'Ya Su 8 - Kibaku NT

¹ Sawulu adai akwanda, tǝ dzǝ yiɗɛ ka ndǝ tsi Istafanus. Ata vǝr ǝnda kǝmangarkur nam ɓwaltasang baditsǝnidzi ata kǝra ikǝlizǝya akwa Ursalima; ba sanga ndzǝ nam aka mbǝrsa kikilntadzi atǝra akwa diyir Yahudiya ba Samariya ama ndzǝr hya yarɛ ni ani kura akwa.

Bwanai Kikilnta Ikǝlizǝya

² (Ndzǝ yar laka nam ada vǝkǝr sǝlai ala Hyal si ka harnta Istafanus, aka tuwa nam ngga.)

³ Ama Sawulu baditsǝni huzanta ikǝlizǝya. Dzǝ mwari akwa kǝi ka kǝi, ka ndǝghǝrba sǝli kaka mwahyi ka pu tǝ dar akwa fǝrsǝna.

Filibus akwa Samariya

⁴ Ndzǝ nam aka mbǝrsa nam tara kikilntadzi mwari akwa kǝlara vui ka nkǝr ndǝrǝr Hyal nam sǝɗa.

⁵ Filibusu mwari akwa di nam ngga akwa Samariya, ka nkǝr labar ata kǝra Kǝrsti akwanda.

⁶ Sakatǝ dlamiyir ndzi ngati Filibusu ba wula parsu nǝr ndatǝdzi yarɛ tǝ dzǝ 'ya, sanga dar si thlǝmɛ ala sǝ nam tǝ dzǝ ada gha.

⁷ Mambǝl nam kulɗa yarɛ ada sǝba akwa dza ndzǝ hang kaka tuwar kuɗahu ngga, ba ndzǝ nam tǝ dza dar satǝdzi kaka ngurngudi hang ɓui mbǝtǝdzi.

⁸ Ani kutsari nam ngga kǝ 'ya akwa mǝlmɛ nda.

Simaun Igha ni

⁹ Ndǝ laka adai tǝ thlǝmari Simaun ada 'ya ighakur akwanda, nǝr fá hang, dza ada ndati ndzǝr Samariya sang; dza ada mǝrti kǝrni apa ndǝ laka nam ngga.

¹⁰ Kǝlara ndɛ, ndzǝ nam ngga-ngga ba nkyǝnkyiɗu tsaɓtsǝnidzi adzǝni. Dar ada ndǝrɛ ata kǝrari apǝri “Ndǝ ǝni ani dǝnar Hyal nam tǝ ndǝ zǝndi apǝri ani dǝna nam ngga.”

¹¹ Ndzǝ ada nu tǝni kadǝbar dzǝ ndati tǝ dar nǝr saka hang aka ighakur ni.

¹² Ama sakatǝ dar mbǝrsa aka Filibusu, sakatǝ dzǝ ada nkǝr ndǝrǝr Hyal nam sǝɗa ata kǝra kuhyikur Hyal ba thlǝma Yɛsu Kǝrsti. Kadǝbar ǝni, sal hang kaka mwahyi ndǝ 'ya ala dar bamtizǝma.

¹³ Antǝ Simaun tǝ kǝrni mbǝrsa ndǝ ka 'ya alari bamtizǝma. Dzǝ baditsǝni nu Filibusu akwa kǝlara vui nam tǝ dzǝ mwari, ba dzǝ ada ndatǝdzi aka sǝr ndati nam ngga-ngga tǝ Filibus tara 'yati.

¹⁴ Sakatǝ ndzǝr hya yarɛ nam akwa Ursalima ngati apǝri ndzǝr Samariya dlutsi ndǝrǝr Hyal nam sǝɗa, dar hyanti Bitrusu aka Yawhana ala dar.

¹⁵ Sakatǝ dar si, dar 'ya aduwa ala dar apǝri ka dar dlutsi Mambǝl Kartǝ.

¹⁶ Akuya Mambǝl Kartǝ ta si ata kǝra dar kwataku wɛ, akuya ndǝ 'ya ala dar bamtizǝma ɗiɗi akwa thlǝma Thlaku Yɛsu ni.

¹⁷ Antǝ Bitrusu aka Yawhana pukǝr tsiya dar ala ndzǝr nu yarni, ba dar dlutsi Mambǝl Kartǝ.

¹⁸ Sakatǝ Simaun tara wula apǝri Mambǝl ni sǝgǝl ata kǝra ndzi, sakatǝ ndzǝr hya yarɛ pukǝr tsiya dar ata kǝra dar, dzǝ ada bara la dar kwapa ka dzǝ ɗǝlba dǝna ǝni.

¹⁹ Dzǝ nkǝrɛ, “Ngyar ka yi ɓui dǝna ni Yi ma, ani ka sakatǝ Yi pukǝr tsiyawai ala ndzi, dar ata dlutsi Mambǝl Kartǝ!”

²⁰ Ama Bitrusu sǝnau alari, “Ngyar gɛ ba kwapar ngɛ mwari akwa u'u, akuya gǝ ada ɗǝnga apǝri gǝ ata ɗǝlba sǝgar Hyal aka kwapa!

²¹ Gɛ adi aka palai wala nǝbwa akwa kǝthlǝr Hyal ni wɛ, kadǝbar ɗǝfa gɛ adi kal-kal akǝma Hyal wɛ.

