Hiburu­fɔm 3 - Nyεmε Jɔrε Kadasi

Kabo Yesu tara Moyisi barasu ni

¹ M ninbaam, ambɛrɛ bo Nyɛmɛ ayi am ni yɛrɛ ka mata­fɔ casim ni, am fa am sunsunni se Yesu ŋu, yiri bo Nyɛmɛ asunma i na i ti ya sa­yoo­wa dɔŋgu­yo­fɔm kpiɛn n ni. Ya su yiri su a, ye ya di i daani kere minɛm a.

² I yoori i juma n bo Nyɛmɛ yiiri i ka i yo i n ni nahɔrɛ su wɔ, kabo Moyisi mmɔɔ yo yoori i juma kɛrɛ Nyɛmɛ awuru n nu, bukaari Nyɛmɛ minɛm ni nahɔrɛ su n wɔ.

³ Kabo sɔnɔ bo i ta awuru n la jirima tara awuru n ni i tii ni, sɔ ye Yesu la jirima tara Moyisi a.

⁴ Awuru kɛrɛ la i ta­fɔ, ama, Nyɛmɛ ti deke n kɛrɛ tii a.

⁵ Moyisi yo laari dabuŋu yoori i juma kɛrɛ Nyɛmɛ awuru n nu, bukaari Nyɛmɛ minɛm n ka amusui­su­fɔ ɔ, na wɔ kere bu deke bo Nyɛmɛ koroori ka i bá se bu ni.

⁶ Ama, Kristo yiri ti Nyɛmɛ Wa a, yiri la dabuŋu Nyɛmɛ awuru n nu koro bita Nyɛmɛ minɛm a. Nzɛn ya bita ya tama n ni ahoresi, yɛrɛ ti i awuru n nu­fɔm a.

Nyɛmɛ minɛm ŋumi­yi n dɛɛ jɔrɛ

⁷ Nyini dɛɛ ti, kabo Awiɛwiɛ Casi n se ni, “Nyuma, nzɛn am tiiri kabo Nyɛmɛ suse,

⁸ má am ma am sui yo tan­tanantan, kabo am nam yo yoori bu sui tan­tanantan na bu yoori Nyɛmɛ na bu niɛ ni, saŋga bo bu wo boro kpantain n nu na bu keteeri i nɔaniɛ ni.

⁹ Na Nyɛmɛ ase ka, ‘Dɔ ye am nam yo yoori m na bu niɛ a, haari ni bo bu ŋuuri sam bo m yoori bu, nyini afɔ abura­na n kɛrɛ nu ni, bu yoori m wɔ na ba niɛ.

¹⁰ Nyini dɛɛ ti ye m faari yaa bu ŋu a, ye m seeri ka, ba mini atin n a, dama ba yo má m sa koroo­wam ni.

¹¹ Na yaa ati m, na ma tan ndiɛ ka, bu ny má atin wura má asiɛn n bo má m ma bu nya ŋumi­yi n nu ni.’”

¹² M ninbaam, am si am ŋu sa na má am be ahore­mbaa yo kekereke, na i kaaki i sin bo Nyɛmɛ, yiri bo i wo bɛrɛ saŋga kɛrɛ n dɛɛ atin ni.

¹³ Cɛɛn kɛrɛ bo ale acin na bu fere i ka, “Nyuma,” am sutu am beŋgu fɔ, na má am ma be dadaka am na am yo satiɛ na am sui yo tan­tanantan.

¹⁴ Nzɛn ya koro bitaari bumboori su nɔaniɛ n kenken haari kɔ juuri i awieeri, nyini n kere ka ya ni Kristo saŋga yo juma kun wɔ lɛɛ.

¹⁵ Kabo ba kɛrɛ i Nyɛmɛ Jɔrɛ Kadasi n nu ni, ka, “Nyuma, nzɛn am tiiri kabo Nyɛmɛ suse, má am yo am sui tan­tanantan, kabo am nam yo yoori bu sui tan­tanantan.”

¹⁶ Ŋmam yo tiiri Nyɛmɛ nɔaniɛ n ye bu yoori bu sui tan­tanantan n a? Má minɛm kɛrɛ bo Moyisi yo yiiri bu fiteeri Ijipiti asiɛn n su ni, nzɛn sɛ?

¹⁷ Ye ŋmam ye Nyɛmɛ yo faari yaa bu ŋu afɔ abura­na n a? Má bo bu yo yoori satiɛ na bu wuuri boro kpantain n nu ni?

¹⁸ Ŋmam ye Nyɛmɛ yo taanri ndiɛ ka, “Bu nya má atin wura má asiɛn n bo má m ma bu nya ŋumi­yi n nu n a?” Má bɛrɛ n bo bu yo keteeri i nɔaniɛ ni, nzɛn sɛ?

¹⁹ Deke bo i ti na ya ŋu ka ba wura má asiɛn n su na bu nya ŋumi­yi n la ka, ba yo má i yarada.