'Ya Su 4 - Kibaku NT

Ndǝ Ngǝti Bitrusu aka Yawhana

¹ Sakatǝ Bitrusu aka Yawhana ada 'ya labar ala ndzi, fǝrist yarni ba katsala nǝr ɓǝla fǝr Hyal ni ba ndzǝr Saduki yarni ka si.

² Ndzǝ ni ɗǝfa dar sǝwa kadǝbar ndzǝr hya yarɛ ada hyipɛ ala ndzi apǝri ndzǝ ntǝnti ata hyati akwa nti, apa tǝ Yɛsu tara hyati akwa ntǝnti.

³ Ani dar ngǝti tǝ dar ka pu tǝ dar akwa fǝrsǝna har tǝ vǝr kuri kadǝbar tǝhaku kurtaka 'ya.

⁴ Ama hang akwa ntsa ndzǝ nam tara ngati labar ni dar ka mbǝrsa, ani hangkur sal nam tara mbǝrsa dar kudzǝghɛ dzǝ ndzǝ kumthlani kumɛ ka ntufu.

⁵ Sǝbar arpɛ nggar fǝrist yarni, ndzǝ ngga-ngga yarɛ, kaka malǝmǝr mabari yarni dar ka tsaɓtsǝnidzi akwa Ursalima.

⁶ Dar kǝɓai aka Hanas kuhyir fǝrist, ba Kayafas, Yawhana, Alizanda, ba laka sǝli nam akwa yalǝr kuhyir fǝrist ni.

⁷ Dar si aka ndzǝr nuwɛ sǝɗǝ ni akǝma dar ka yuwɛ, “Aka dǝna madi kǝna akwa thlǝma wa tǝ gǝri ada 'ya sǝni?”

⁸ Antǝ Bitrusu, ghǝi aka Mambǝl Kartǝ, ka sǝnau ala dar: “Ndzǝr kuhyi yarɛ ndzi ba ndzǝ ngga-ngga yarɛ!

⁹ Ma apǝri ndɛ ada yu tǝ yar asǝna ata kǝra 'ya sǝ nam ɗaku tǝ ndǝ 'ya ala ndǝ ni ngurngudi ni, ba mǝmi tǝ dzǝ tara mbǝtǝdzi,

¹⁰ antǝ gǝri sang kǝ zǝndi, ba sanga ndzǝr Izǝraila kǝ zǝndi, apǝri ndǝ ni ada hyati akwani akǝma gǝri dzǝ 'ya kalang atar dǝnar thlǝma Yɛsu Kǝrsti ndǝr Nazarat, ndǝ nam tǝ gǝri kukwanta ama Hyal hyanti tǝni akwa ntǝnti.

¹¹ Yɛsu dzǝ dza ndǝ nam tǝ Labar Hyal tara nkǝrɛ: “ ‘Paya nam tǝ gǝri ndzǝr tsa kǝi tara ngǝla ni, kǝ siya 'ya nggar payar kuɗǝma.’

¹² Yɛsu ɗiɗi dza ani aka dǝnar mbati! Thlǝmari duku ɗiɗi akwa sanga dunya nam ata mbati kǝlara ndɛ.”

¹³ Sakatǝ dar wula dǝnar Bitrusu aka Yawhana, ba tǝ dar kwamtsǝni apǝri dar ndzǝ nam kura ta 'ya makǝranta, dar ka ndatǝdzi dzǝr dzǝri dar ka ɗǝngati apǝri ndzǝ ni dar ndzai kaka Yɛsu.

¹⁴ Ama dar ta mǝzi ngǝla sǝ nam tǝ ndǝ 'ya ni wɛ. Kadǝbar ndǝ ni tǝ ndǝ mbati ni ada hyati ata ngwama ndzǝr hya ni.

¹⁵ Ani dar nkǝrɛ ala Bitrusu aka Yawhana ka dar lǝba ka ngyar Ndzǝr Hakar Yahudi ni. Ba dar ka 'ya sawari akwa ɓwanga dar,

¹⁶ dar ka yu, “Mǝmi tǝ muri awa 'ya aka ndzǝ ni? Kǝlara ndɛ akwa Ursalima zǝndi ata kǝra sǝr ndati nam tǝ dar 'yati muri adi ata mǝzi ɓwalnta nya wɛ.

¹⁷ Ama ka muri kanti kura sǝ ǝni awa kikilntadzi kǝra akwa ntsa ndzi, ntsakǝr ka mur ɗǝmnya ala ndzǝ ǝni ta dar ta ɓakta labar ala waima akwa thlǝma Yɛsu.”

¹⁸ Antǝ dar ka kǝga tǝ dar kadamwa ka tsanya mabari ala dar apǝri ta dar ta labar wala hyipɛ akwa thlǝma Yɛsu.

¹⁹ Ama Bitrusu aka Yawhana sǝnau ala dar, “Ata ndzai kal-kal akǝma Hyal ka ndǝ kǝlǝngkǝr ala gǝri ta Hyal ya?

