'Ya Su 14 - Kibaku NT

Bulusu aka Barnabas akwa Ikauniyum

¹ Akwa Ikauniyum Bulusu aka Barnabas mwari apa tǝ dar ada 'ya akwa fǝr vǝkǝr sǝlaiyir ndzǝr Yahudi. Akwanda dar ndǝrɛ aka dǝna nam tǝ ndzǝr Yahudi ba ndzǝ kura Yahudi hang ka mbǝrsa akwa Thlaku ni.

² Ama ndzǝr Yahudi nam tara ngǝla mbǝrsa dar ka tsǝvuti hankala ndzǝ kura Yahudi ba sǝwati ɓwanga dar kaka madar mama.

³ Ama Bulusu aka Barnabas sǝkar hang akwanda, tǝ dar ada nkǝr ndǝrǝr Hyal nam sǝɗa ata babal ata kǝra ɗakur Thlaku. Ba Thlaku tsanti ala ndzi apǝri labar tǝ dar ada hyipɛ ni dzǝri atar dǝna tǝ dzǝ la dar nam tǝ dar ada 'yati parsu nǝr ndatǝdzi aka sǝr kudǝra yarɛ.

⁴ Ama ndzǝr mǝlmari ka ndǝghǝbadzi akwa ɗǝnga ata kǝra dar. Ndzǝ laka mwar tǝbwar palaiyir ndzǝr Yahudi ama ndzǝ laka mwar tǝbwar palaiyir ndzǝr hya yarnda.

⁵ Antǝ laka ndzǝ kura Yahudi ba ndzǝr Yahudi, kaka ndzǝ ngganggar dar, 'ya sawariyir 'ya kulɗakur ala dar ka ɗǝgal tǝ dar aka paya.

⁶ Sakatǝ ndzǝr hya yarɛ tara ngaba, dar whui atǝra lǝkwa diyir Likauniya ka lǝkwa mǝlmǝr Listra ba Darbi ba di nam tara dli tǝ dar.

⁷ Ba akwanda dar nkǝr ndǝrǝr Hyal nam sǝɗa.

Bulusu ba Barnabas akwa Listra ba Darbi

⁸ Tǝ dar akwa Listra, Bulusu aka Barnabas si ata kǝra ndǝ laka tǝ dzǝ ngurngudi. Dzǝ ada ndzai apani tǝng sakatǝ ndǝ yai tǝni, ani dzǝ ta saga mwari wɛ.

⁹ Sakatǝ Bulusu ada 'ya ndǝrǝr Hyal nam sǝɗa dzǝ ada nga. Ba Bulusu ka wul tǝni taku ka wula apǝri dzǝ aka hamnta dzǝri nam ata mǝzi mbǝti tǝni.

¹⁰ Ani Bulusu ka kǝga tǝni aka kuɗahu nam ngga, “Hyati!” Ba ndǝ ndari ka hyati aka thlǝlari ka baditsǝni mwari.

¹¹ Sakatǝ dlamiyir ndzi tara wula sǝ nam tǝ Bulusu tara 'ya, dar ka lǝlɛ akwa nyar Likauniya, “Mǝlǝm yarɛ kǝ sǝgǝl ala muri akwa dludzǝr ndɛ.”

¹² Dar kǝga Barnabas tǝ Ziyaus, ba dar kǝga Bulusu tǝ Harmis kadǝbar dzǝ dza nggar ndǝr labar.

¹³ Fǝr Ziyaus ni, ndǝ lai kudzǝghɛ abǝla nyatǝfur mǝlmɛ. Ani fǝrist nǝr fǝr Ziyaus ni ba dlamiyir ndzi ni ka si aka bǝlan thla yarɛ ba pugǝdlɛ yarɛ ata nyatǝfur mǝlmɛ yarni, ba ka dar ɗǝmhǝi sǝr kǝdlǝrsu yarɛ ala ndzǝr hya yarɛ.

