'Ya Su 7 - Kibaku NT

Labar Istafanus akǝma Ndzǝr Hakar Yahudi ni

¹ Antǝ kuhyir fǝrist yu Istafanus, “Sǝ yarni dzǝri ya?”

² Dzǝ ka sǝnau, “Madar mama ba Tada yarɛ, siyamɛ thlǝmɛ alai! Hyal nam aka nggakur tsantǝdzi ala kakár muri Ibrahim akwa Misapautamiya, kabutu dzǝ ata ndzai akwa Haran.

³ Hyal nkǝrɛ alari, ‘Ngyar ndzǝr ngɛ ba mǝlmǝr ngɛ, ba ka gǝ mwari akwa di nam tǝ Yi ata tsanti ala ngɛ.’

⁴ “Ani Ibrahim ka ngyar diyir ndzǝr Kaldiya ka ndzai akwa Haran. Aghǝla tǝ atǝgǝri nti, Hyal hyanti tǝni akwa di nam tǝ gǝri ada ndzai kulini.

⁵ Ama Hyal ta lar warta akwani wɛ, wala apa kǝrtǝr thlǝlɛ duku adi wɛ. Ama Hyal 'ya alkawal alari apǝri tǝ hankal sanga diyari ata ndzai ala Ibrahim kaka kulfǝrni yarɛ, wala ahani dzǝ adi aka madar kwataku wɛ.

⁶ Əni ani sǝ tǝ Hyal tara nkǝrɛ alari, ‘Kulfǝr ngɛ ata ndzai akwa di mǝthlǝɓi, vui nam tǝ dar ata ndzai fali ba ndɛ ata la dar bwanai nam kulɗa nǝr fá kumthlani fwaɗu.

⁷ Ama Yi ata la bwanai ala di nam tara hau tǝ dar akwa falikur ni, ata dǝnta dar ata sǝba akwa di nda ka vǝkǝr sǝlai alai akwani.’

⁸ Antǝ Hyal ka la Ibrahim sǝ mbwa-mbwa ni nǝr thlakatsa. Ba Ibrahim ka ndzai atǝgǝra Isaku ba dzǝ ka thlanta alari katsa aghǝla tǝ ndǝ yai tǝni aka vǝr ntsisu. Aghǝla ǝni Isaku ndzai atǝgǝri Yakubu, ba Yakubu ndzai atǝgǝra kakár mur yarɛ kum kapu sǝɗǝ ni.

⁹ “Madar Yakubu kǝ ndzai ndzǝr sǝlku ala zǝr mama dar Yusufu, ba dar ka ɗǝlnta tǝni ka dzǝ ndzai fali akwa Masar. Ama Hyal adzǝni,

¹⁰ ba dzǝ ka ɓǝlaba tǝni akwa sanga bwanai. Dzǝ la Yusufu bǝrkawakur ba mǝrti tǝni ka dzǝ ɓui ɗakur akǝma Firauna, kuhyi nǝr Masar; ani dzǝ ka mǝrti tǝni gumna ata kǝra Masar ba sanga kǝiyirni.

¹¹ “Antǝ mi ka lǝkwa sanga diyir Masar ba Kan'ana, ka si aka bwanai nam ngga, ba tada muri adi ada ɓui sǝr sǝm wɛ.

¹² Ama sakatǝ Yakubu tara ngati apǝri uhyi tsu adai akwa Masar, dzǝ hyanti tada mur yarɛ nǝr tangkur.

¹³ Saka nam sǝɗǝkur tǝ dar mwari, Yusufu ka tsanti asǝrni ala madar angǝri, ba dzǝ ka tsanti tǝ dar ala Firauna.

¹⁴ Antǝ Yusufu ka hyanti ala atǝgǝri Yakubu ba sanga ndzǝrni ka dar si akwa Masar, dar sang murfwǝthani kapu ntufu.

¹⁵ Ani Yakubu ka tǝra akwa Masar, vui nam tǝ dza ba madarni nti akwa.

