அப்போஸ்தலம்மாரு 2 - Moundadan Chetty

பரிசுத்த ஆல்ப்மாவின வரவு

¹ பெந்தகோஸ்து ஹளா உல்சாக ஜின ஏசின நம்பா ஆள்க்காரு எல்லாரும் எருசலேமாளெ இப்பா ஒந்து மெனெயாளெ ஒந்தே மனசோடெ கூடிபந்துரு.

² அம்மங்ங, பெட்டெந்நு சுள்ளிகாற்று அடிப்பா ஹாற ஒந்து ஒச்செ ஆகாசந்த பந்தட்டு, ஆக்க குளுதித்தா மெனெயாளெ ஒக்க தும்பித்து.

³ அம்மங்ங, ஆக்க எல்லாரும் சிண்ட சிண்ட நாவின ஹாற பிரிஞ்ஞிப்பா கிச்சின கண்டுரு; ஆ கிச்சு, பிரிஞ்ஞு பந்தட்டு, அல்லி குளுதித்தா ஒப்பொப்பன தெலேமேலெயும் பந்து எறங்ஙித்து.

⁴ அம்மங்ங, ஆக்க எல்லாரும் பரிசுத்த ஆல்ப்மாவினாளெ தும்பி, பரிசுத்த ஆல்ப்மாவு ஆக்காக கொட்டா கழிவு அனிசரிசி, பலவித பாஷெயாளெ கூட்டகூடத்தெ தொடங்ஙிரு.

⁵ ஆ சமெயாளெ, லோகாளெ இப்பா எல்லா ராஜெந்தும் பந்தித்தா பக்திஉள்ளா யூதம்மாரு ஒக்க, எருசலேமாளெ பந்து தங்கித்துரு.

⁶ அம்மங்ங, ஒளெயெ இத்தா ஆள்க்காரு ஒக்க ஆக்காக்கள சொந்த பாஷெயாளெ கூட்டகூடிதா ஒச்செ கேளதாப்பங்ங ஹொறெயெ இத்தா ஈக்க எல்லாரிகும் பயங்கர கொழப்ப ஆத்து.

⁷ ஆக்க எல்லாரும் ஆச்சரியத்தோடெ, தம்மெலெ தம்மெலெ நோடிட்டு, “ஈ கூட்டகூடுது ஒக்க கலிலாக்காரு அல்லோ!

⁸ ஈக்க ஒக்க, நங்கள பாஷெயாளெ கூட்டகூடுது கேட்டாதல்லோ! அது எந்த்தெ?” ஹளி ஆச்சரியபட்டுரு.

⁹ பார்த்தியா, மேதியா, எலாமித்தி, மெசபத்தோமியா, யூதேயா, கப்பத்தோக்கியா, பொந்து, ஆசியா,

¹⁰ பிரிகியா, பம்பிலியா தேசக்காரும், எகிப்து தேசக்காரு எல்லாரும், சிரேனே பட்டணத அரியெ இப்பா லிபியாளெ உள்ளாக்களும், ரோமிந்த பந்தாக்களும்,

¹¹ யூதம்மாரும், யூத மதாக கூடிதாக்களும், கிரீக்கம்மாரும், அரபிக்காரும், ஈக்க ஒக்க ஆச்சரியபட்டு, நங்கள பாஷெயாளெ ஈக்க, தெய்வத பெகுமானிசி கூட்டகூடிரெயல்லோ! ஹளி ஹளிரு.

¹² ஆக்க எல்லாரும் அந்தபுட்டு சம்செயாளெ, இது ஏனாயி தீயிகோ? ஹளி தம்மெலெ தம்மெலெ கூட்டகூடிண்டித்துரு.

¹³ மற்றுள்ளா ஆள்க்காரு, “ஈக்க ஒக்க கள்ளுகுடுத்தட்டு கூட்டகூடுதாப்புது” ஹளி ஹச்சாடிசிரு.

பேதுரு பிரசங்ஙகீவுது

¹⁴ அம்மங்ங பேதுரு, மற்றுள்ளா ஹன்னொந்து அப்போஸ்தலம்மாராகூடெ எத்து நிந்தட்டு, ஆக்களகூடெ ஒச்செகாட்டி கூட்டகூடிது ஏன ஹளிங்ங, “யூதம்மாரே! எருசலேமாளெ இப்பா ஜனங்ஙளே, நன்ன வாக்கு சிர்திசி கேளிவா; இதன அர்த்த ஏன ஹளி மனசிலுமாடியணிவா.