¹⁴ Ama sakatǝ ndzǝr hya yarɛ Barnabas aka Bulusu tara ngati sǝ nam tara 'ya, dar thlǝkwanta kari dar ba dar ka whuiya lǝba akwa ntsa ndzi ada lǝlɛ,

¹⁵ “Pazi yarɛ, kami tǝ gǝri ada 'ya ǝni? yar ma yar ndɛ apa gǝri, yar si ala gǝri aka ndǝrǝr Hyal nam sǝɗa apǝri ka gǝri sǝmwantadzi ta sǝ yarni nam kulɗa-kulɗa ni ba ka gǝri si adzǝ Hyal nam aka mpikɛ, ndǝ nam tara mǝrti atahyal ba dai ba manda ba kǝlara sǝ nam akwa dar.

¹⁶ Akwa zaman watsi, dzǝ ngyar kǝlara ndzǝli ka dar mwari ata whal nam tǝ dar ada bara.

¹⁷ Ama dzǝ ta ngyar kǝrni kura aka sakǝida wɛ: dzǝ tsanti hankal ɗakur ala gǝri atar tǝ dzǝ la gǝri yimi atahyal ba sǝr sǝmɛ akwa sakar dar; dzǝ la gǝri ɗǝvɛ hang ba ghǝiyati ɗǝfa gǝri aka kutsari.”

¹⁸ Ama wala aka labar ǝni yarni, aka bwanai tǝ Bulusu aka Barnabas tara kanti kura dar ta 'ya kǝdlǝrsu ala dar.

¹⁹ Antǝ laka ndzǝr Yahudi tara hyati akwa Antakiya ba Ikauniyum ka zǝɓau dlamiyir ndzǝ ni ka nu tǝ dar. Dar ɗǝgal Bulusu tǝ paya ka ndǝrba tǝni abǝla ta mǝlmɛ, tǝ dar ada ɗǝnga apǝri dzǝ nti.

²⁰ Ama apa tǝ ndzǝr nuwɛ tara tsaɓtsǝnidzi adzǝni, dzǝ hyati ka mwari akwa kuta mǝlmɛ. Sǝbar arpɛ dar aka Barnabas ka tǝra akwa Darbi.

Bulusu aka Barnabas Ɓiti Asi akwa Antakiya nǝr Siriya

²¹ Aghǝla tǝ dar nkǝr ndǝrǝr Hyal nam sǝɗa akwa Darbi ka mǝrti ndzǝr nu hang, Bulusu aka Barnabas ɓiti asi akwa Listra, Ikauniyum, ba Antakiya nǝr Pasidiya.

²² Dar la dǝna ala ndzǝr nuwɛ ba dǝnautsǝni tǝ dar ka dar ndzai akwa dzǝrkur ala hamnta dzǝri. Dar nkǝrɛ, “Kǝ ndzai ntsakǝr muri ata kwatsǝni akwa bwanai hang ka lǝkwa kuhyikur Hyal.”

²³ Bulusu aka Barnabas ka tsarba ala dar ndzǝ ngga-ngga akwa kǝlara ikǝlizǝya, aka aduwa ba asam dar ka pu tǝ dar akur ɓǝlar Thlaku, ndǝ nam tǝ dar tara mbǝrsa aka dza.

²⁴ Antǝ dar ka kwatsǝni akwa Pisidiya ka lǝkwa Pamfiliya.

²⁵ Dar nkǝr ndǝrǝr Hyal nam sǝɗa akwa Pǝrga, antǝ dar ka mwari akwa Ataliya.

²⁶ Ata dǝnta dar ka lǝkwa sar ka ɓiti asi akwa Antakiya nǝr Siriya, vui nam tǝ dar baditsǝni buraburá akwa. Tǝ ndzǝ nam aka mbǝrsa akwanda tara hau tǝ dar akwa ɗakur Hyal ka 'ya kǝthlǝr nam tǝ dar tara kurai ni.

²⁷ Sakatǝ dar si akwa Antakiya, dar ka tsaɓtsǝni ndzǝr ikǝlizǝya atakǝmaduku ka nkǝrɛ ala dar ata kǝra sanga sǝ nam tǝ Hyal 'ya kaka dar ba whal nam tǝ dzǝ mburnta whalɛ ala ndzǝ kura Yahudi ka mbǝrsa akwa Yɛsu.

²⁸ Ba dar ka ndzai hang akwanda kaka ndzǝr nuwɛ.