Yawhana 13 - Kibaku NT

Yɛsu Kǝtsǝnta Thlǝla Ndzǝr Nuwurni

¹ Kabutu tǝ ndǝ awa 'ya Wudzǝr Ngǝmba, Yɛsu zǝndi apǝri saka kǝ si alari tǝ dzǝ ata ngyar dunya ba tǝ dzǝ ata tǝra adzǝ Tada. Dza ada yiɗǝ ndzǝrni nam akwa dunya, ba dzǝ yiɗǝ tǝ dar har ka la dǝnta.

² Yɛsu kaka ndzǝr nuwurni dar akwa sǝm sǝr sǝmǝr vǝri, Satan kurtaka hau akwa ɗǝfa Yahuda Iskaryauti zǝr Simaun, tǝ dzǝ ata ɓǝlai Yɛsu.

³ Yɛsu zǝndi apǝri Tada kurta lari dǝnar sanga su. Dzǝ zǝndi apǝri dzǝ hyati adzǝ Hyal ba dzǝ zǝndi apǝri dzǝ ata tǝra adzǝ Hyal.

⁴ Ani dzǝ ka hyati akwa sǝm sǝr sǝmɛ, dzǝ ka ngunta lǝkutǝrni nam abǝlabǝla, dzǝ ka kǝtǝ zǝr zaɓi, dzǝ ka mbwaba kusarari akǝri.

⁵ Antǝ dzǝ ka pu yimi akwa ntasa ba dzǝ ka baditsǝni kǝtsǝ thlǝla ndzǝr nuwurni, dzǝ ka lǝkǝma aka ɗangulnta thlǝla ndzǝr nuwurni aka zaɓi nam tǝ dzǝ mbwai ata kusarari ni.

⁶ Dzǝ ka si ata kǝra Simaun Bitrusu, antǝ Simaun Bitrusu ka nkǝrɛ alari, “Thlaku, gǝ ata kǝtsɛ alai thlǝlɛ?”

⁷ Yɛsu kalaktsǝni alari, “Kulini gǝ adi ata zǝndi sǝ nam tǝ Yi ada 'ya ni wɛ, ama saka laka gǝ ata siya zǝndi.”

⁸ Bitrusu nkǝrɛ, “A'a. Gɛ adi ata saga kǝtsǝ thlǝlawai wɛ!” Yɛsu sǝnau, “Ma apǝri Yi ta kǝtsǝnta ala gɛ thlǝla gǝ wɛ, gǝ adi ata ndzai nana wɛ.”

⁹ Simaun Bitrusu kalaktsǝni alari, “Thlaku, ta gǝ ta kǝtsɛ thlǝlawai ɗiɗi dza! Ama kǝtsǝnta tsiyawai kaka kǝrawai sang!”

¹⁰ Yɛsu sǝnau alari, “Ndǝ nam tara pǝrɛ dzǝ adi ada bara kǝtsǝ mima wɛ tar thlǝlari ɗiɗi; dzari sang kǝtsǝkǝtsi. Ba gǝ kǝtsǝkǝtsi, wala ahani adi sanga gǝr wɛ.”

¹¹ Akuya dzǝ zǝndi ndǝ nam ata ɓǝlai tǝni, ani sǝ nam tara 'ya tǝ dzǝ nkǝrɛ, “Adi sanga gǝri ani kǝtsǝkǝtsi wɛ.”

¹² Aghǝla tǝ dzǝ kurai kǝtsǝ thlǝla dar, dzǝ ka hadzǝ kariyirni, ba dzǝ ka lǝka ndzai ata vui ndziyirni. Dzǝ ka yu tǝ dar, “Gǝr zǝndi sǝ nam tǝ Yi 'ya ala gǝri ya?

¹³ Gǝr ada kǝga tǝra ‘Malǝm’ ba ‘Thlaku,’ kal-kal dza, kadǝbar Yi apanari.

¹⁴ Kulini nam tǝ Yi, Thlakǝr gǝri ba Malǝmǝr gǝri kǝ kǝtsǝnta thlǝlɛ ala gǝri, gǝr yɛ ka gǝri kǝtsǝnta thlǝlɛ ala kǝma gǝri.

¹⁵ Yi 'ya ala gǝri sǝr nkǝrti, gǝr ma ka gǝri 'ya ala kǝma gǝri apa tǝ Yi tara 'ya ala gǝri.

¹⁶ Yi ada gha ala gǝri dzǝrkur, zǝr kǝi adi ngga ta thlakǝrni wɛ, wala ndǝr hya adi ngga ta ndǝ nam tara hya tǝni wɛ.

¹⁷ Kulini nam tǝ gǝr zǝndi ǝni, ma gǝri ada 'yati, gǝr ndzǝ nam aka barka.”

Yɛsu Nkǝrɛ apǝri Ndɛ ata Ɓǝlai Tǝni

¹⁸ “Adi sanga gǝr ani tǝ Yi ada nkǝr wɛ; Yi zǝndi ndzǝ nam tǝ Yi tsarba. Ama ǝni ka ndǝ ghǝiyaba Labar Hyal: ‘Dzǝ nam ada sǝm sǝr sǝmǝrna ani tara 'ya kulɗakur alai.’

¹⁹ “Yi ada nkǝrɛ ala gǝri sǝ ǝni kulini kabutu ta 'yatǝdzi, ani ka sakatǝ dzǝ 'yatǝdzi ka gǝri mbǝrsa apǝri Yi dza ani yɛ.”