¹⁵ நிங்க பிஜாருசா ஹாற ஈக்க ஒப்புரும் குடுத்து மத்து ஹத்திதாக்க அல்ல; பொளகாயிட்டு ஒம்பத்து மணி ஆயிப்புதே ஒள்ளு.

¹⁶ நிங்க ஈ காம்புதொக்க, யோவேலு ஹளா பொளிச்சப்பாடித கொண்டு தெய்வ ஹளிதா சங்ஙதி தென்னெயாப்புது.

¹⁷ கடெசி காலதாளெ நா, நன்ன ஜனங்ஙளு எல்லாரினும் நன்ன ஆல்ப்மாவுகொண்டு துமுசுவிங்; அம்மங்ங நிங்கள கெண்டுமக்களும், ஹெண்ணு மக்களும் பொளிச்சப்பாடு வாக்கு கூட்டகூடுரு; நிங்கள பாலேகாரு தரிசன காம்புரு; நிங்கள மூப்பம்மாரு கனசு காம்புரு.

¹⁸ நனங்ங கெலசகீவா கெண்டாக்கள மேலெயும், ஹெண்ணாகள மேலெயும், ஆ ஜினாளெ நன்ன ஆல்ப்மாவின துமுசுவிங்; அம்மங்ங, ஆக்களும் பொளிச்சப்பாடு வாக்கு கூட்டகூடுரு.

¹⁹ அதுகூடாதெ, ஆகாசதாளெ அல்புதங்ஙளும், பூமியாளெ சோரெ அடெயாளம், கிச்சும், ஹொகெ மூடிப்பா ஹாற உள்ளா அடெயாளங்ஙளும் காட்டுவிங்.

²⁰ எஜமானின பொளிச்ச உள்ளா ஆ பயங்கர ஜின பொப்புதனமுச்செ சூரியங் இருட்டாக்கு, நெலாவு சோரெத ஹாற நெற மாறுகு.

²¹ அம்மங்ங, எஜமானின ஹெசறு ஊது, அவனமேலெ நம்பிக்கெயோடெ பிரார்த்தனெ கீவாக்க எல்லாரினும் தெய்வ காத்தங்கு.

²² இஸ்ரேல் ஜனங்ஙளே! நா ஹளுதன கேளிவா; நிங்க அருதிப்பா ஹாற நசரெத்து பாடக்காறனாயிப்பா ஏசினகொண்டு தெய்வ நிங்கள எடநடுவு தொட்ட தொட்ட காரியங்ஙளும், அல்புதங்ஙளும், அடெயாளங்ஙளும் கீது, ஏறாப்புது ஏசு ஹளிட்டுள்ளுதன ஒறப்பாயிற்றெ காட்டிதந்து ஹடதெ.

²³ அந்த்தெ இத்தட்டும், தெய்வ தாங் ஏற்பாடு கீதா பிரகாரம், தாங் முன்கூட்டி ஹளிதா பிரகாரம், நிங்கள கையாளெ தந்துத்து; நிங்க ஈ ஏசின, தெய்வ கல்பனெயும், தெய்வ நேமும் அறியாத்த அக்கறமக்காறா புடுசு குரிசாமேலெ ஆணிதறெச்சு கொந்துரு.

²⁴ எந்நங்ங தெய்வ, ஏசின மரண பேதெனெந்த ஹிடிபுடுசி ஜீவோடெ ஏள்சித்து; ஆ மரணதகொண்டு, ஏசின கெட்டிஹைக்கி பீப்பத்தெ பற்றிபில்லெ.

²⁵ ஈ, ஏசினபற்றி கொறே காலதமுச்செ தாவீது பாடிது எந்த்தெ ஹளிங்ங, ‘நா நன்ன எஜமானின ஏகளும் நன்ன முந்தாக நிருத்தி கண்டீனெ; அவங் ஏகோத்தும் நன்ன பலபக்க உள்ளுதுகொண்டு, நன்ன ஒப்புரும் ஒந்தும் கீவத்தெபற்ற.

