யாக்கோபு 1 - Moundadan Chetty

வாழ்த்து ஹளுது

¹ தெய்வாகும், எஜமானாயிப்பா ஏசுக்கிறிஸ்திகும் பேக்காயி கெலசகீயிவா யாக்கோபு ஹளா நா, எளிவா கத்து ஏன ஹளிங்ங, ஈ லோகத பல சலாளெயும் செதறி ஜீவிசிண்டிப்பா இஸ்ரேல் தேசத ஹன்னெருடு தறவாடுகாறிகும் தெய்வ அனுக்கிரக உட்டாட்டெ.

தெய்வ நம்பிக்கெயோடெ இருக்கு

^2-3 நன்ன ஹாற தென்னெ ஏசின நம்பி ஜீவிசிண்டிப்பா நன்ன கூட்டுக்காறே! நிங்க ஏசின நம்பி நெடிவுதுகொண்டு, நிங்காக பலவித கஷ்ட பொக்கு; அந்த்தெ பந்நங்கூடி நிங்க சந்தோஷமாயிற்றெ இருக்கு; ஏனாக ஹளிங்ங, அந்த்தல கஷ்ட பொப்பங்ஙும் அதன சகிப்பத்துள்ளா மனசொறப்பு நிங்காக கிட்டுகு.

⁴ அந்த்தெ நிங்க, மனசொறப்புள்ளாக்களாயி ஜீவுசதாப்பங்ங, நிங்காக எல்லதனும் சகிப்பத்துள்ளா பொருமெ கிட்டுகு. அதுகொண்டு நிங்க, ஒந்நனாளெயும் கொறவில்லாத்தாக்களாயி, தெய்வசொபாவங்கொண்டு தெகெஞ்ஞாக்களாயும் ஆப்பத்தெ பற்றுகு.

கஷ்ட பொப்பங்ங சகிப்பத்துள்ளா அறிவு

⁵ நிங்காக அந்த்தல கஷ்ட பொப்பா சமெயாளெ, அதன சகிப்பத்துள்ளா அறிவில்லாத்தாக்களாயி இத்தங்ங, அறிவு தப்பா தெய்வதகூடெ கேட்டு பொடிசிணிவா; ஏனாக ஹளிங்ங, தெய்வதகூடெ அறிவு பேக்கு ஹளி கேளா எல்லாரிகும் தெய்வ தாராளமாயிற்றெ கொடுகு; நினங்ங அறிவில்லே? ஹளி ஜாள்கூடாவனல்ல தெய்வ.

⁶ எந்நங்ங, தனங்ங அறிவு பேக்கு ஹளி தெய்வதகூடெ கேளாவாங், தெய்வ நனங்ங தக்கோ? தாரோ? ஹளி சம்செபட்டு கேளத்தெ பாடில்லெ; அந்த்தெ சம்செபட்டு கேளாவன மனசு, காற்றடிப்பா பக்க சாயிவா மரத ஹாற உள்ளுதாப்புது.

⁷ அந்த்தெ சம்செபட்டு கேளாவங்ங தெய்வத கையிந்த ஒந்தும் கிட்ட.

⁸ அந்த்தெ இருமனசோடெ ஜீவுசாவாங், தன்ன ஜீவிதாளெ ஸ்திர இல்லாத்தாவனாப்புது; அந்த்தலாவாங் ஒந்தும் காரெயும் ஒயித்தாயி கீயாறாங்.

பாவப்பட்டாவனும் ஹணகாறனும்

⁹ சபெக்காறாளெ பாவப்பட்டா ஒப்பாங் ஹணகாறனாயிற்றெ ஆப்பங்ங, தெய்வ தென்னெயாப்புது நன்ன ஈ நெலேக எசிது ஹளி மனசிலுமாடி தெய்வதபற்றி பெருமெ ஹளுக்கு.

¹⁰ அதே ஹாற தென்னெ ஹணகாறனும், அவங் தாந நெலேக பந்நங்கூடி தெய்வதபற்றி பெருமெ ஹளுக்கு; ஏனாக ஹளிங்ங, அதனமுச்செ அவங்ங இத்தா சொத்துமொதுலு ஒக்க, பிசிலிக கரிவா ஹூவின ஹாற உள்ளுதாப்புது; அதொக்க நசிச்சண்டுஹோக்கு ஹளிட்டுள்ளுது ஈக அவங்ங கொத்துகிடுத்தல்லோ.