¹⁶ Ndǝ mwari aka dza akwa Sakim akwa kul nam tǝ tada dar Ibrahim tara ɗǝlba aka madar Hamaun tǝ kwapa laka.

¹⁷ “Apa tǝ sakari si kudzǝghɛ sakatǝ Hyal ata ghǝiyaba alkawalǝrni ala Ibrahim, hangkur ndzǝr muri nam akwa Masar dzaktǝdzi.

¹⁸ Antǝ kuhyi damwa nam kura ta zǝndi ata kǝra Yusufu baditsǝni kuhyikur akwa Masar.

¹⁹ Kuhyi ni sǝnya ndzǝr muri ba la bwanai ala tada muri yarɛ, aka hau tǝ dar ka dar punta mbǝghyiwar dar, ani ka dar nti.

²⁰ “Akwa saka ǝnda ani tǝ ndǝ yai Musa, zǝr nam dakwai akǝma Hyal, ndzǝr yarni ɓǝla tǝni aivi nǝr hya makǝr.

²¹ Sakatǝ ndǝ vi tǝni abǝla, nkwar Firauna kǝtǝ tǝni ka si aka dza apa zǝrǝrni.

²² Ndǝ ka hyipti sanga bǝrkawakur Masar ala Musa, ba dzǝ aka dǝna akwa ndǝrɛ ba 'yarni.

²³ “Sakatǝ Musa fá fwaɗǝthlani aka ya, dzǝ ɗǝmhǝi ka dzǝ mwar wuti ndzǝrni Izǝraila.

²⁴ Dzǝ wula pathlu akwa ntsa dar ada sa bwanai aka ndǝr Masar, ani dzǝ mwari ka dzǝ mbanatsǝni tǝni ba nkyi sǝkur ata kǝra ndǝr Masar ni dzǝ ka tsi tǝni.

²⁵ Musa ɗǝnga apǝri ndzǝrni zǝndi apǝri Hyal ata kǝthlǝr aka dza ka mbulba tǝ dar, ama dar ta zǝndi wɛ.

²⁶ Sǝbar arpɛ Musa si ka ɓui ndzǝr Izǝraila sǝɗɛ ada mpa. Dzǝ 'ya ka dzǝ dzǝkuti tǝ dar aka nkǝrɛ, ‘Dakurai, gǝri madar mama, kami tǝ gǝri ada bara ka 'yanta kǝma gǝri?’

²⁷ “Ama ndǝ nam ada 'ya kulɗakur ala kǝmani ni mbiyanta Musa ata ngwam. Dzǝ yuwɛ, ‘Wa mǝrti tǝngɛ ngga ba ndǝr haka ata kǝra yar?

²⁸ Gɛ ada bara tsi tǝra apa tǝ gǝ tara tsi ndǝr masar nagha nda ya?’

²⁹ Sakatǝ Musa tara ngati ǝni, dzǝ whui atǝra akwa Midiyan vui nam tǝ dzǝ ndzai apa mǝthlǝɓi ba dzǝ ɓui madar sǝɗɛ.

³⁰ “Aghǝla fá fwaɗǝthlani yarɛ tara kwatsǝni, ndǝr hyantǝr Hyal tsantǝdzi ala Musa akwa kanyara u'u ada mba ata zǝr fwɛ ntsǝkǝɗa akwa babalǝr 'yi 'ya adzǝ Payar Sǝnai.

³¹ Sakatǝ Musa wula ǝni, dzǝ ndatǝdzi ka sǝ tǝ dzǝ wuti ni. Apa tǝ dzǝ mwari adzǝ ka dzǝ wula kudzǝghɛ, dzǝ ka ngati kuɗaha Thlaku:

³² Dzǝ nkǝrɛ, ‘Yi dza Hyalǝr Tada gǝri yarɛ, Hyalǝr Ibrahim ni, Isaku, ba Yakubu.’ Musa ada kǝgǝdzi aka hyivǝr ba kura dzǝ awa mǝzi wulɛ.

