Yawhana 3 - Kibaku NT

Yɛsu Hyipɛ ala Nikadimus

¹ Kulini ndǝr Farisi laka adai, nam tǝ thlǝmari Nikadimus, dzǝ pathlu akwa ntsa ndzǝr ndǝrkǝmar ndzǝr Yahudi.

² Dzǝ ka si adzǝ Yɛsu avǝrvǝri, dzǝ ka nkǝrɛ alari, “Malǝm, yar zǝndi apǝri gǝ ndǝr hyipɛ nam tara hyati adzǝ Hyal, kadǝbar ndǝr 'yati dzǝli parsu nǝr ndatǝdzi yarni adi wɛ nam tǝ gǝ ada 'yati, tar ma Hyal vwam kaka dza.”

³ Yɛsu sǝnau ka nkǝrɛ, “Kurtaka ndzai dzǝri, Yi ada nkǝrɛ ala gɛ, ndǝ adi ata mǝzi lǝkwa kuhyikur Hyal wɛ tar ma ndǝ ɓakta yai tǝni.”

⁴ Nikadimus yuwɛ, “Mǝmi tǝ ndɛ awa yai ndǝ tara kurta hali kadamwa? Ka dzǝ lǝkwa kuta angǝri ka ndǝ ɓakta yai tǝni ya?”

⁵ Yɛsu sǝnau, “Dzǝr dzǝri Yi ada nkǝrɛ ala gɛ, ndǝ adi ata mǝzi lǝkwa kuhyikur Hyal wɛ, tar ndǝ yaba tǝni atar yimi ba atar Mambǝl Kartǝ.

⁶ Kumǝr dzɛ yai kumǝr dzɛ, Mambǝl yai mambǝlɛ.

⁷ Ta dzǝ ta 'ya ala gǝ sǝr ndati mai kadǝbar tǝ Yi nkǝrɛ ala gǝ apǝri tar ma ndǝ ɓakta yai tǝngɛ.

⁸ Sambar ada padɛ ata palai nam tǝ dzǝ yiɗɛ. Gǝ ada ngati padǝr ni ama gǝ ta zǝndi palai nam tǝ dzǝ hyati akwa wala tǝ dzǝ ata mwari akwa wɛ. Ani ahani dza kǝlara ndǝ nam tǝ Mambǝl ni ani tara yai tǝni.”

⁹ Antǝ Nikadimus nkǝrɛ alari, “Mǝmi tǝ sǝni awa 'ya?”

¹⁰ Yɛsu sǝnau alari, “Gǝ malǝmǝr Izǝraila gǝ ta zǝndǝba sǝ yarni wɛ?

¹¹ Dzǝr dzǝri Yi ada nkǝrɛ ala gɛ, sǝ nam tǝ yar zǝndi ani tǝ yar ada gha, sǝ nam tǝ yar kurta wula ani tǝ yar ada ndzai sakǝidari, ama gǝr ngǝla mbǝrsa aka sakǝidar yar.

¹² Yi ndǝrɛ ala gǝri ata kǝra sǝr dunya, ama gǝri ta mbǝrsa akǝr wɛ, mǝmi dzá tǝ gǝri awa mbǝrsa ma apǝri Yi ndǝrǝr sǝ nam atahyal?

¹³ Ndǝ nam tara saga lǝti atahyal adi wɛ, ɗiɗi dzǝ nam tara si atahyal dzǝ nam Zǝr Ndɛ.

¹⁴ Apa tǝ Musa tara haɓǝti pwapu akwa ntaku, ani ahani tsuwɛ kǝ ndzai ntsakǝr ndǝ ata haɓǝti Zǝr Ndɛ,

¹⁵ kadǝbar kǝlara ndǝ nam tara mbǝrsa aka dza, dzǝ ata ɓui mpikǝ nam kura kurkuri.

¹⁶ “Kadǝbar Hyal yiɗǝ ndzǝr dunya wur-wur, dzǝ ka hamnta zǝrǝrni duku ɗiɗi, kadǝbar kǝlara ndǝ nam tara mbǝrsa aka dza dzǝ adi ata santadzi wɛ, ama dzǝ ata ɓui mpikǝ nam kura kurkuri.

¹⁷ Kadǝbar Hyal ta hyanti Zǝrǝrni akwa dunya akuya ka dzǝ hakatsǝni ndǝ wɛ, ama ka ndǝ ɓui mbatǝdzi atarni.

¹⁸ Kǝlara ndǝ nam tara mbǝrsa aka dza ndǝ adi ata 'ya alari haka wɛ, ama kǝlara ndǝ nam kura ta mbǝrsa tsuwɛ ndǝ kurtaka hakatsǝni tǝni, kadǝbar dzǝ ta mbǝrsa akwa thlǝma Zǝr Hyal nam duku ni wɛ.

