Yawhana 15 - Kibaku NT

Yɛsu ani Fur Inabi Nam Dzǝri

¹ “Yi ani fur inabi nam dzǝri, ba Babarna ani ndǝr tsǝwhari.

² Kǝlara tsizu ata dzawai nam kura ada ya munya, dzǝ ata dlǝnta tǝni. Kǝlara tsizu nam ada ya madar tsuwɛ, dzǝ ata dzǝguti tǝni, ani ka dzǝ dzakti ya.

³ Wala kulini ma gǝr kǝtsǝkǝtsi kadǝbar labar nam tǝ Yi nkǝrɛ ala gǝri.

⁴ Ka gǝri ndzai akwa yɛ, ba Yi ata ndzai akwa gǝri. Tsizu adi ada ya madar dzǝ duku wɛ, kǝ ndzai ntsakǝr si ma dzǝ ata dza mamarari. Ani gǝri adi ata mǝzi yai munya wɛ tar ma gǝri ndzai akwa yɛ.

⁵ “Yi ani fur inabi, gǝr ani tsizuwur fu ni. Ndǝ nam tara ndzai akwa yɛ ba Yi akwa dza, dzǝ ani ata ya munya hang. Akuya ma adi aka Yi wɛ, gǝri adi ata mǝzi ka 'yati mima wɛ.

⁶ Ndǝ nam kura ta ndzai akwa yɛ, dzǝ apa tsizu nam tǝ ndǝ ɗalnta ka ɓuli; dzǝli tsizu yarnda ndǝ ada fati, ka pu akwa u'u ka dzǝ mbantadzi.

⁷ Ma gǝr ndzai akwa yɛ, ba labarna ada ndzai akwa gǝri, gǝri ata yuwɛ kǝlara sǝ nam tǝ gǝri ada bara ndǝ ata la gǝri.

⁸ Saka nam tǝ gǝri ada ya munya hang, gǝr ani ndzǝr nuwurna. Əni ada si aka hǝmɛ nam ngga ala Babarna.

⁹ “Apa tǝ Tada tara yiɗǝ tǝra, ani apani Yi ma tǝ Yi yiɗǝ tǝ gǝri. Ka gǝri ndzai akwa yiɗǝdzǝrna.

¹⁰ Ma gǝri ada ɓǝla tsawurna yarɛ, gǝri ata ndzai akwa yiɗǝdzǝrna, tsu apa tǝ Yi ɓǝlati tsawur Babarna, ba ndzai akwa yiɗǝdzǝrni.

¹¹ Yi nkǝrɛ ala gǝri apani ani ka mwapukur ɗǝfawai ndzai akwa gǝri, ani ka mwapukur ɗǝfa gǝri ka dzǝ ndzai kal-kal.

¹² Əni ani tsawurna: Yiɗamɛ kǝma gǝri, tsu apa tǝ Yi yiɗǝ tǝ gǝri.

¹³ Yiɗǝdzi nam ɓwalnta sang tǝ ndǝ awa 'ya akǝr ala pazǝrni ani ka dzǝ hamnta alari mpikari.

¹⁴ Gǝri ani pazǝrna ma gǝri ada 'ya sǝ nam tǝ Yi tsau ala gǝri.

¹⁵ Yi tsu adi ata kǝga tǝ gǝri zǝr kǝi kǝra wɛ, kadǝbar zǝr kǝi ta zǝndi sǝ nam tǝ thlakǝrni ada 'ya wɛ. Ata vuiya ǝni, Yi ada kǝga tǝ gǝri pazi yarɛ, kadǝbar Yi ghaba ala gǝri sanga sǝ nam tǝ Yi ngati aka Babarna.

¹⁶ Adi gǝri dza tsarba tǝra wɛ, ama Yi dza tsarba tǝ gǝri ba kǝlba tǝ gǝri ka gǝri tǝra lǝka ya munya hang kura kurkuri. Antǝ Tada ata la gǝri kǝlara sǝ nam tǝ gǝri yu akwa thlǝmawai.”

¹⁷ Əni ani tsawurna: Yiɗamɛ kǝma gǝri.

Dunya Ngǝla Ndzǝr Nuwur Yɛsu

¹⁸ “Ma apǝri dunya ni ngǝla tǝ gǝri, ka gǝri zǝndi apǝri dunya ngǝla tǝra kǝmata gǝri.

¹⁹ Ma apǝri gǝr nǝr dunya, dunya ata yiɗǝ tǝ gǝri apa nǝni. Ama gǝri adi nǝr dunya wɛ, Yi kurta tsarba tǝ gǝri akwa dunya, ani sǝ nam ada 'ya tǝ dunya tara ngǝla tǝ gǝri.

²⁰ Ka gǝr ɗǝngati labar nam tǝ Yi nkǝrɛ ala gǝri: Zǝr kǝi adi ata saga kwatsǝni thlakǝr kǝiyirni wɛ. Ma dar lai bwanai, gǝri yɛ dar ata la gǝri bwanai, ma dar ɓǝlati hyipǝrna, dar ata ɓǝlati nǝgǝri ma.

²¹ Sanga ǝni dar ata 'ya ala gǝri kadǝbar thlǝmawai, akuya dar ta zǝndi Ndǝ nam tara hyanti tǝra wɛ.

²² Ma apǝri Yi ta si ka gha ala dar wɛ, dar adi ata 'ya aka biku wɛ. Ama kulini, dar adi aka su tǝ dar ata mbui bikǝr dar wɛ.

²³ Ndǝ nam tara ngǝla tǝra, dzǝ ngǝla Bana ma.

²⁴ Ma Yi ta 'ya akwa ntsa dar sǝ nam kura ndǝ damwa ta saga 'ya wɛ, dar adi ata ndzai aka biku wɛ. Wala ahani dar wula sǝr ndati yarni, ama dar ngǝla tǝ yar gyapu aka Babarna.

²⁵ Ama ǝni ani ka dzǝ ghǝiyaba sǝ nam rǝbwa-rǝbwa akwa mabariyir dar: ‘Dar ngǝla tǝra ɓǝrtu.’

²⁶ “Ama Yi ata hyanti ala gǝri Ndǝr Mbana, nam ani Mambǝlǝr dzǝrkur ni. Dzǝ hyati adzǝ Tada ni, ba dzǝ ata 'ya sakǝida ata kǝrawai.

²⁷ Gǝr ma kǝ ndzai ntsakǝr gǝr sakǝida, kadǝbar tsu akwa baditsǝniyari tǝ gǝri vwam kaka yɛ.”