1 Corintios 13 - Emberá Chamí

Waabenarã kʉ̃riad̶ai chi aude bibuara b̶uu

¹ Mʉ nau iujãad̶ebenarã bed̶ead̶e berrearuubʉrã maud̶e ángel bed̶ead̶e berrearuubʉrã maud̶e waabenarã ẽbẽrarã kʉ̃riawẽa b̶uubʉrã, mʉ jiorr waud̶a jĩwabarii kĩra maebʉrã campana jĩwabarii kĩra nii.

² Mʉ Dachi Akõre baita berrearuubʉrã, Dachi Akõreba kʉ̃risia kuitaabiwẽa b̶uad̶a joma kuitaa b̶uubʉrã, Dachi Akõre kʉ̃risia kuitaa joma kuitaa b̶uubʉrã, maud̶e sõd̶eeba biawãra ijãa b̶uud̶eeba ea poyaa ãyaa b̶uuruubʉrã, maud̶e waabenarã kʉ̃riawẽa b̶uubʉrã, mʉ baleswãe nii kĩra nii.

³ Joma mʉʉba uru b̶uu chi wãꞌãe nureemaa dearuubʉrã maud̶e Dachi Akõre baita ara michi kakua ida baa deabiiruubʉrã, maamina waabenarã kʉ̃riawẽa b̶uubʉrã, mʉ baleswãe nii kĩra nii.

⁴ Chi waabenarã kʉ̃riabariiba joma jãadua b̶uu, waabena kĩra chuburiabarii, waabenaba uru b̶uu uru b̶uai kʉ̃riakau, waabena audeara biꞌia nii jarakau maud̶e maka nii kʉ̃risiakau.

⁵ Chi waabenarã kʉ̃riabariiba waabenarã wapeadee ua b̶uabarii, ara ichi báitaburu b̶uu kʉ̃risiakau, bari au kĩrukau, waabenaba ichi kachirua waud̶a kĩrabakau.

⁶ Kachirua kakua kĩrajʉʉkau, maumaarã biawãra kakua kĩrajʉʉbarii.

⁷ Waabenaba kachirua waud̶a joma jãaduabarii, jomad̶e ijãabarii, waabenaba joma biꞌia waumera esed̶aubarii maud̶e ne jomad̶e jãadua b̶uabarii.

⁸ Ẽbẽrarã kʉ̃riai wãꞌãekau. Maamina ewari ab̶a Dachi Akõre baita berreabadau waa berread̶aabai, dachiba ũrid̶akau bed̶ead̶e berreabadau waa berread̶aabai, Dachi Akõre Jaurid̶eeba kuitaaped̶aad̶a jaradeabadaurãba waa jaradead̶aabai.

⁹ Maud̶eeba id̶ibae dachiba b̶aꞌãraburu kuitaa panuu maud̶e Dachi Akõre baita b̶aꞌãraburu berreabadau.

¹⁰ Maamina chi bibuara b̶uu neeruud̶e mau b̶aꞌãra b̶uu wãꞌãe bai. Maud̶e joma kuitaad̶ai.

¹¹ Mʉ wabid̶a kaebe nibasiid̶e warr cheke kĩra berreabachii maud̶e warr cheke kĩra kʉ̃risiabachii. Maamina sĩbãra basiid̶e warr cheke kĩra b̶uad̶a ida b̶usii.

¹² Ʉ̃raud̶e dachiba Dachi Akõred̶ebena tõroroa kĩra unu panuu chi kĩra ichiabadaud̶e. Maamina ewari ab̶ad̶e dachiba joma ʉ̃d̶aa unud̶ai mau saka b̶uu. Ʉ̃raud̶e mʉʉba b̶aꞌãraburu kuitaa b̶uu, maamina ewari ab̶ad̶e joma kuitaai Dachi Akõreba mʉ ʉ̃rʉbena kuitaa b̶uu kĩra.

¹³ Nau õbea panuu wãꞌãekau: ne jomad̶e biꞌia ijãa b̶uai, esed̶au b̶uai joma biꞌia neemera maud̶e waabenarã kʉ̃ria b̶uai. Mau õbead̶ebena, ab̶au kʉ̃ria b̶uai chi aude bibuara b̶uu.