Yawhana 20 - Kibaku NT

Hyatǝr Yɛsu Akwa Ntǝnti

¹ Kula-kula mbǝk vǝr nam tang akwa magu tsu ɗar zǝgut-zǝgut, Maryamu Magǝdaliya mwar ata kǝr kul ni, dzǝ ka wula ndǝ mbǝyanta paya nam ata nya kul ni.

² Ani dzǝ ka whuiya lǝngui adzǝ Simaun Bitrusu, ba ndǝr nuwurni nam tǝ Yɛsu ada yiɗɛ, dzǝ ka nkǝrɛ ala dar, “Ndǝ kǝlba Thlaku akwa kul ndari, yar ta zǝndi vui nam tǝ dar vu tǝni akwa wɛ!”

³ Antǝ Bitrusu aka ndǝr nuwurni damwa dar baditsǝni mwari ata kǝr kulari.

⁴ Dar gyapu ada whui, ama ndǝr nuwurni damwa ni ka whui atǝra angyar Bitrusu, ka si adzǝ nya kulari kǝma.

⁵ Dzǝ ngai kǝrni ba dzǝ ka wula baktar lilǝng yarɛ ǝnda ada pui, ama dza dzǝ ta lǝkwa wɛ.

⁶ Simaun Bitrusu, nam aghǝlari, dzǝ si ka lǝkwa kuta kul ni. Dzǝ ka wula baktar lilǝng ni ada pui,

⁷ ba dzǝ wula zǝr bakta nam tǝ ndǝ tara bar kǝra Yɛsu akǝri. Bakta ni patǝdzi tǝ kǝrni ada vi tǝ ngwam.

⁸ Antǝ ndǝr nu nam tara si ata nya kulari kǝma nda dzǝ yɛ dzǝ ka lǝkwa. Dzǝ ka wula, dzǝ ka mbǝrsa.

⁹ Akuya har saka ǝnda dar tsu ta ngaba Labar Hyal nam tara nkǝrɛ kǝ ndzai ntsakǝr Yɛsu ata hyati akwa ntǝnti wɛ.

Yɛsu Tsantǝdzi ala Maryamu Magǝdaliya

¹⁰ Antǝ ndzǝr nuwurni ka ɓita lǝhǝi.

¹¹ Ama Maryamu ada hyati abǝla ata nya kulari tǝ dzǝ ada tuwa. Dzǝ tsu awa akwa tuwa, dzǝ ka ngai kǝrni tǝ dzǝ ada wul kuta kulari,

¹² ba dzǝ ka wula ndzǝr hyantǝr Hyal sǝɗɛ aka kari mwapu. Ada ndzai ata vui nam tǝ ndǝ vi saiyir Yɛsu, pathlu tǝbwar kǝr ba pathlu tǝbwar thlǝlɛ.

¹³ Dar ka yu tǝni, “Mwala, kami tǝ gǝ ada tuwa?” Dzǝ ka nkǝrɛ, “Dar kǝtǝ Thlakǝrna atǝra ba Yi ta zǝndi vui nam tǝ dar vi tǝni akwa wɛ.”

¹⁴ Antǝ dzǝ ka mbalar kǝmari ma dzǝ ata wulɛ Yɛsu ada hyati, ama dzǝ ta zǝndi apǝri Yɛsu wɛ.

¹⁵ Dzǝ yu tǝni, “Mwala, kami tǝ gǝ ada tuwa? Wa tǝ gǝ ada bara?” Dza ada ɗǝnga apǝri dzǝ ndǝr wul fu yarɛ nda, ani dzǝ ka nkǝrɛ alari, “Thlaku, ma apǝri gǝ dzǝ kǝtǝ tǝni atǝra, gha alai vui tǝ gǝ vi tǝni akwa, ka Yi lǝka kǝtǝ tǝni.”

¹⁶ Yɛsu nkǝrɛ alari, “Maryamu!” Dzǝ ka mbalti kǝmari tǝbwar ni ka nkǝrɛ akwa nyar Yahudi, “Rabwani!” (nam ada nkǝrɛ Malǝm).

