'Ya Su 25 - Kibaku NT

Bulusu akǝma Fastus

¹ Aghǝla vǝr makǝr aka siyir Fastus akwa diyir Kaisariya, dzǝ tǝra alǝti akwa Ursalima,

² akwanda tǝ nggar fǝrist yarni ba ngganggar ndzǝr Yahudi ka si akǝmari ka tsǝba sǝ nam tǝ dar ada bǝrku Bulusu kari.

³ Kura aka santa saka dar kǝgyǝ Fastus, ka dzǝ 'ya ala dar maiwakur, ka ndǝ pali Bulusu asi akwa Ursalima, akuya dar ada ɗǝmhǝdzi ka mbwɛ akwa whalɛ ka dar tsi tǝni.

⁴ Fastus sǝnau, “Ndǝ ngǝzi Bulusu akwa Kaisariya ba Yi tǝ kǝrna yɛ ata mwari akwandari kulini-kulini.

⁵ Ngyar ka Yi mwari kaka nakuma ndzǝ ngganggar gǝri yarɛ ka dar lǝka tsǝba sǝr bǝrkwɛ ata kǝra ndǝ ni akwanda, ma apǝri dzǝ 'ya sǝ nam kura kal-kal.”

⁶ Aghǝla tǝ dzǝ ndzai vǝr ntsisu wala kumɛ kaka dar dzǝ mwari alǝghǝl akwa Kaisariya. Sǝbar arpɛ dzǝ mwari ka ndzai akwa fǝr haka ba dzǝ hau ka ndǝ si aka Bulusu akǝmari.

⁷ Sakatǝ Bulusu si, ndzǝr Yahudi nam tara hyati akwa Ursalima ka dlǝi tǝni, dar ada si aka sǝr bǝrku yarɛ nam dzau hang ata kǝrari nam kura dar aka sakǝida nam awa mǝzi tsanti dzǝrkurari.

⁸ Antǝ Bulusu mbulba kǝrni tǝ labar: “Yi ta 'ya aibai nam tara ɓǝlnta mabariyir ndzǝr Yahudi wala ata kǝra fǝr Hyal wala ata kǝra Kaisar wɛ.”

⁹ Fastus, ada bara ka 'ya maiwakur ala ndzǝr Yahudi, ba dzǝ ka gha ala Bulusu, “Gɛ ata yiɗɛ ka mwari alǝti akwa Ursalima ka ndǝ tsǝm hakar ngɛ ni akǝmawai akwanda ya?”

¹⁰ Bulusu sǝnau: “Kulini Yi ada hyati akǝma vui hakar Kaisar vui nam ani tǝ ndɛ ata 'ya alai haka akwa. Yi ta sǝwati mima ala ndzǝr Yahudi wɛ, apa tǝ gǝ tǝ kǝrngɛ gǝ zǝndi.

¹¹ Ma Yi 'ya sǝ laka nam tara tsǝbti ka ndǝ tsi tǝra ata nya, Yi adi ata kǝgyɛ ka ndǝ ngyar kura ndɛ awa tsa tǝra wɛ. Ama ma apǝri sǝr bǝrkwɛ nam tǝ ndzǝr Yahudi yarni ada si akǝri ata kǝrawai adi dzǝri wɛ, ndɛ adai aka dǝnar la tǝra ala dar wɛ. Yi bǝrkutsǝni ala Kaisar!”

¹² Aghǝla tǝ Fastus 'ya sawari kaka ndzǝr kǝltsǝni kǝrǝrni, dzǝ gha: “Gǝ bǝrkutsǝni ala Kaisar. Adzǝ Kaisar tǝ gǝ ata mwari!”

Fastus Mwari ka Yu Kuhyi Agǝripa

¹³ Aghǝla vǝr yar laka, kuhyi Agǝripa ba Barnisu si akwa Kaisariya ka thlawar Fastus.

¹⁴ Tǝng tǝ dar ndzai akwanda nǝr vǝr hang, Fastus aka kuhyi ni tsǝ su ata kǝra bǝrkur Bulusu. Dzǝ gha: “Ndǝ laka adai akwani nam tǝ Filikus ngyar akwa fǝrsǝnar Kaisariya.

