Yawhana 6 - Kibaku NT

Yɛsu Ghǝiyati Ndzǝ Kumthlani Kumɛ ka Ntufu

¹ Aghǝla apani Yɛsu fǝlba pǝɗǝm ata Mandar Galili (dzǝ ani Mandar Tibariya).

² Dlamiyir ndzi ka nu tǝni, kadǝbar dar wula parsu nǝr ndatǝdzi yarɛ nam tǝ dzǝ ada 'ya ala ndzǝ nam kura kalang yarɛ.

³ Antǝ Yɛsu ka fǝlti ngwama paya dar ka ndzai akwanda kaka ndzǝr nuwurni vwam.

⁴ Wudzǝr Ngǝmba, dzǝ ani satakar ndzǝr Yahudi kǝ si kudzǝghɛ.

⁵ Tǝ Yɛsu tara haɓǝti kǝrari ka wula dlamiyir ndzi angwada si ata kǝrari, dzǝ ka nkǝrɛ ala Filibusu, “Ama tǝ muri awa ɓui sǝr sǝmɛ ka ɗǝlba nam tǝ ndzǝ ni awa sǝmɛ?”

⁶ Dzǝ yu ǝni a akuya ka dzǝ nkǝrti tǝni, kadǝbar dzǝ tǝ kǝrni dzǝ zǝndi sǝ nam tǝ dzǝ ata 'ya.

⁷ Filibusu sǝnau ka nkǝrɛ, “Ai wala kwapar kǝthlǝr ndɛ nǝr hya ntsisu ma adi ata ɗǝlba sǝr sǝmɛ nam ata mǝzi tǝ sanga ndzi yarni ata ɓui nkyǝnkyiɗu wɛ!”

⁸ Antǝ ndǝ damwa akwa ntsa ndzǝr nuwurni Andǝrawusu, zǝr angǝra Simaun Bitrusu, ka nkǝrɛ alari,

⁹ “Nda zǝr waza laka akwani aka takwara ɗǝvɛ ntǝfu, ba kulfa sǝɗɛ. Ama mi tǝ sǝ yarni ata mǝrti ala hangkur ndzǝ apani?”

¹⁰ Yɛsu nkǝrɛ, “Ghamɛ ala ndzi ka dar ndzai.” Vui ndari aka kusar hang, ba ndzi sǝli ka ndzǝndzai, dar ata 'ya kumthlani kumɛ ka ntufu.

¹¹ Yɛsu ka kǝtǝ takwara ɗǝvɛ, aghǝla tǝ dzǝ usar Hyal, dzǝ ka ndǝghǝi ala ndzǝ nam ada ndzai yar ndari hang apa tǝ dar ada bara. Dzǝ 'yati tsu ahani aka kulfa ni.

¹² Aghǝla tǝ dar sǝm ka ghǝi, dzǝ ka gha ala ndzǝr nuwurni, “Tsaɓtsǝni mɛ ɓutǝr-ɓutǝr ɗǝvɛ yarɛ nam tara mbi, ta su ta gyalntadzi.”

¹³ Ani dar ka tsaɓtsǝni mbiya ɓutǝr-ɓutǝr ɗǝvɛ ntǝfu ni aghǝla tǝ dar sǝmɛ, ka ghǝiyati wulna kumɛ kapu sǝɗɛ.

¹⁴ Tǝ ndzi wula parsu nǝr ndatǝdzi nam tǝ Yɛsu 'ya ni, dar ka nkǝrɛ, “Pakat ǝni ani nabi nam ata si akwa dunya ni!”

¹⁵ Yɛsu, dzǝ zǝndi apǝri dar ada bara sǝngwa kǝtǝ tǝni tǝ dǝna ka dar mǝrti tǝni kuhyi, dzǝ ka ɓakta ɓiti atǝra lǝti akwa paya dzǝ duku.

Yɛsu Mwari ata Kǝra Yimi

¹⁶ Sakatǝ tǝhaku tara 'ya, ndzǝr nuwurni tǝra sǝgǝl adzǝ manda ndari.

¹⁷ Dar ka lǝkwa sar tǝ dar baditsǝni fǝlba manda ni ka mwari akwa Kafarnahum. Akwa saka ni antǝ kuthlɛ ka 'ya, Yɛsu tsuwɛ dzǝ ta si adzǝ dar kwataku wɛ.

¹⁸ Antǝ yimǝr manda ndari ka baditsǝni 'ya dlangkur, kadǝbar sambar nam aka dǝna ada padɛ.