³³ “Thlaku nkǝrɛ alari, ‘Ngunta ɓǝɓaiyir ngɛ; akuya vui nam tǝ gǝ ada hyati ati ni daiyirna Yi duku.

³⁴ Yi kǝ wula bwaniyir ndzǝrna akwa Masar. Yi ngati whuwhuniyir dar, ba tǝ Yi sǝgǝl ka mbulba tǝ dar. Kulini mwari, Yi ata hyanti tǝngɛ akwa Masar.’

³⁵ “Əni ani tsu Musa nam tǝ dar tara ngǝla aka ndǝrɛ ni, ‘Wa mǝrti tǝngɛ ngga ba ndǝr haka ata kǝra yar?’ Dzǝ dza tǝ ndǝ hyanti ka dzǝ ndzai kuhyir dar ba mbulba tǝ dar atar Hyal tǝ kǝrni, atar ndǝr hyantǝr Hyal ni nam tara tsantǝdzi alari atar u'u ada mba zǝr fwɛ akwa ntaku.

³⁶ Dzǝ faba tǝ dar akwa Masar ba dzǝ 'yati sǝr kudǝra yarɛ ba parsu nǝr ndatǝdzi yarɛ akwa Masar, akwa yimǝr Manda nam Magza, ba akwa ntaku nǝr fá fwaɗǝthlani.

³⁷ “Musa tǝ kǝrni gha ala ndzǝr Izǝraila, ‘Hyal ata hyanti ala gǝri nabi apa Yi akwa ntsa ndzǝr gǝri.’

³⁸ Dza akwa kǝltsǝni kǝr akwa ntaku, kaka ndǝr hyantǝr Hyal nam tara ndǝrɛ alari ata Payar Sǝnai, ba kaka tada muri yarɛ; ba dzǝ dlutsi labar mpikɛ ka la muri.

³⁹ “Ama Tada muri yarɛ ngǝla ngandǝrǝr Musa. Dar ngǝla tǝni ba dar bara ɓakta tǝra akwa Masar.

⁴⁰ Ani dar nkǝrɛ ala Haruna, ‘Mǝrti ala yar hyalǝr mǝlǝm yarɛ nam ata pwar tǝ yar. Yar ta zǝndi sǝ nam tara 'ya ala Musa nam tara faba tǝ yar akwa Masar wɛ.’

⁴¹ Ani dar ka hǝnti mǝlǝm laka apa zǝr kǝrnar thla; dar ka 'ya kǝdlǝrsu alari, ba kutsari ata kǝra sǝ nam tǝ dar 'yati.

⁴² Ama Hyal ka mbalntadzi ka hamnta tǝ dar ka vǝkǝr sǝlai ala tsambiya atahyal. Əni ada mwari aka sǝ nam tǝ ndǝ rǝbwai akwa kakadǝr nabi yarɛ, “ ‘Gǝri ta siya kǝr alai kǝdlǝrsu ba hamnta su wɛ nǝr fá fwaɗǝthlani akwa ntakǝr 'yi 'ya, ndzǝr kǝiyir Izǝraila?

⁴³ Gǝr haɓǝtǝ fǝrǝr Maulauk ba tsambiyar hyalǝr ngɛ Rafan, mǝlmǝ nam tǝ gǝri mǝrti ka vǝkǝr sǝlai alari. Kadǝbar ǝni Yi ata hyanti tǝ gǝri alǝkwa falikur abǝla ata hǝiya Babila.’

⁴⁴ “Tada muri yarɛ dar kǝl fǝr nguzi aka dar akwa ntaku. Ndǝ hǝnti akwa whal nam tǝ Hyal tara tsanti ala Musa.