¹⁵ Sakatǝ Yi mwari akwa Ursalima, nggar fǝrist yarni kaka ngganggar ndzǝr Yahudi si aka bǝrku ata kǝrari ba dar bara kǝi hakatsǝni tǝni.

¹⁶ “Yi ka gha ala dar apǝri adi akwa sǝr kakár ndzǝr Rauma ka ndǝ hakatsǝni kǝlara ndɛ kǝmata tǝ dar awa kǝɓai ntsɛ aka ntsɛ kaka ndzǝr bǝrku tǝni ka dzǝ ɓui whalǝr mbulba kǝrni ata kǝra bǝrkur dar wɛ.

¹⁷ Sakatǝ dar si akwani kaka yɛ, Yi ta vi-vi labar ni wɛ, ama Yi kǝga sǝbar arpɛ ba hau ka ndǝ si aka dza akwa vui haka.

¹⁸ Sakatǝ ndzǝr bǝrku tǝni hyati ka ndǝrɛ, dar ta ngǝti tǝni aka aibaiyir sǝwati su apa tǝ Yi tǝmatsǝni wɛ.

¹⁹ Ata vuiya ǝni, dar aka sǝr ɓwalnya laka kaka dza ata kǝra adiniyir dar ba ata kǝra ndǝ ntǝnti laka tǝ thlǝmari Yɛsu nam tǝ Bulusu ada nkǝrɛ apǝri dzǝ ata mulɛ.

²⁰ Tǝng Yi ta zǝndi whal nam tǝ Yi awa ɓui dzǝrkur ata kǝra sanga sǝni wɛ, Yi yu Bulusu tar dzǝ awa yiɗɛ ka mwari akwa Ursalima ka ndǝ lǝka 'ya alari haka akwanda.

²¹ Sakatǝ Bulusu bara apǝri ka dzǝ ndzai akwa fǝrsǝna har si ma Kaisar thlanta haka. Yi hau apǝri ka dzǝ ndzai tsu akwa fǝrsǝna si ma Yi hyanti tǝni ala Kaisar.”

²² Antǝ Agǝripa gha ala Fastus, “Yi ada bara ka Yi ngati ndǝ ni Yi tǝ kǝrna.” Dzǝ sǝnau, “Arpɛ gǝ ata ngati tǝni.”

Bulusu akǝma Agǝripa

²³ Sǝbar arpɛ Agǝripa aka Barnisu ka si aka dzǝkudzǝr agular dar ka lǝmbwa akwa fǝrǝr nga labar kaka katsalar saudza kumthlani kumɛ ba ngganggar ndzǝr kuta mǝlmɛ. Antǝ Fastus hau ka ndǝ sǝmbwa aka Bulusu.

²⁴ Fastus nkǝrɛ: “Kuhyi Agǝripa, kaka sanga ndzǝ nam adai akwani, gǝri wula ndǝ ni! Sanga ndzǝr Yahudi nam akwa Ursalima ba Kaisariya si adzǝra aka tuwar dar ata kǝrari, apǝri dar ada bara ka ndǝ tsi tǝni.

²⁵ Yi ta ɓui tǝni aka aibai nam tara tsǝbti ka ndǝ tsi tǝni wɛ, ama kadǝbar tǝ dzǝ mwari aka bǝrkwɛ ala Kaisar Yi ɗǝmhǝi tǝ Yi ata hyanti tǝni atǝra akwa Rauma.

²⁶ Ama Yi adi aka sǝ nam tara mǝzi tǝ Yi awa rǝbwai ala Kaisar ata kǝra ndǝ ni wɛ. Kadǝbar ǝni Yi si aka dza akǝma gǝri sang, ba apamá akǝma gǝ Kuhyi Agǝripa, ani ka aghǝla tǝ muri ghyǝngaba su ata kǝra labar ni Yi ata ɓui sǝ nam tǝ Yi ata rǝbwai.

²⁷ Akuya Yi ɗǝnga adi kal-kal ka ndǝ hyanti ndǝr fǝrsǝna ala Kaisar ka kura ndǝ ta rǝbwatsǝni sǝ tǝ ndǝ bǝrku tǝni kari wɛ!”