²⁶ அதுகொண்டு நன்ன மனசு சந்தோஷப்பட்டாதெ, நன்ன நாவும் கூடுதலு சந்தோஷப்பட்டாதெ; நன்ன சரீர சாயிவத்துள்ளுது ஆதங்ஙும் நா, நம்பிக்கெயோடெ காத்திப்பிங்.

²⁷ ஏனாக ஹளிங்ங, நா நின்ன பரிசுத்தனாயி இப்புதுகொண்டு, நன்ன ஜீவத பாதாளாக ஏல்சிகொடெ; நன்ன சரீரத நாச ஆப்பத்தெ புடெ.

²⁸ நீ நனங்ங ஜீவ கிட்டத்துள்ளா பட்டெ ஹளி தந்தித்தெ; நீ நன்னகூடெ இப்புதுகொண்டு நனங்ங ஏகோத்தும் தும்ப சந்தோஷ தென்னெயாப்புது’ ஹளி ஹளிதீனெ.

²⁹ அதுகொண்டு கூட்டுக்காறே! கேளிவா; நங்கள வம்சத கார்ணம்மாராளெ ஒப்பனாயிப்பா தாவீதினபற்றி நனங்ங கூட்டகூடத்தெ உட்டு, அவங் சத்து, அவன மறெ கீதுரு; அவன கல்லறெ இந்தும் நங்கள எடநடுவு தென்னெ ஹடதெ.

³⁰ தாவீது பொளிச்சப்பாடியாயிற்றெ இத்துதுகொண்டு, அவன தெலெமொறெயாளெ ஹுட்டி பொப்பா ஒப்பாங் அவன சிம்மாசனாளெ குளுது பரிப்பாங் ஹளி தெய்வ அவனகூடெ ஒறப்பாயிற்றெ வாக்கு ஹளிதன அருதித்தாங்.

³¹ அதுகொண்டாப்புது தாவீது, கிறிஸ்தின ஆல்ப்மாவின பாதாளாக ஏல்சி கொடுதில்லெ ஹளியும், கிறிஸ்தின சரீர நாச ஆப்புதில்லெ ஹளியும், நேரத்தே அருதட்டு, கிறிஸ்து ஜீவோடெ ஏளுதனபற்றி இந்த்தெ ஹளித்துது.

³² ஈ ஏசின, தெய்வ ஜீவோடெ ஏள்சித்து; இதங்ங நங்க எல்லாரும் கண்டா சாட்ச்சி ஆப்புது.

³³ தெய்வ ஏசின, தன்ன பலபக்க இப்பா சிம்மாசனாளெ போசி குளிசிட்டு, நங்காக தரக்கெ ஹளி வாக்கு ஹளித்தா பரிசுத்த ஆல்ப்மாவின நங்க எல்லாரிகும் தந்நண்டித்தீனெ; அதாப்புது நிங்க காம்புதும், கேளுதும் ஒக்க.

^34-35 ஏசு, சத்து ஜீவோடெ எத்தட்டு சொர்க்காக ஹத்தி ஹோதாஹாற, தாவீது ஜீவோடெ எத்து ஹோயிபில்லெ; ஏனாக ஹளிங்ங, ‘தெய்வ நன்ன எஜமானினகூடெ, நா நின்ன சத்துருக்களா நின்ன காலடிக மாடாவரெட்ட, நீ நன்ன பலபக்க குளுதிரு’ ஹளி ஹளிதாயிற்றெ தாவீதே ஹளிதீனெ.

³⁶ அதுகொண்டு நிங்க குரிசாமேலெ தறெச்சா ஈ ஏசின தென்னெயாப்புது, தெய்வ எஜமானனாயிற்றும், கிறிஸ்துவாயிற்றும் மாடிப்புது ஹளிட்டுள்ளா காரெ, இஸ்ரேல் ஜனமாயிப்பா நிங்க எல்லாரும் தீர்ச்செயாயிற்றும் அருதிருக்கு” ஹளி பேதுரு ஆக்களகூடெ ஹளிதாங்.