¹⁷ Yɛsu nkǝrɛ, “Ta gǝ ta ngǝzǝ tǝra mai, akuya har ba kulini Yi ta tǝra alǝti adzǝ Tada kwataku wɛ. Ama mwari adzǝ madar mana, ka gǝ nkǝrɛ ala dar apǝri, ‘Yi ata tǝra adzǝ Babarna ba Babar gǝri, adzǝ Hyalǝrna ba Hyalǝr gǝri.’ ”

¹⁸ Ani Maryamu Magǝdaliya mwari ka gha ala ndzǝr nuwurni apǝri, yǝ wula Thlaku ba dzǝ ka tsǝba ala dar sǝ nam tǝ dzǝ gha alari.

Yɛsu Tsantǝdzi ala Ndzǝr Nuwurni

¹⁹ Akwa vǝr ndari apa kǝmar tǝhaku, vǝr nam tang akwa magu, ndzǝr nuwurni atakǝmaduku, dar ka harti nyavǝr fǝr nam tǝ dar akwa, akuya ka hyivǝr ndzǝr Yahudi. Yɛsu si ka hyati akwa ntsa dar, dzǝ ka gha ala dar, “Lapiyakur ala gǝri!”

²⁰ Aghǝla tǝ dzǝ gha apani, Dzǝ tsanti ala dar tsiyari ba ghyimbiyari. Ndzǝr nuwurni ka 'ya kutsari kadǝbar tǝ dar wula Thlaku.

²¹ Yɛsu nkǝrɛ ala dar kadamwa, “Lapiyakur ala gǝri! Apa tǝ Tada tara hyanti tǝra, ani apani Yi ma tǝ Yi hya tǝ gǝri.”

²² Antǝ Dzǝ ka pu mpihǝrni ata kǝra dar, dzǝ ka gha, “Dlutsamɛ Mambǝl Kartǝ.

²³ Kǝlara ndzǝ nam tǝ gǝr kyifǝnta alari bikǝrni, bikǝrni kyifǝntadzi; ma gǝri ta kyifǝnta ala dar wɛ, ndǝ adi ata kyifǝnta ala dar wɛ.”

Yɛsu Tsantǝdzi ala Tauma

²⁴ Yau, Tauma (tǝ ndǝ ada ka tǝni tǝ Ɓwalɛ), pathlu akwa ntsa kum kapu sǝɗɛ, dzǝ adi kaka ndzǝr nuwɛ saka nam tǝ Yɛsu si wɛ.

²⁵ Ani laka ndzǝr nuwɛ yarɛ ni ka nkǝrɛ alari, “Yar wula Thlaku!” Ama Tauma nkǝrɛ ala dar, “Ma Yi ta wula kawur kusa ata tsiyari, ka Yi hau gulanda wai akwa kawur kusa ndari, ba ka Yi hau tsiyawai akwa ghyimbiyari wɛ, Yi adi ata mbǝrsa wɛ.”

²⁶ Aghǝla vǝr ntsisu, ndzǝr nuwurni akwa kǝi ndari kadamwa, Tauma vwam kaka dar. Kwahani tǝ nyavǝr yarari dǝgǝldǝgǝli, Yɛsu si ka hyati akwa ntsa dar, dzǝ ka nkǝrɛ, “Lapiyakur ala gǝri!”

²⁷ Antǝ dzǝ nkǝrɛ ala Tauma, “Hau gulanda gɛ akwani, ka gǝ wula tsiyawai yarɛ. Ha tsiya gɛ ka gǝ vu akwa ghyimbiyawai. Ta gǝ ta ndzai ndǝ nam kura aka mbǝrsa, ka gǝ ndzai ndǝ nam aka mbǝrsa.”

²⁸ Tauma ka sǝnau alari, “Thlakǝrna, ba Hyalǝrna!”

²⁹ Yɛsu nkǝrɛ alari, “Kadǝbar tǝ gǝ wula tǝra, ani gǝ ka mbǝrsa; barka ala ndzǝ nam kura ta wula ama dar mbǝrsa.”

³⁰ Yɛsu 'ya parsu nǝr ndatǝdzi yar laka pam-pam hang, akǝma ndzǝr nuwurni, nam kura ndǝ ta rǝbwai akwa kakadu ni.

³¹ Ama ndǝ rǝbwai ǝni yarni ani ka gǝri mbǝrsa apǝri Yɛsu dzǝ ani Kǝrsti, Zǝr Hyal, ba kadǝbar tǝ gǝr mbǝrsa, gǝri ata ɓui mpikɛ akwa thlǝmari.