²⁰ Yi ada nkǝrɛ ala gǝri dzǝri, ndǝ nam tara dlutsi kǝlara ndǝ nam tǝ Yi hyanti, dzǝ dlutsi tǝra. Ndǝ nam tara dlutsi tǝra, dzǝ dlutsi ndǝ nam tara hya tǝra.

²¹ Aghǝla tǝ Yɛsu nkǝrɛ apani, dzǝ nga kǝgǝɓu kurari akwa ɗǝfari, dzǝ sakǝidatsǝni, tǝ dzǝ nkǝrɛ apǝri, “Yi ada nkǝrɛ ala gǝri dzǝri, pathla gǝri ata ɓǝlai tǝra.”

²² Antǝ ndzǝr nuwurni ka wular kǝma dar, dar ta zǝndi ndǝ nam tǝ dzǝ ada gha alari wɛ.

²³ Pathlu akwa ntsa ndzǝr nuwurni, ndǝ nam tǝ dzǝ yiɗɛ, dzǝ ada ndzai kudzǝghɛ adzǝ Yɛsu.

²⁴ Simaun Bitrusu ka haɓǝti kǝrari ka nkǝrɛ apǝri, “Yu tǝni wa tǝ dzǝ ada labar ni ata kǝr.”

²⁵ Ani tǝ duku akwa ntsa ndzǝr nuwurni nganyi kǝrari adzǝni, ka yu Yɛsu, “Thlaku, wa?”

²⁶ Yɛsu sǝnau, “Dza ani ndǝ nam tǝ Yi ata lari ɗǝvɛ sakatǝ yi hau tsiyawai akwa ntasa ka dlǝtsi ɗǝvɛ.” Dzǝ ka dlǝtsi ɗǝvɛ dzǝ ka la Yahuda Iskaryauti zǝr Simaun.

²⁷ Sakatǝ Yahuda dlutsi ɗǝvɛ ndari, ani Satan ka lǝkwa dzari. Yɛsu nkǝrɛ alari, “'Ya sǝ nam tǝ gǝ ada bara 'ya bǝtu.”

²⁸ Ama akwa ntsa ndzǝ nam tǝ dar ada sǝm sǝr sǝmɛ, ndǝ tara zǝndi sǝ nam tara 'ya tǝ Yɛsu tara gha alari ahani adi wɛ.

²⁹ Har ma Yahuda dzǝ ani ada ngǝzǝ ngǝrkǝr kwapar dar, laka ndzǝ kǝtǝ apǝri Yɛsu gha alari ka dzǝ mwar ɗǝlba sǝr 'ya wudzǝrari, wala ka dzǝ la sǝ laka ala ndzǝ nam ngudi.

³⁰ Yahuda dlutsi ɗǝvɛ ndari, dzǝ ka lǝba bǝtǝbǝtu. Saka ndari vǝr kurta 'ya.

Yɛsu Nkǝrɛ apǝri Bitrusu ata Ɓwalnta Nyarni

³¹ Aghǝla tǝ Yahuda lǝba, Yɛsu nkǝrɛ, kulini ani tǝ ndɛ ata la nggakur ala Zǝr Ndɛ ba nggakur Hyal ata tsantǝdzi atarni.

³² Ma nggakur Hyal tsantǝdzi atarni, antǝ Hyal ata tsanti nggakur Zǝr Ndɛ tǝ kǝrni, ba dzǝ ata 'yati sam-sam.

³³ Gǝr nam madarna, Yi ata ndzai vwam kaka gǝri saka nkyiɗu laka. Gǝri ata bara tǝra, ama apa tǝ Yi nkǝrɛ ala ndzǝr Yahudi, Yi ada nkǝrɛ ala gǝri kulini: vui nam tǝ Yi ata mwari gǝri adi ata mǝzi mwar wɛ.

³⁴ Mabari bǝlin ani tǝ Yi la gǝri: yiɗɛ mɛ kǝma gǝri. Apa tǝ Yi yiɗǝ tǝ gǝri, kǝ ndzai ntsakǝr gǝr yɛ ka gǝri yiɗǝ kǝma gǝri tsu awa apani.

³⁵ Ənǝni ani whal nam tǝ sanga ndɛ ata zǝndi apǝri gǝri ndzǝr nuwurna: ma gǝr yiɗǝ kǝma gǝri.

³⁶ Simaun Bitrusu yu tǝni, “Thlaku, gǝ ata lǝmarɛ?” Yɛsu sǝnau alari, “Vui nam tǝ Yi ata mwari gǝ adi ata mǝzi nu tǝra kulini wɛ, ama aghǝli gǝ ata nu tǝra.”

³⁷ Bitrusu yuwɛ, “Thlaku, kami kura Yi awa mǝzi nu tǝngɛ kulini? Yi ata hamnta mpikawai kadǝbar ngɛ.”

³⁸ Yɛsu sǝnau, “Gǝ ada nkǝrɛ apǝri, gǝ ata hamnta mpika gǝ kadǝbarna? Ama Yi ada nkǝrɛ ala gǝ dzǝri, kabutu vukum ata tuwa, gǝ ata 'ya ɓwalnyarna apǝri gǝ ta zǝndi tǝra wɛ ka makǝr.”