⁴⁵ Aghǝla fá yarɛ laka, sakatǝ Dzasuwa tara pwar kaka yarɛ akwa vui mpa ata kǝra ndǝr yarɛ nam tǝ Hyal tara kǝdlǝba akwa di ni, dar kǝtǝ fǝr nguzi ni alǝkwa mǝlmǝr dar nam bǝlin ni. Ba dzǝ ka ndzai akwanda har sakar Kuhyi Dauda.

⁴⁶ Dauda ɓui maiwakur akǝma Hyal, ba dzǝ yu Hyal ka dzǝ ngyar whalɛ nam tǝ dza ta tsati fǝr vǝkǝr sǝlai ala Hyalǝr Yakubu.

⁴⁷ Ama ndǝ nam tara tsati fǝr ala Hyal ni ani Sulaimanu.

⁴⁸ “Ama Hyal nam Ati ta Sang ni dzǝ adi ada ndzai akwa kǝi nam tǝ ndǝ tsa tǝ tsiya ndǝ wɛ; apa tǝ nabi nkǝrɛ,

⁴⁹ “ ‘Dǝgǝl kuhyikurna ani atahyal, ba aghǝli ani kǝrtǝr vǝ thlǝlawai. Ndzǝli kǝi mǝmi tǝ gǝri ata tsa alai? ndǝ Thlaku ni. Kǝna ama vui tǝ Yi awa ghǝrbadzi ati?

⁵⁰ Adi tsiyawai dza mǝrti gyapu atahyal aka aghǝli wɛ?’

⁵¹ “Gǝri ndzǝ nam nkǝngɛ! Gǝri bǝlku akwa ɗǝfu ba kulang ala dzǝrkur. Tatang gǝri ada mpa aka Mambǝl Kartǝ, apa tǝ kakár gǝri yarɛ tara 'ya!

⁵² Nabi madi nam kura tada gǝri yarɛ ta 'ya kulɗakur alari? Dar tsai wala nabiyir Hyal ndzǝ nam akwa saka tara kwatsǝni tara nkǝrɛ siyir Ndǝ nam Kal-kal ni. Ba kulini gǝr ɓǝlai ka tsi tǝni—

⁵³ ndzǝr hyantǝr Hyal la gǝr mabariyir Hyal, ama tsu gǝri ta ngandǝrɛ wɛ.”

Ndǝ Ɗǝgal Istafanus ka Tsi Tǝni

⁵⁴ Sakatǝ dar ngati ǝni, ɗǝfa dar ka sǝwa tǝ dar ada ɗǝ hyira dar ata kǝrari.

⁵⁵ Ama Istafanus ghǝi-ghǝi aka Mambǝl Kartǝ, dzǝ wulɛ alǝtahyal ba dzǝ ka wula nggakur Hyal, ba Yɛsu ada hyati tǝbwar tsisǝma Hyal.

⁵⁶ Ba dzǝ nkǝrɛ ala dar, “Wulɛ, Yi wula atahyal mburntadzi ba Zǝr Ndɛ ada hyati tǝbwar tsisǝma Hyal.”

⁵⁷ Ndzǝ ngganggar vui kǝltsǝni kǝr dar puti tsiya dar ata thlǝma dar ka baditsǝni lǝlɛ. Dar sang whuiya lǝngui ata kǝrari,

⁵⁸ ba dar ndǝrba tǝni alǝba ata hǝiya mǝlmɛ nam ngga dar baditsǝni ɗǝgal tǝni tǝ paya. Ndzǝr bǝrkur tǝni ngunta lǝkutǝr dar ka pui adzǝ thlǝla zǝr dakwai nam tǝ thlǝmari Sawulu.

⁵⁹ Sakatǝ dar ada ɗǝgal tǝni, Istafanus 'ya aduwa, “Thlaku Yɛsu, dlutsi mambǝlǝrna.”

⁶⁰ Dzǝ dla tǝ ɓungyɛ, ka lǝlɛ, “Thlaku, ta gǝ ta ɗǝnga biku ni ata kǝra dar!” Dzǝ nkǝr ǝni dzǝ ka nti.