¹⁹ Aghǝla tǝ dar ndal ka mwari apa miyal makǝr wala fwaɗu, dar ka wulɛ Yɛsu ada mwari ata kǝra yimi, ada si kudzǝghɛ adzǝ sar ndari. Dar ka ɗǝmnti hyivǝr.

²⁰ Ama dzǝ ka nkǝrɛ ala dar, “Yɛ, ta gǝr ta hyivǝr.”

²¹ Dar ada bara ka dar dlu tǝni alǝkwa sar ndari, kura aka santa saka ani nda sar kǝ si adzǝ nya gar nam tǝ dar ada bara si adzɛ.

²² Sǝbar arpɛ, laka ndzǝ nam tara mbi abǝla ata hǝiya manda ndari, dar ka kwamtsǝni apǝri sar duku ani adai akwanda, Yɛsu ta lǝkwa kaka ndzǝr nuwurni wɛ, ndzǝr nuwurni ɗiɗi ani tara mwara tǝra.

²³ Antǝ laka sar yarɛ tara hyati akwa Tibariya si kudzǝghɛ adzǝ vui nam tǝ dlamiyir ndzi tara sǝm mantsǝkǝl nda, aghǝla tǝ Thlaku tara usar Hyal.

²⁴ Sakatǝ tsaɓtsǝnidzǝr ndzi tara wuti apǝri Yɛsu kaka ndzǝr nuwurni adi akwanda wɛ, dar ma dar ka lǝkwa sar yarɛ tǝ dar mwara akwa Kafarnahum lǝka bara Yɛsu.

Yɛsu Mantsǝkǝlǝr Mpikɛ

²⁵ Sakatǝ ndzǝ yarni ɓui Yɛsu abǝla ata hǝiya manda, dar ka nkǝrɛ alari, “Malǝm, nama tǝ gǝ si akwani?”

²⁶ Yɛsu sǝnau, “Yi ada gha ala gǝri dzǝri, gǝri ada bara tǝra adi kadǝbar parsu nǝr ndatǝdzi yarɛ ni wɛ ama kadǝbar ka gǝr sǝm mantsǝkǝl ka ghǝi.

²⁷ Ta gǝr ta kǝthlǝr ka ɗǝvɛ nam ada sǝwatǝdzi, ama ka ɗǝvɛ nam kura ada sǝwa, nam ada la ndɛ mpikǝ nam kura kurkuri. Tǝ Zǝr Ndɛ ata la gǝri. Akuya Hyal Tada kǝ vǝti ntarni nǝr lar whalɛ.”

²⁸ Antǝ dar ka yu tǝni, “Sǝr mi tǝ yar awa 'ya, ka yar mǝrti sǝ nam tǝ Hyal ada bara?”

²⁹ Yɛsu sǝnau, “Kǝthlǝr Hyal ani ǝni, apǝri ka gǝri mbǝrsa aka ndǝ nam tǝ dzǝ hyanti.”

³⁰ Ani dar ka yu tǝni, “Parsu nǝr ndatǝdzi madi dzá tǝ gǝ awa 'ya nam tǝ yar awa wula ka yar mbǝrsa aka gɛ? Sǝr mi tǝ gǝ ata 'ya?

³¹ Kakár yar dar sǝmɛ manna akwa ntakǝr i'ya; apa tǝ dzǝ rǝbwa-rǝbwa, ‘Dzǝ la dar mantsǝkǝl atahyal ka sǝmɛ.’”

³² Yɛsu nkǝrɛ ala dar, “Dzǝri, Yi ada gha ala gǝri, adi Musa ani tara la gǝr mantsǝkǝl ǝni atahyal ni wɛ, ama Babarna ani ada la gǝr mantsǝkǝl nam dzǝri atahyal.

³³ Akuya mantsǝkǝlǝr Hyal dzǝ ani nam tara hyati atahyal, dzǝ ani ada la mpikɛ ala dunya.”

³⁴ Dar ka nkǝrɛ alari, “Thlaku, la yar dzǝli mantsǝkǝl ǝni tatang vǝri!”

³⁵ Yɛsu nkǝrɛ ala dar, “Yi dza mantsǝkǝl nam ada hamnta mpikɛ. Ndǝ nam tara si adzǝra dzǝ adi ata saga nga mi kǝra wɛ, ba ndǝ nam ada mbǝrsa aka yɛ, dzǝ tsu awa saga nga thlǝlai kǝra wɛ.

³⁶ Ama apa tǝ Yi gha ala gǝri, gǝr wula tǝra ama gǝr ta mbǝrsa aka Yi wɛ.