¹⁹ Haka ni tsuwɛ dzǝ ani: Paraku tara lǝkwa dunya, ama ndzǝ yiɗǝ kuthlɛ ta dzǝ nam parakari, kadǝbar sǝr 'yar dar ani kǝmangarkur.

²⁰ Akuya kǝlara ndǝ nam ada 'ya kǝmangarkur, dzǝ ngǝla paraku ni, dzǝ adi ada mwari adzǝ paraku ni wɛ, kadǝbar paraku ata tsanti kǝthlǝrǝrni ata babal.

²¹ Ama ndǝ nam ada 'ya dzǝrkur tsuwɛ dzǝ ada si adzǝ paraku ni, ka ndzǝ wula apǝri dar ada 'ya sǝ nam tǝ Hyal ada bara.”

Yawhana Ndǝr 'Ya Bamtizǝma Ndǝrɛ ata Kǝra Yɛsu

²² Aghǝla ǝni, Yɛsu kaka ndzǝr nuwurni tǝra akwa kuri-kuri diyir Yahudiya, vui nam tǝ dzǝ ɗar sǝkar kaka dar, tǝ dza ada 'ya bamtizǝma.

²³ Yawhana tsuwɛ dzǝ ada 'ya bamtizǝma akwa Ainun kudzǝghɛ adzǝ Salim, kadǝbar yimi adai hang akwanda, ndzi ada si hang tǝ ndǝ ada 'ya ala dar bamtizǝma.

²⁴ (Akwa saka ǝndari ndǝ ta hau Yawhana akwa fǝrsǝna kwataku wɛ.)

²⁵ Ɓwalnya hyati akwa ɓwanga laka ndzǝr nuwur Yawhana aka ndǝr Yahudi laka ata kǝra wudzǝr kǝtsǝkǝtsikur dar.

²⁶ Dar ka ɓakta si adzǝ Yawhana, ka nkǝrɛ alari, “Malǝm, ndǝ nam tǝ gǝri vwam abǝla ata hǝiya kyaghar Urdun nda, ndǝ nam tǝ gǝ tǝ kǝrngɛ ma gǝ sakǝidatsǝni tǝni, wulɛ, dzǝ ada 'ya bamtizǝma ani sanga ndzi ada mwari adzǝni.”

²⁷ Antǝ Yawhana ka sǝnau ka nkǝrɛ, “Ndǝr mǝzi ɓui su adi wɛ, tar ma apǝri ndǝ lari atahyal.

²⁸ Gǝr tǝ kǝr gǝri ma gǝr sakǝidarna, ata kǝra tǝ Yi tara nkǝrɛ apǝri, ‘Adi Yi dza Kǝrsti ni wɛ, ama, ndǝ hyanti tǝra ka Yi si kǝmata dza.’

²⁹ Ndǝ nam aka kǝdǝwa ani sala kǝdǝwa. Pazǝr sala kǝdǝwa dzǝ ada sǝkɛ, tǝ dzǝ ada si thlǝmɛ alari, ɗǝfari 'ya sǝɗa dzǝr dzǝri sakatǝ dzǝ ngati kuɗaha sala kǝdǝwa ni. Kutsariyir pazǝr sala kǝdǝwa ni kǝ 'ya nana, ba kulini kǝ ghǝiyabadzi.

³⁰ Kǝ ndzai ntsakǝr ka dzǝ dza lǝkǝma aka 'ya nggakur Yi tsuwɛ Yi ata kǝntadzi.”

³¹ “Ndǝ nam tara hyati ati, dzǝ dza ngga ata kǝra sanga ndzi. Ndǝ nam tǝ dzǝ nǝr dai tsuwɛ, dzǝ nǝr dai, dzǝ ada ndǝrɛ ata kǝra su nǝr dai. Ndǝ nam tara hyati atahyal dzǝ dza ngga ta sanga ndzi.

³² Sǝ nam tǝ dzǝ wula ba tǝ dzǝ ngati ani tǝ dzǝ ada ndzai sakǝidari, ama ndǝ nam ada dlu sakǝidarni adi wɛ.

³³ Ndǝ nam tara dlu sakǝidarni, dzǝ tsanti apǝri labar tǝ Hyal gha ani nam dzǝri.

³⁴ Kadǝbar ndǝ nam tǝ Hyal tara hyanti dzǝ ada nkǝrɛ sǝ nam tǝ Hyal tara gha, akuya ka dzǝ ada hamnta Mambǝl ni kura kurkuri.

³⁵ Tada dzǝ yiɗǝ Zǝrari, dzǝ hamnta sanga su akwa tsiyari.

³⁶ Kǝlara ndǝ nam tara mbǝrsa aka Zǝr ni dzǝ aka mpikǝ nam kura kurkuri. Ama ndǝ nam tara ngǝla Zǝrǝrni, dzǝ adi ata wula mpikɛ wɛ. Ama sǝwakur ɗǝfa Hyal ata ndzai ata kǝrari.”