²² Tubi ta kulɗakur ngɛ ni ka gǝ 'ya aduwa ala Thlaku; tar dzǝ awa kyifǝnta ala gɛ dzǝli ɗǝnga ni akwa ɗǝfa gǝ ni.

²³ Akuya Yi ada wulɛ gǝ ghǝi-ghǝi aka ɗǝwatukur sǝlku ba gǝ akwa fǝrsǝnar biku.”

²⁴ Antǝ Simaun Sǝnau, “'Ya aduwa ala Thlaku alai ani ka ta sǝ tǝ gǝ nkǝrɛ ni ta ɓui tǝra.”

²⁵ Aghǝla tǝ dar sakǝidatsǝni ba nkǝr labarǝr Thlaku akwa Samariya, Bitrusu aka Yawhana ɓitasi akwa Ursalima. Ba dar hyati akwa mǝlmǝ yarɛ hang nǝr Samariya ata kǝra whalɛ ka nkǝr ndǝrǝr Hyal nam Sǝɗa.

Filibus aka Ndǝr Habasha

²⁶ Kulini ndǝr hyantǝr Thlaku ka nkǝrɛ ala Filibusu, “Mwari tǝbwar anǝm, akwa whalǝr 'yi 'ya nam ada lǝghǝl akwa Ursalima ka la Gaza.”

²⁷ Ani dzǝ baditsǝni lǝba, ba ata kǝra whalǝrni dzǝ kǝɓai aka ndǝr Habasha nam ntsu, ndǝ nam ngga ata kǝra sanga kwapar Kandasi, kuhyir mwala nǝr Habasha. Ndǝ ni dzǝ tǝra akwa Ursalima ka vǝkǝr sǝlai,

²⁸ ba ata kǝra whalǝr si aivi dzǝ ada ndzai akwa dǝrkuɓa tǝ dzǝ ada kǝra kakadǝr nabi Isaya.

²⁹ Mambǝlǝr Hyal nkǝrɛ ala Filibusu, “Mwari adzǝ dǝrkuɓa nda, ka gǝ hyati adzǝ kudzǝghɛ.”

³⁰ Antǝ Filibus ka whuiya lǝngui adzǝ dǝrkuɓa ndari, dzǝ ka ngati tǝni ada kǝra kakadǝr nabi Isaya. Filibusu yu tǝni, “Gɛ ada ngaba sǝ nam tǝ gǝ ada kǝra ni?”

³¹ Dzǝ ka sǝnau, “Mǝmi tǝ Yi awa ngaba tar ma ndǝ laka nkǝrba alai?” Ba dzǝ kǝga Filibusu ka dzǝ lǝkwa dǝrkuɓa ni ka dzǝ ndzai aka dza.

³² Vui nam akwa Labar Hyal ni tǝ dzǝ ada kǝra ni ani ahani: “Ndɛ pwar tǝni apa tǝma tǝ ndɛ ata mwar thlakǝr wuya, ba apa zǝr agam akǝma ndǝr sǝ sǝsǝr tǝma dzǝ kǝɗǝk, dzǝ ta mbur nyari wɛ.

³³ Akwa tǝ ndǝ kǝlnta sǝlaiyirni, ndǝ ta 'ya alari sǝ nam kal-kal wɛ. Wa ani ata ndǝrɛ ata kǝra kulfǝrni? Akuya ndǝ kǝtǝ mpikari akwa dunya.”

³⁴ Ntsu ni yu Filibusu, “Nkǝrɛ alai, nabi Isaya ni ada ndǝrɛ ata kǝra kǝrni kǝna ndǝ damwa?”

³⁵ Antǝ Filibusu baditsǝni aka vui nam akwa Labar Hyal nda, dzǝ nkǝrɛ alari sǝr musubu ata kǝra Yɛsu.

³⁶ Apa tǝ dar ada mwari akwa whalɛ, dar ka si akwa vui yimi laka, ba ndǝ ntsu ni nkǝrɛ, “Wulɛ, ani yimi. Kami kura ndǝ awa 'ya alai bamtizǝma?” [

³⁷ Filibusu nkǝrɛ alari, “Ma gǝ mbǝrsa aka sanga ɗǝfa gɛ, ndǝ ata 'ya ala ngɛ bamtizǝma.” Dzǝ ka nkǝrɛ, “Yi mbǝrsa apǝri Yɛsu Kǝrsti Zǝr Hyal.”]

³⁸ Ba ndǝ ntsu ni gha ka ndǝ hyanti dǝrkuɓa ni. Antǝ gyapu Filibusu ba ndǝ ntsu ni mwari adzǝ yimi, ba Filibus ka 'ya alari bamtizǝma.

³⁹ Sakatǝ dar sǝba akwa yimi, kura aka santa saka Mambǝlǝr Thlaku kǝtǝ Filibusu atǝra. Ndǝ ntsu ni ta ɓakta wula tǝni wɛ, ama dzǝ tǝra ata whalǝrni dzǝ ada kutsari.

⁴⁰ Filibusu tsantǝdzi akwa vui nam tǝ ndɛ ada kǝga tǝ Azautus; buraburá ata kǝra nkǝr ndǝrǝr Hyal nam Sǝɗa akwa kǝlara mǝlmɛ tar tǝ dzǝ tsǝbti Kaisariya.