia wau panuu maud̶e paru sore uru panuu. Dai dewãe panuu maud̶e ẽbẽrarãba dai kachirua waubadau.

¹² Dai kʉrrjĩrud̶awẽa traja panuu ne uru panad̶ai baita. Ẽbẽrarãba daimaa kachirua berreaduud̶e daiba ãchimaa biꞌia berreabadau. Dai kachirua wauduud̶e dauchia jãadua panabadau.

¹³ Setad̶eeba daimaa kachirua jaraaduud̶e bed̶ea biad̶eeba panaubadau. Id̶ibaed̶aa ẽbẽrarãba dai nejarr kĩra unubadau maud̶e ne miadaa kĩra unubadau.

¹⁴ Mʉʉba mau b̶ʉ kub̶uwẽe machi kĩrakayabiai baita. Maumaarã mʉ warrarã kĩra machi kʉ̃ria b̶uud̶eeba maka b̶ʉ kub̶uu jipa kʉ̃risiabiai baita.

¹⁵ Machiba Cristo ʉ̃rʉbena jaradeabadaurã ãrea uru panad̶a basirã wabid̶a akõre ab̶a uru panad̶ai basii. Mʉʉd̶eeba machiba chi bed̶ea bia Jesús ʉ̃rʉbena ijãaped̶aad̶ad̶eeba ichid̶eeba mʉ machi akõrebʉ.

¹⁶ Maud̶eeba mʉʉba machimaa chi chuburia id̶ii mʉ nibabarii kĩra nibad̶amera.

¹⁷ Maud̶eeba Timoteo machimaa bʉiruu. Dachi Mechiud̶eeba mʉ warr kʉ̃riabarii kĩra nii, maud̶e jipa nibabarii. Ichiba machimaa kĩrababiai mʉ Jesucristo ome saka jipa nii. Mʉ maka nibai chi ẽbẽrarã Jesucristod̶erã duanabariicha jaradea b̶uu.

¹⁸ Waabenarã machid̶ebena chi mechiurã kĩra nibabadau, kʉ̃risia panuud̶eeba mʉ machimaa wãabai.

¹⁹ Maamina Dachi Mechiuba kʉ̃riaruubʉrã, mʉ machimaa isa wãi. Maud̶e chi mechiu abadauba jara panuu ũrid̶e wãabai, maumaarã ichiad̶e wãi ãchi biawãra Dachi Akõre poyaabarii uru panuu kuitaai baita.

²⁰ Dachi Akõre juad̶e ua b̶uud̶ebenarãba ichi ʉ̃rʉbena berread̶akau, maumaarã ichi poyaad̶eeba jipa waubadau.

²¹ Mau ¿machiba saka kʉ̃ria panuma? ¿Kʉ̃ria panuka mʉʉba iadaad̶e wãi maebʉrã kʉ̃riad̶eeba, biꞌia berread̶eeba wãi?