²⁰ Akuya yar adi ata ngyar labar ata kǝra sǝ nam tǝ yar wula ba ngati wɛ.”

²¹ Aghǝla tǝ dar dzakti tsanya mabari ala dar kadamwa, dar ka sǝntá tǝ dar. Dar ta zǝndi whal nam tǝ dar awa hakatsǝni tǝ dar wɛ kadǝbar ndzǝ sang ada hǝm Hyal ka sǝ nam tara 'ya.

²² Akuya ndǝ nam tǝ ndǝ tara mbǝti akwa whal sǝr ndati fárni kwatsǝni, fwaɗu thlani aka ya.

'Ya Aduwar Ndzǝ nam tara Mbǝrsa

²³ Sakatǝ ndǝ sǝntá tǝ dar, Bitrusu aka Yawhana ka ɓitasi adzǝ ndzǝ nam aka mbǝrsa ka nkǝrnta ala dar sanga sǝ nam tǝ nggar fǝrist yarni kaka ndzǝ nam ngga-ngga yarɛ tara nkǝrɛ ala dar.

²⁴ Sakatǝ dar ngati ǝni dar ka haɓǝti kuɗaha dar ala Hyal aka ɗǝfu duku. Ka nkǝrɛ, “Thlaku Kuhyir yar, gǝ dza tara mǝrti atahyal aka aghǝli ba manda kaka sanga sǝ nam akwa kuta dar.

²⁵ Gǝ ndǝrɛ atar Mambǝl Kartǝ, aka nya kakár yar Dauda zǝr kǝiyir ngɛ: “ ‘Kami tǝ ɗǝfa ndzǝr ndzǝli yarni sǝwa? Kami tǝ ndzi ada ɗǝmhǝ sǝr dlangkur?

²⁶ Kuhyir dunya yarɛ ɗǝmhǝdzi akuya mpa, ba ndzǝr kuhyi yarɛ tsaɓtsǝnidzi atakǝmaduku, tǝ dar ada ngǝla Thlaku ba ngǝla Ndǝ nam tǝ Ndǝ Pukǝr Mal Alari.’

²⁷ Dzǝr dzǝri Hirudus ba Pauntiyus Pǝlatus tsaɓtsǝnidzi atakǝmaduku kaka ndzǝ kura Yahudi ba ndzǝr Izǝraila akwa Ursalima ka ɗi nya ata kǝra zǝr kǝiyir ngɛ nam tsartsari Yɛsu, ndǝ nam tǝ gǝ pukǝr alari mal dzǝ ani Kǝrsti ni.

²⁸ Dar tsaɓtsǝnidzi ka 'ya kǝlara sǝ nam tǝ gǝ kurta ɗǝmhǝ aka dǝnar gɛ ba bǝrkawakur.

²⁹ Kulini Thlaku, wula hyivǝra nam tǝ dar 'ya, ba ka gǝ la madar kǝiyir ngɛ dǝnar nkǝr labar ngɛ ata babal.

³⁰ Munta tsiya gɛ ka gǝ mbǝti ba ka gǝ 'ya parsu nǝr ndatǝdzi ba sǝr kudǝra yarɛ atar thlǝma zǝr kǝiyir ngɛ nam tǝ gǝ hyanti, Yɛsu.”

³¹ Sakatǝ dar kurai 'ya aduwa, vuiyari kǝgǝdzǝtǝdzi vui nam tǝ dar tsaɓtsǝnidzi ati. Ba dar sang ghǝiyatǝdzi aka Mambǝl Kartǝ, dar nkǝr ndǝrǝr Hyal ata babal.

Ndzǝ nam tara Mbǝrsa ada Ndǝghǝi Kariyir Dar

³² Sanga ndzǝ nam tara mbǝrsa aka ɗǝfu duku ba ɗǝnga duku. Ndɛ adi nam tara nkǝrɛ apǝri kǝlara sǝ nam tǝ dzǝ akǝri kǝ ndzai nǝni wɛ, ama dar ada ndǝghǝi kǝlara sǝ nam tǝ dar kǝri.

³³ Aka dǝna nam ngga tǝ ndzǝr hya yarɛ tara hamnta sakǝida ata kǝra hyatǝr Thlaku Yɛsu, ba Hyal pukǝr barka ala dar.

³⁴ Ndɛ adai akwa ntsa dar nam ada bara su wɛ. Kadǝbar sanga ndzǝ nam tǝ dar aka fwaku ba kǝi, dar ɗǝgǝlnta ka si aka kwapari,

³⁵ ala ndzǝr hya yarɛ, ba dar ada ndǝghǝnta ala kǝlara ndǝ apa tǝ dzǝ ada bara.

³⁶ Yusufu, ndǝr Lawi akwa Kuburus di nam tǝ yimi dlǝti, nam tǝ ndzǝr hya yarɛ ada kǝga tǝ Barnabas (nam ada nkǝrɛ “Zǝr nǝr Dǝnautsǝnidzi”),

³⁷ ndǝ ni ka ɗǝlnta fwakǝrni, ka si aka kwapari ala ndzǝr hya yarɛ.