¹¹ எந்த்தெ ஹளிங்ங, ஹூவு பொளாப்பங்ங ஒள்ளெ சொறாயி ஹூக்கு, மத்தினி பிசுலு பொப்பங்ங வாடி கரிதண்டு ஹோக்கு; அதே ஹாற தென்னெ ஹுல்லும் கோடேக ஒள்ளெ தளதளானெ இக்கு. பேசெ பொப்பங்ங ஒணங்ஙி கரிதண்டு ஹோக்கு; ஈ லோகாளெ உள்ளா சொத்துமொதுலின நம்பிண்டிப்பாவன ஜீவிதும் அந்த்தெ தென்னெ ஆயிண்டுஹோக்கு.

¹² தெய்வத நம்பி, கஷ்ட பந்நங்கூடி அதனொக்க சகிச்சு பொருமெயாயிற்றெ ஜீவுசாவாங் பாக்கியசாலி ஆப்புது; எந்த்தெ ஹளிங்ங, நன்ன சினேகிசா எல்லாரிகும் நா ஒள்ளெ ஜீவித கொடுவிங் ஹளி தெய்வ ஒறப்பாயிற்றெ வாக்கு ஹளி ஹடதெயல்லோ?

தெற்று குற்ற கீவத்துள்ளா பரீஷண தெய்வ பருசுதல்ல

¹³ ஒப்பங்ங ஒந்து தெற்று கீவத்துள்ளா பிஜார பொப்பதாப்பங்ங, தெய்வ நனங்ங ஈ பரீஷண பரிசித்தல்லோ? ஹளி ஹளத்தெ பாடில்லெ; ஏனாக ஹளிங்ங, தெற்று குற்ற கீயட்டெ, குடுங்ஙட்டெ ஹளி தெய்வ ஒப்புறினும் பரீஷண கீய; அந்த்தல பரீஷணத தெய்வ அல்ல பருசுது.

¹⁴ அந்த்தல பரீஷண பொப்புது அவாவன ஒளெயெ உள்ளா பேடாத்த ஆசெயாளெ தென்னெயாப்புது; ஆ ஆசெ அவன பேடாத்த பட்டெயாளெ கொண்டு ஹோயி குடுக்குது.

¹⁵ எந்த்தெ ஹளிங்ங ஒந்து ஹெண்ணு, பெசிறி ஆயி ஒந்து மைத்தித எந்த்தெ ஹெத்தாளெயோ, அதே ஹாற தென்னெயாப்புது, ஒப்பன மனசினாளெ பேடாத்த ஆசெத பீத்தண்டித்தங்ங, அது அவங்ங தெற்று குற்ற கீவத்தெ எடெ உட்டுமாடுகு, அது ஜினாஜினாக தொடுதாயி பொப்பங்ங, அவன மரணாக எளத்தண்டு ஹோக்கு.

¹⁶ அதுகொண்டு நனங்ங சினேகுள்ளா கூட்டுக்காறே! நிங்க எல்லிங்ஙி ஏமாந்து ஹோயி, இந்த்தல பரீஷணதாளெ குடிங்ஙியுடுவாட.

¹⁷ மனுஷன ஜீவிதாக ஆவிசெயுள்ளா எல்லா அனுக்கிரகங்ஙளும், அறிவும் சொர்க்காளெ இப்பா தெய்வத கையிந்த ஆப்புது கிட்டுது; நங்கள அப்பனாயிப்பா தெய்வதகையி பேடாத்துது ஒந்தும் இல்லெ; ஆ தெய்வதப்படெந்த ஒள்ளெ சொபாவும், ஹொல்லாத்த சொபாவும் மாறி மாறி பார; ஒக்க ஒள்ளேது மாத்தற ஒள்ளு.

¹⁸ எந்த்தெ ஹளிங்ங, தெய்வ உட்டுமாடிதா எல்லா ஜீவிகளாளெயும் பீத்து, மனுஷராயிப்பா நங்க முந்திதாக்களாயி இருக்கு ஹளி தெய்வ ஆசெபட்டுத்து; அதுகொண்டாப்புது தன்ன சத்திய வாக்கினாளெ ஹொசா மனுஷராயிற்றெ நங்கள உட்டுமாடிது.