³⁷ Kǝlara ndǝ nam tǝ Tada tara lai, dar ata si adzǝra, ndǝ nam tara si adzǝra Yi adi ata saga kǝdlǝnta tǝni wala nkyiɗu laka wɛ.

³⁸ Akuya Yi kǝ sǝgǝl atahyal, adi ka Yi 'ya sǝ nam tǝ Yi ada bara wɛ, ama ka 'ya sǝ tǝ ndǝ nam tara hya tǝra ada bara.

³⁹ Ba ǝnǝni ani sǝ nam tǝ ndǝ nam tara hya tǝra ada bara, ani ta Yi ta sǝntá wala duku akwa ntsa ndzǝ nam tǝ dzǝ tara lai, ama ka Yi hyanti tǝ dar ata vǝr dǝnta.

⁴⁰ Akuya sǝ nam tǝ Bana ada bara, ani kǝlara ndǝ nam ada bara mbanar Zǝrari, tǝ dzǝ mbǝrsa aka dza, dzǝ ata ɓui mpikǝ nam kura kurkuri, Yi ata hyanti tǝni akwa vǝr dǝnta.”

⁴¹ Kadǝbar ǝni ndzǝr Yahudi baditsǝni whuwhuni ata kǝrari, kadǝbar dzǝ nkǝrɛ, “Yi ani mantsǝkǝl nam tara hyati atahyal.”

⁴² Dar ka nkǝrɛ, “Əni adi Yɛsu zǝr Yusufu ni wɛ, nam tǝ angǝri aka atǝgǝri sang mur zǝndi tǝ dar? Mǝmi kulini tǝ dzǝ awa nkǝrɛ apǝri dzǝ sǝgǝl atahyal?”

⁴³ Yɛsu sǝnau ala dar, “Ta gǝr ta 'ya whuwhuni ala kǝma gǝri.

⁴⁴ Ndǝ nam ata mǝzi si adzǝra adi wɛ, tar ma Tada nam tara hyanti tǝra ani tara ndǝrti tǝni, Yi ata hyanti tǝni akwa vǝr dǝnta.”

⁴⁵ Dzǝ rǝbwa-rǝbwa akwa kakadǝr nabi, “Sanga dar Hyal ani ata tsǝli ala dar.” Kǝlara ndǝ nam tara ngati, ba dzǝ ka tsǝli adzǝ Tada, dzǝ ata si adzǝra.

⁴⁶ Ndǝ tara saga wula Tada ni adi wɛ, ɗiɗi ndǝ nam tara hyati adzǝ Hyal; ɗiɗi dza ani tara wula Tada ni.

⁴⁷ Dzǝri Yi ada nkǝrɛ ala gǝri, ndǝ nam ada mbǝrsa, dzǝ aka mpikǝ nam kura kurkuri.

⁴⁸ Yi ani mantsǝkǝl nam ada hamnta mpikɛ.

⁴⁹ Kakár-kakár gǝri yarɛ sǝmɛ manna akwa ntakǝr i'ya, ama tsuwɛ dar nti.

⁵⁰ Nda mantsǝkǝl nam ada sǝghǝl atahyal, nam tǝ kǝlara ndǝ nam tara sǝmɛ dzǝ adi ata nti wɛ.

⁵¹ “Yi ani mantsǝkǝlǝr mpikǝ nam tara sǝgǝl atahyal. Kǝlara ndǝ nam tara sǝm mantsǝkǝl ǝni dzǝ ata ndzai aka mpikɛ kura kurkuri. Mantsǝkǝl nam tǝ Yi ata hamnta ka dunya ɓui mpikɛ ani kumǝr dzawai.”

⁵² Antǝ ndzǝr Yahudi ka hyanti ɓwalnya akwa ɓwanga dar, tǝ dar ada nkǝrɛ, “Mǝmi tǝ ndǝ ni awa mǝzi la muri kumǝr dzari ka muri ɗɛ?”

⁵³ Yɛsu nkǝrɛ ala dar, “Dzǝri Yi ada gha ala gǝri, ma gǝri ta ɗǝ kumǝr dza Zǝr Ndɛ wɛ, ka gǝri ɓǝla sa masǝrni wɛ, mpikɛ adi akwa gǝr wɛ.

⁵⁴ Kǝlara ndǝ nam ada ɗǝ kumǝr dzawai, tǝ dzǝ ada ɓǝla sa masǝrna, dzǝ aka mpikǝ nam kura kurkuri, ba Yi ata hyanti tǝni akwa vǝr dǝnta.