³⁷ ஈ வாக்கு கேளங்ங ஆக்கள மனசிக குத்துகொண்டுத்து; ஆக்க பேதுறினும் மற்றுள்ளா அப்போஸ்தலம்மாரினும் நோடிட்டு, “கூட்டுக்காறே! அந்த்தெ ஆதங்ங நங்க ஏனாப்புது கீயபேக்காத்து?” ஹளி கேட்டுரு.

³⁸ அதங்ங பேதுரு ஆக்களகூடெ, “நிங்க மனசுதிரிஞ்ஞு, ஒப்பொப்பனும் நிங்கள தெற்று குற்றாக உள்ளா மாப்பிக பேக்காயி, ஏசுக்கிறிஸ்தின ஹெசறாளெ ஸ்நானகர்ம ஏற்றெத்திவா; அம்மங்ங பரிசுத்த ஆல்ப்மாவின வர நிங்காக கிட்டுகு.

³⁹ ஏனாக ஹளிங்ங, தெய்வ ஹளிதா ஈ வாக்கு நிங்காகும் நிங்கள மக்காகும், இஞ்ஞி பொப்பத்துள்ளா தெலெமொறேகும் தெய்வாயிப்பா எஜமானு, தன்னப்படெ ஊது பருசத்துள்ளா எல்லாரிக பேக்காயும் பீத்திப்புதாப்புது” ஹளி ஹளிதாங்.

⁴⁰ அதுகூடாதெ, பேறெ கொறே வாக்குகொண்டும் சாட்ச்சி ஹளிட்டு, “ஈ துஷ்ட ஜனதமேலெ பொப்பத்துள்ளா சிட்ச்செந்த நிங்கள காத்தணிவா” ஹளி புத்தி ஹளிகொட்டாங்.

⁴¹ பேதுறின வாக்கு கேட்டாக்க ஒக்க சந்தோஷத்தோடெ ஸ்நானகர்ம ஏற்றெத்திரு; அந்தத்தஜின ஏகதேச மூவாயிர ஆள்க்காறா தெய்வ சபெயாளெ சேர்சிரு.

ஒரிமெ

⁴² ஆக்க எல்லாரும் ஒந்தாயிகூடி அப்போஸ்தலம்மாரா உபதேசதாளெ நெலச்சு இத்துரு; ஹிந்தெ ஊருவளி ஹோயி பிரார்த்தனெ கீதண்டும், ஏசு ஏனாகபேக்காயி சத்துது ஹளிட்டுள்ளுதன ஓர்மெகாயிற்றெ தொட்டி முருத்து, திந்தும் குடுத்தும் பந்துரு.

⁴³ அந்த்தெ அப்போஸ்தலம்மாரா கொண்டு பல அல்புதங்ஙளும், அடெயாளங்ஙளும் நெடதுத்து; அதுகொண்டு எல்லாரும் அஞ்சிக்கெயோடெ இத்துரு.

⁴⁴ ஏசின நம்பாக்க எல்லாரும் ஒந்தே சலதாளெ கூடித்துரு; ஆக்காக உட்டாயித்தா எல்லா சாதனங்ஙளும் பொதுவாயிற்றெ உவேசிரு.

⁴⁵ ஆக்கள சல, சொத்துமொதலு ஒக்க மாறிட்டு, ஆக்களாளெ ஒப்பொப்பன ஆவிசெக பேக்காயி அதனாளெந்த பங்குமாடி கொட்டுரு.

⁴⁶ ஆக்க எல்லாரும் ஒந்தே மனசுள்ளாக்களாயி, எந்தும் அம்பலதாளெ பந்து கூடுரு; ஊருவளி ஹோயி, ஒந்தாயிகூடி பிரார்த்தனெகீது, தொட்டி முருத்து திந்து குடுத்து, கள்ளகபட இல்லாத்த மனசோடெ,

⁴⁷ ஏகோத்தும் தெய்வத வாழ்த்தி, தன்ன தயவினாளெ ஜீவிசி பந்துரு; ஜனங்ஙளா எடநடுவும் ஈக்காக ஒள்ளெ ஹெசறு உட்டாயித்து; அந்த்தெ, ஒந்நொந்து ஜினும் எஜமானனாயிப்பா ஏசு தன்ன நம்பி பொப்பாக்கள, ஆக்களகூடெ சேர்சிதாங்.