தெய்வத வாக்கு கேட்டு அனிசரிசி நெடீக்கு

¹⁹ அதுகொண்டு சினேக உள்ளா நன்ன கூட்டுக்காறே! நிங்க தெய்வத வாக்கின கேளத்தெ பேக சிர்திசி கேளிவா; எந்நங்ங, திரிச்சு உத்தர ஹளத்தாப்பங்ங அவசரபடுவாட; மற்றுள்ளாக்களமேலெ அரிசபடாதெ பொருமெயோடெ கூட்டகூடத்தெ படிச்சணிவா.

²⁰ ஏனாக ஹளிங்ங, நங்க அரிசபட்டு கூட்டகூடா வாக்கினாளெ, பேறெ ஒப்பன தெய்வாக இஷ்டப்படா ஹாற மாற்றத்தெ பற்றுகோ? நங்கள அரிசங்கொண்டு ஒப்பனும் ஒள்ளேவனாயிற்றெ மாற்றத்தெ பற்ற.

²¹ அதுகொண்டு, நிங்கள ஹளே ஜீவிதாளெ பாக்கி உள்ளா எல்லாவித பேடாத்த சொபாவதும், தெய்வாக இஷ்டில்லாத்த எல்லதனும் நீக்கிட்டு, நங்கள ஹொசா மனுஷனாயி மாற்றிதா தெய்வத வாக்கின கேட்டு தாழ்மெயோடெ கைக்கொண்டணிவா; அது நிங்கள ஹொசா ஜீவிதாத ஏகோத்தும் காக்கு.

²² அதுமாத்தற அல்ல, சத்திய வஜனாத நிங்க கேளுது மாத்தற போர. நிங்கள ஜீவிதாளெ அதனபிரகார கீதுதில்லிங்ஙி, நிங்கள நிங்களே ஏமாத்தாஹாற இக்கு.

²³ ஏனாக ஹளிங்ங, ஒப்பாங் தெய்வத வாக்கின கேட்டட்டும் அதனாளெ ஹளிப்பா ஹாற கீயாதெ இத்தங்ங, அவங் தன்ன முசினித கன்னாடியாளெ நோடாவன ஹாற இப்பாங்.

²⁴ எந்த்தெ ஹளிங்ங, அவங் தன்ன முசினித கன்னாடியாளெ நோடிட்டு கொறச்சு ஆச்செபக்க ஹோப்பதாப்பங்ங, அவங் எந்த்தெ இத்தீனெ ஹளிட்டுள்ளுது அவங்ஙே மறதண்டுஹோக்கு; அதே ஹாற தென்னெ தெய்வத வாக்கு கேட்டட்டும் அதனாளெ ஹளிப்பா ஹாற அனிசரிசி நெடியாத்தாக்களும் இப்புரு; ஆக்கள கொறவின ஆக்க அருதட்டும் அதன மறதண்டு ஹோதீரெ.

²⁵ எந்நங்ங, ஒந்து கொறவும் இல்லாத்த தெய்வத வாக்கின கேட்டு, அதன மறெயாதெ, ஆக்கள ஜீவிதாளெ கைக்கொண்டு, ஆ வாக்குபிரகார நெடிவாக்காக அதனாளெ உள்ளா எல்லா அனுக்கிரங்ஙளும் கிட்டுகு; எந்த்தெ ஹளிங்ங தெய்வத வாக்கிக மனுஷன எல்லா கொறவிந்தும் ஹிடிபுடுசத்துள்ளா சக்தி உட்டு.

செரியாயிற்றுள்ளா தெய்வபக்தி

²⁶ தன்ன நாவின அடக்காதெ, நா ஒள்ளெ தெய்வபக்தி உள்ளாவனாப்புது ஹளி பொருதே மனசினாளெ பிஜாரிசிண்டு நெடிவாவன பக்தி ஒந்நங்ஙும் கொள்ள; அந்த்தலாவாங் தன்னத்தானே ஏமாத்தாவனாப்புது.

²⁷ நங்கள அப்பனாயிப்பா தெய்வதமேலெ உள்ளா ஒள்ளெ பக்தி ஏனொக்க ஹளிங்ங; தப்பிரிமக்கள சகாசுதும், கஷ்டதாளெ இப்பா விதவெகளா சகாசுதும், ஹிந்தெ லோகக்காரு அசுத்தியாளெ நெடிவா ஹாற, ஒந்து தெற்று குற்றதாளெயும் குடுங்ஙாதெ தன்ன காத்தம்புதும் ஆப்புது செரியாயிற்றுள்ளா தெய்வபக்தி.