⁵⁵ Akuya kumǝr dzawai dzǝ sǝr sǝmɛ nam dzǝr dzǝri, masǝrna tsuwɛ dzǝ sǝr sa nam dzǝr dzǝri.

⁵⁶ Kǝlara ndzǝ nam ada ɗǝ kumǝr dzawai, tǝ dzǝ ada sa masǝrna dzǝ ada ndzai akwa yɛ, Yi tsuwɛ Yi ada ndzai akwa dza.

⁵⁷ Apa tǝ Tada nam aka mpikɛ tara hyanti tǝra ba Yi ada ndzai kadǝbar ka Tada ni, ani apani tsuwɛ ndǝ nam tǝ Yi ani sǝr sǝmǝr ni, dzǝ ata ndzai kadǝbarna.

⁵⁸ Əni ani mantsǝkǝl nam tara hyati atahyal. Kakár-kakár gǝri yarɛ sǝm manna, ka kurntadzi, ama kǝlara ndǝ nam tara sǝm mantsǝkǝl ni dzǝ ata ɓui mpikǝ nam kura kurkuri.”

⁵⁹ Dzǝ nkǝrɛ sǝ yarni sakatǝ dzǝ ada tsǝlɛ akwa fǝr vǝkǝr sǝlai ala Hyal akwa Kafarnahum.

Ndzǝr Nuwur Yɛsu Hang Ngǝla Tǝni

⁶⁰ Tǝ dar ngati ahani, hang akwa ntsa ndzǝr nuwurni ka nkǝrɛ apǝri, “Ndǝr ǝni nam dzau, wa ani awa mǝzi ka dlutsi hyipǝ ni?”

⁶¹ Yɛsu zǝndi akwa ɗǝfari apǝri ndzǝr nuwurni ada whuwhuni ata kǝra sǝ ǝni. Antǝ dzǝ ka nkǝrɛ ala dar, “Əni ani sǝ nam tara ndzai ala gǝri sǝr mbuthlǝlɛ ya?

⁶² Mǝmi dzá, ma apǝri gǝr wula Zǝr Ndɛ ada lǝti ati akwa vui nam tǝ dzǝ akwa awatsi?

⁶³ Mambǝlǝr Hyal dzǝ ada hamnta mpikɛ. Dǝnar ndɛ adi ada 'ya paidar mima wɛ. Labar nam tǝ Yi tara gha ala gǝri dzǝ ada si aka Mambǝlǝr Hyal nam ada hamnta mpikɛ.

⁶⁴ Ama dza diya ndzǝ laka gǝri adai nam kura ta mbǝrsa.” Kadǝbar tsu akwa baditsǝniyari Yɛsu zǝndi ndzǝ nam kura ta mbǝrsa, ba tsuwɛ ndǝ nam ata ɓǝlai tǝni.

⁶⁵ Antǝ dzǝ ka dzakti nkǝrɛ, “Ani sǝ nam tara 'ya tǝ Yi tara gha ala gǝri, ndǝr mǝzi si adzǝra adi wɛ, tar ma Tada yiɗɛ alari.”

⁶⁶ Baditsǝni ata saka ǝni hang akwa ntsa ndzǝr nuwurni tara sǝgǝl tǝ hǝi, dar ta ɓǝla nu tǝni wɛ.

⁶⁷ Ani Yɛsu nkǝrɛ ala ndzǝr nuwurni kum kapu sǝɗǝ ni, “Gǝr yɛ gǝri ada bara ka gǝri tǝra ya, kǝna ma?”

⁶⁸ Simaun Bitrusu ka sǝnau alari, “Thlaku, adzǝ wa tǝ yar ata mwari? Gǝ ani aka labar mpikǝ nam kura kurkuri.

⁶⁹ Yar mbǝrsa ba zǝndi apǝri gǝ dza Ndǝ Kartǝ nǝr Hyal.”

⁷⁰ Antǝ Yɛsu sǝnau ala dar, “Adi Yi dza tsarba tǝ gǝri kum kapu sǝɗɛ ni wɛ? Ama Satan ada kǝthlǝr aka pathlu akwa ntsa gǝri.”

⁷¹ (Sakatǝ dzǝ gha labar ni dzǝ ada kwamtsǝni ata kǝra Yahuda zǝr Simaun Iskaryauti, kadǝbar dzǝ ani ata ɓǝlai tǝni, wala apani ma dzǝ pathlu akwa ntsa kum kapu sǝɗǝ ni.)